हिमलुङ हिमालमा हिमपहिरो : सङ्खुवासभाका दुई जनाको टूरिस्टको मृत्यु

मनाङ — मनाङको हिमलुङ हिमाल क्षेत्रमा गएको हिमपहिरोमा परी सङ्खुवासभाका दुई जनाको मृत्यु भएको छ।

मृत्यु हुनेमा सङ्खुवासभाको भोटखोला गाउँपालिका–३ का छेबी भोटे र भोटखोला गाउँपालिका–२ का पासाङ भोटे रहेका छन्।

भोटखोला गाउँपालिकाका अध्यक्ष वाङछेदर भोटेका अनुसार असोज ११ गते आइतबार हिमलुङ हिमाल क्षेत्रमा आएको हिमपहिरोमा परी दुवै जनाको मृत्यु भएको हो।

हिमलुङ हिमाल आरोहण तथा आसपासको क्षेत्रमा रहेका उनीहरू हिमपहिरोमा परेका थिए। उक्त हिमपहिरो नार्पाभूमि गाउँपालिका–५ क्षेत्रमा गएको जनाइएको छ।

मृतक दुवै जना टुरिस्ट गाइडका रूपमा कार्यरत रहेको बताइएको छ।

हिमपहिरोमा परी मृत्यु भएका उनीहरूको शव कैलाश हेलिकप्टरमार्फत काठमाडौं ल्याइएको छ। शवलाई पोस्टमार्टमका लागि काठमाडौंस्थित त्रिवि शिक्षण अस्पताल लगिएको जनाइएको छ।

भोटखोला गाउँपालिकाका अध्यक्ष भोटेका अनुसार पोस्टमार्टमपछि दुवै जनाको काठमाडौंमै दाहसंस्कार गरिनेछ।