मोरङमा प्रेम सम्बन्धका कारण श्रीमानको हत्या, श्रीमती र भारतीय प्रेमी पक्राउ

बिरगंज, पर्सा, २३ कार्तिक 

विराटनगर । मोरङको जहदा गाउँपालिकामा विवाहेत्तर प्रेम सम्बन्धका कारण उत्पन्न विवादले भयावह रूप लिएको छ। अर्का पुरुषसँग प्रेम सम्बन्ध रहेको खुलेपछि उत्पन्न विवादका क्रममा श्रीमतीले भारतीय प्रेमीसँग मिलेर आफ्नै श्रीमानको हत्या गरेको प्रहरीको प्रारम्भिक अनुसन्धानबाट खुलेको छ।

श्रीमानको हत्या गरेको आरोपमा प्रहरीले जहदा गाउँपालिका–२, मोहनपुरका ३५ वर्षीया कमली बास्के र भारतको बिहारस्थित कटिहार जिल्लाका २७ वर्षीय सुनील मिश्रलाई पक्राउ गरेको छ। हत्या गरिएका व्यक्ति कमलीका ४० वर्षीय श्रीमान् बुधराम सोरेन हुन्।

मोरङ प्रहरी प्रमुख एसपी कवित कटवालका अनुसार आइतबार राति करिब ९ बजे बुधरामको टाउकोमा फलामको रड प्रहार गरिएको थियो। रड प्रहारबाट गम्भीर घाइते भएका उनको घटनास्थलमै मृत्यु भएको थियो।

प्रहरीको प्रारम्भिक अनुसन्धानअनुसार कमली र भारतीय नागरिक सुनीलबीच प्रेम सम्बन्ध रहेको थियो। श्रीमतीको अर्का पुरुषसँग सम्बन्ध रहेको थाहा पाएपछि बुधराम र कमलीबीच विवाद उत्पन्न भएको प्रहरीको भनाइ छ। सोही विवादपछि प्रेम सम्बन्धलाई निरन्तरता दिन र त्यसबाट उत्पन्न समस्या हटाउन दुवै जनाले मिलेर बुधरामको हत्या गरेको प्रारम्भिक अनुसन्धानबाट खुलेको एसपी कटवालले जानकारी दिए।

घटनामा संलग्न रहेको आरोपमा प्रहरीले दुवै जनालाई फरक–फरक स्थानबाट पक्राउ गरेको हो। घटनाबारे सूचना पाएपछि प्रहरी चौकी मझारेबाट खटिएको टोलीले सुनीललाई घटनास्थलबाटै नियन्त्रणमा लिएको थियो।

घटनापछि फरार भएकी कमलीलाई भने प्रहरीले सोमबार बिहान करिब साढे ७ बजे घरबाट करिब एक किलोमिटर पश्चिमतर्फ खेतमा भाग्दै गरेको अवस्थामा फेला पारेको थियो।

प्रहरीले हत्यामा प्रयोग भएको फलामको रडसमेत बरामद गरेको छ। घटनाको प्रकृति, हत्याको योजना तथा दुवै आरोपितको भूमिकाबारे थप अनुसन्धान भइरहेको एसपी कटवालले बताए।

उनका अनुसार प्रारम्भिक अनुसन्धानमा विवाहेत्तर प्रेम सम्बन्ध लुकाउन प्रेमीसँग मिलेर श्रीमतीले श्रीमानको हत्या गरेको देखिएको छ। यद्यपि घटनाको विस्तृत तथ्य अनुसन्धानपछि थप स्पष्ट हुने प्रहरीले जनाएको छ।

मृतक बुधराम सोरेनको शव पोस्टमार्टमका लागि कोशी अस्पताल विराटनगर पठाइएको छ। पक्राउ परेका कमली र सुनीलविरुद्ध कर्तव्य ज्यानसम्बन्धी कसुरमा अनुसन्धान अघि बढाउने प्रहरीको तयारी छ।