काभ्रे–सिन्धुपाल्चोक जोड्ने सुनकोशी पुल ६ वर्षदेखि अलपत्र, स्थानीयलाई सास्ती

काभ्रेपलाञ्चोक । काभ्रेपलाञ्चोक र सिन्धुपाल्चोकलाई जोड्ने चेहेरेस्थित सुनकोशी नदीमाथि निर्माण भइरहेको पक्की पुल ६ वर्षदेखि अलपत्र अवस्थामा छ। तोकिएको समयभित्र निर्माण सम्पन्न हुन नसकेपछि पुल निर्माण कार्य लामो समयदेखि ठप्पजस्तै बनेको हो।

काभ्रेपलाञ्चोकको कोशीपूर्व क्षेत्रमा पर्ने भुम्लु गाउँपालिकाका विभिन्न वडा तथा बस्तीलाई सडक सञ्जालसँग जोड्ने उद्देश्यले पुल निर्माणको योजना अघि बढाइएको थियो। यसका लागि सडक विभाग र अमर कन्स्ट्रक्सनबीच २०७७ भदौ १० गते निर्माण सम्झौता भएको थियो।

सम्झौताअनुसार पुल २०८० जेठ २ गतेभित्र निर्माण सम्पन्न गरिसक्नुपर्ने थियो। तर निर्माण व्यवसायीले समयमै काम पूरा नगरेपछि निर्धारित समयसीमाभित्र आयोजना सम्पन्न हुन सकेन।

सडक विभागका इन्जिनियर निरोज महर्जनका अनुसार निर्माण कम्पनीले विभिन्न कारण देखाउँदै काममा ढिलाइ गरेको स्थानीयको गुनासो छ। समयमै निर्माण सम्पन्न नभएपछि विभागीय निर्णयबाट २०८१ वैशाख २० गते थप २३ महिना २५ दिनको म्याद दिइएको थियो। तर थपिएको अवधिमा समेत निर्माण कार्य अपेक्षाअनुसार अघि बढ्न नसकेको महर्जनले बताए।

भ्याटसहित ११ करोड ७ लाख ४२ हजार २ सय रुपैयाँ लागतमा ठेक्का सम्झौता भएको उक्त पुलमा हालसम्म तीनवटा मात्रै पिल्लर निर्माण भएका छन्। काभ्रेपलाञ्चोकतर्फ एउटा स्पानसमेत तयार भएको छ।

पुल निर्माणमा भइरहेको ढिलाइका कारण स्थानीय नागरिकले लामो दूरीको यात्रा गर्नुपर्ने बाध्यता रहेको भुम्लु गाउँपालिका–१ का वडाध्यक्ष लेखबहादुर श्रेष्ठले बताए।

उनका अनुसार पुल निर्माण सम्पन्न भए हालको तुलनामा स्थानीयको यात्रा दूरी निकै छोटिनेछ। ‘पुल नबन्दा यहाँका नागरिकले १५ किलोमिटर बढी सडकको यात्रा गर्नुपर्ने बाध्यता छ, पुल बन्दा चार किलोमिटर मात्रै हिँडे पुग्छ,’ उनले भने।

यसैबीच काभ्रेका सांसद बदन भण्डारीले केही दिनअघि अलपत्र अवस्थामा रहेको पुलको अनुगमन तथा निरीक्षण गरेका छन्। निरीक्षणका क्रममा उनले पुल निर्माणलाई पूर्णता दिन आफूले पहल गर्ने बताएका छन्।

स्थानीयवासीले लामो समयदेखि अलपत्र रहेको पुल निर्माणलाई गति दिई शीघ्र सञ्चालनमा ल्याउन सम्बन्धित निकायसँग माग गरेका छन्।