गृहमन्त्री सुधन गुरुङ भारत भ्रमणमा, अमित शाहसँग द्विपक्षीय भेटवार्ता गर्ने

बिरगंज, पर्सा, २६ असोज 

गृहमन्त्री सुधन गुरुङ भारत भ्रमणमा निस्किएका छन्। उनी बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) अन्तर्गत आयोजना हुने गृहमन्त्रीस्तरीय बैठकमा सहभागी हुन आज भारत प्रस्थान गरेका हुन्।

गृहमन्त्री बनेपछि गुरुङको यो पहिलो विदेश भ्रमण हो। नयाँ दिल्लीमा असोज २७ गते आयोजना हुने उक्त बैठक भारतीय गृहमन्त्री अमित शाहको पहलमा हुन लागेको हो।

बैठकमा नेपाल र भारतसहित बंगलादेश, भुटान, म्यानमार, श्रीलंका र थाइल्यान्डका गृहमन्त्री तथा सम्बन्धित उच्च अधिकारी सहभागी हुनेछन्। बैठकमा गृहमन्त्री गुरुङसहित भारतका अमित शाह, बंगलादेशका सलाहुद्दिन अहमद, भुटानका लुङ्तेन दोर्जी, म्यानमारका लेफ्टिनेन्ट जनरल न्युन्ट विन स्वे, श्रीलंकाका विजिथा हेराथ र थाइल्यान्डका अनुतिन चानविराकुल सहभागी हुने कार्यक्रम छ।

भ्रमणका क्रममा गृहमन्त्री गुरुङले भारतीय समकक्षी अमित शाहसँग द्विपक्षीय भेटवार्तासमेत गर्नेछन्। यद्यपि, भारतीय प्रधानमन्त्री नरेन्द्र मोदीसहित अन्य उच्चस्तरीय राजनीतिक भेटघाटको कार्यक्रम भने तय नभएको गृहमन्त्री गुरुङको सचिवालयले जनाएको छ।

गृहमन्त्री गुरुङ असोज २८ गते स्वदेश फर्किने कार्यतालिका रहेको छ।