जेनजी आन्दोलनमा नख्खु जेलबाट फरार कैदी नक्कली सुन देखाएर १ करोड ३९ लाख ठगेको आरोपमा पक्राउ

काठमाडौँ/सुन जस्तो देखिने पहेंलो धातु देखाएर १ करोड ३९ लाख रुपैयाँभन्दा बढी ठगी गरेको आरोपमा प्रहरीले टोखाबाट एक जनालाई पक्राउ गरेको छ। जिल्ला प्रहरी परिसर काठमाडौँ र प्रहरी प्रभाग गोँगबुको टोलीले टोखा नगरपालिका–९ मिलनटोलस्थित एक गेस्ट हाउसबाट ओखलढुङ्गा सिद्धिचरण नगरपालिका–१ घर भई काठमाडौँ नयाँ बसपार्क बस्ने २८ वर्षीय अनिष थापा मगरलाई पक्राउ गरेको हो।

प्रहरीका अनुसार अभियुक्त थापा मगरले पीडितलाई पटक-पटक गरी कुल १ करोड ३९ लाख ३० हजार रुपैयाँ ठगी गरेका थिए। उनको साथबाट प्रहरीले नक्कली सुन जस्तो देखिने ८५६ ग्राम पहेंलो धातुसमेत बरामद गरेको छ। पक्राउ परेका उनीमाथि ठगी कसुरमा काठमाडौँ जिल्ला अदालतबाट पाँच दिनको म्याद थप गरी विस्तृत अनुसन्धान भइरहेको काठमाडौँ प्रहरीका प्रवक्ता प्रहरी उपरीक्षक दानबहादुर थापाले जानकारी दिए।

अनुसन्धानका क्रममा पक्राउ परेका थापा मगर यसअघि नै जबरजस्ती करणी कसुरमा कैद भुक्तान गरिरहेका फरार अपराधी रहेको खुलेको छ। उनी २०८२ भदौ २४ गते नखू कारागारबाट भागेका थिए। कारागारबाट फरार भएलगत्तै उनी पुनः काठमाडौँमै नक्कली सुनको प्रलोभन देखाएर ठगी धन्दामा सक्रिय भएको प्रहरीको प्रारम्भिक निष्कर्ष छ।