परोहाको पटेल चौकबाट कटुवा पेस्तोल सहित भारतीय नागरिक पक्राउ

रौतहट, ७ असोज । रौतहटको परोहा नपा –८ मोतिपुर स्थित पटेल चौकबाट एक जना भारतीय नागरिकलाई अवैध हतियारसहित पक्राउ गरिएको छ।

पक्राउ पर्नेमा भारतको बिहार राज्य, मोतिहारी जिल्ला, सन्तपुर निवासी गम्भीरा दासको ३५ वर्षीय गोविन्दा दास रहेको प्रहरीले जनाएको छ।

प्रहरी चौकी मोतिपुर तथा सशस्त्र प्रहरी बल नेपाल, बोर्डर आउट पोस्ट (बीओपी) सरमुजवाको संयुक्त टोलीले विशेष सूचनाका आधारमा गरेको निगरानी तथा चेकजाँचका क्रममा दासलाई एक थान कटुवा पेस्तोल सहित नियन्त्रणमा लिएको हो।

सीमावर्ती क्षेत्रमा सुरक्षा निगरानीलाई थप कडाइ गरिरहेको अवस्थामा हतियारसहित भारतीय नागरिक पक्राउ परेपछि घटनालाई सुरक्षा निकायले गम्भीर रूपमा लिएको जनाएको छ। पक्राउ परेका दासलाई आवश्यक अनुसन्धान तथा कानुनी कारबाहीका लागि प्रहरीको नियन्त्रणमा राखिएको छ।

घटनाबारे थप अनुसन्धान भइरहेको र हतियारको स्रोत, उद्देश्य तथा यसमा अन्य व्यक्तिको संलग्नता भए–नभएको विषयमा समेत अनुसन्धान अगाडि बढाइएको सम्बन्धित सुरक्षा निकायले जनाएको छ।