पशुपतिनाथको मुख्य गर्भगृह क्षेत्रमा प्रवेश गरेको आरोपमा इटहरीका प्रियंका र ओसीम पक्राउ

पर्सा, २१ असोज 

काठमाडौं । पशुपतिनाथ मन्दिरको मुख्य गर्भगृह क्षेत्रमा प्रवेश गरेको आरोपमा इटहरीका प्रियंका परियार र ओसीम अन्सारी पक्राउ परेका छन्।

पशुपति क्षेत्र विकास कोषले दिएको जाहेरीका आधारमा प्रहरीले उनीहरूलाई इटहरीबाट पक्राउ गरेको हो। पक्राउ परेका दुवै जनालाई थप अनुसन्धानका लागि काठमाडौंस्थित प्रहरी वृत्त गौशाला पठाइएको प्रहरीले जनाएको छ।

केही दिनअघि प्रियंका र ओसीम पशुपतिनाथ मन्दिर परिसरमा पुगेका बेला बनाएको भिडिओ सामाजिक सञ्जालमा सार्वजनिक भएपछि उक्त विषय विवादमा आएको थियो। उक्त भिडिओमा ओसीमले मुस्लिम समुदायले प्रयोग गर्ने टोपी लगाएको देखिएपछि उनी गैरहिन्दू भएको भन्दै मन्दिर प्रवेश गरेको विषयमा सामाजिक सञ्जालमा विभिन्न प्रश्न उठेका थिए।

घटनाबारे सांसद खुस्बु ओलीले समेत सामाजिक सञ्जालमार्फत प्रश्न उठाएकी थिइन्। त्यसपछि पशुपति क्षेत्र विकास कोषले उनीहरूविरुद्ध प्रहरीमा जाहेरी दिएको बताइएको छ।

प्रहरीले पक्राउ गर्नुअघि अन्सारी दम्पतीले सामाजिक सञ्जालमार्फत घटनाबारे स्पष्टीकरण दिएका थिए। उनीहरूले आफूहरू पशुपतिनाथ मन्दिरको मूल ढोकाबाट प्रवेश गरेको भए पनि भर्‍याङबाटै फर्काइएको दाबी गरेका छन्।

प्रियंकाले पशुपतिनाथलाई आफूले आस्थाको केन्द्र मान्दै आएको र आफ्ना श्रीमान् ओसीमलाई पनि मन्दिर देखाउनका लागि आफू सँगै गएको बताएकी छन्।

प्रियंका र ओसीम प्रेम विवाह गरेका दम्पती हुन् र उनीहरू इटहरीमा बस्दै आएका छन्। ओसीम व्यवसायमा संलग्न रहेको तथा उनी इटहरी–८ का स्थायी बासिन्दा रहेको बताइएको छ।

घटनाबारे प्रहरीले थप अनुसन्धान गरिरहेको जनाएको छ। अनुसन्धानपछि मात्र घटनाको वास्तविक अवस्था र कानुनी प्रक्रियाबारे थप स्पष्ट हुने बताइएको छ।