दोलखा–सिन्धुली क्षेत्र जोड्ने सडकखण्डमा भएको बस दुर्घटनामा मृत्यु हुने सात जनाको पहिचान खुलेको छ भने एक बालक अझै बेपत्ता रहेको पुष्टि भएको छ। दुर्घटनापछि उद्धार तथा खोजी कार्य जारी रहेको प्रहरीले जनाएको छ।

प्राप्त विवरण अनुसार मृत्यु हुनेहरूमा लिखु तामाकोशी गाउँपालिका–४ का २९ वर्षीय बबी तामाङ, सोही स्थानका ३० वर्षीय दिपेश बस्नेत, २५ वर्षीय दिपेन्द्र बस्नेत रहेका छन्। त्यसैगरी लिखु तामाकोशी गाउँपालिका–७ की ३५ वर्षीया सानुमाया तामाङ र २१ वर्षीया तारा तामाङको पनि मृत्यु भएको पुष्टि भएको छ।

यस्तै, दोलखाको भीमेश्वर नगरपालिका–८ का ६० वर्षीय मानबहादुर तामाङ तथा सिन्धुली गोलञ्जोर गाउँपालिका–६ का २४ वर्षीय शिव श्रेष्ठको पनि दुर्घटनामा ज्यान गएको जिल्ला प्रहरी कार्यालयले जनाएको छ।

दुर्घटनामा एक बालक बेपत्ता भएको पुष्टि भएको छ। घटनास्थल तथा आसपासको क्षेत्रमा सुरक्षाकर्मी, स्थानीयवासी र उद्धार टोलीले खोजी कार्य जारी राखेको बताइएको छ। अन्य केही घाइतेहरूको स्थानीय स्वास्थ्य संस्थामा उपचार भइरहेको जनाइएको छ, यद्यपि घाइतेहरूको विस्तृत विवरण आउन बाँकी रहेको छ।

प्रहरीका अनुसार दुर्घटनाको कारणबारे अनुसन्धान भइरहेको छ। प्रारम्भिक अनुमानमा सडकको अवस्था, अत्यधिक गति, यान्त्रिक समस्या वा चालकको नियन्त्रण गुम्नु जस्ता कारण हुन सक्ने भए पनि आधिकारिक निष्कर्ष आउन बाँकी छ। नेपालका पहाडी तथा ग्रामीण सडकमा साँघुरा मोड, जोखिमपूर्ण भूगोल र सवारी साधनको प्राविधिक अवस्था कमजोर हुनु दुर्घटनाका सामान्य कारण मानिन्छन्।

स्थानीय तहका जनप्रतिनिधि तथा प्रशासनले मृतकप्रति श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामना गरेका छन्। थप सनाखत तथा विवरण संकलन कार्य भइरहेको प्रहरीले जनाएको छ।

काठमाडौं — श्रम, रोजगार तथा सामाजिक सुरक्षा मन्त्रालय अन्तर्गतको वैदेशिक रोजगार विभागले जापानमा रोजगारीका नाममा भइरहेको ठगी तथा अनियमित गतिविधिप्रति गम्भीर ध्यानाकर्षण भएको जनाएको छ। नेपाली राजदूतावास, टोकियो (जापान) बाट प्राप्त सूचनाका आधारमा विभागले जापानमा वैदेशिक रोजगारसम्बन्धी गैरकानुनी गतिविधि बढ्दै गएको भन्दै सर्वसाधारणलाई सचेत रहन आग्रह गरेको हो।

विभागका अनुसार पछिल्लो समय जापानमा व्यावसायिक कुक, केयरगिभर, सीपयुक्त कामदार तथा अन्य विभिन्न क्षेत्रमा रोजगारी लगाइदिने बहानामा ठगी गर्ने घटनाहरू बढ्दै गएका छन्। व्यक्तिगत श्रम स्वीकृति लिनुपर्ने कानुनी व्यवस्था उल्लंघन गर्दै केही व्यक्ति, कम्पनी तथा संस्थाहरूले गैरकानुनी रूपमा काम र आकर्षक तलबको आश्वासन दिने, चर्को शुल्क असुल गर्ने तथा सम्झौताअनुसार काम र पारिश्रमिक नदिने गुनासोहरू विभागमा प्राप्त भइरहेका छन्।

सूचनामा उल्लेख भएअनुसार वैदेशिक रोजगार व्यवसाय सञ्चालन गर्ने आधिकारिक अनुमति नपाएका विभिन्न कम्पनी, संस्था तथा व्यक्तिहरूले जापानमा काम लगाइदिने भन्दै नक्कली कागजात तयार पार्ने, व्यक्तिगत श्रम स्वीकृतिका लागि आवेदन गराउने र सेवाग्राहीसँग ठूलो रकम असुल गर्ने जस्ता गतिविधि गरेको पाइएको छ। यस्तो कार्य वैदेशिक रोजगार ऐन विपरीत भएकाले दोषी व्यक्ति वा संस्थामाथि कडा कारबाही गरिने विभागले चेतावनी दिएको छ।

विभागले जापान रोजगारीमा जान इच्छुक व्यक्तिहरूलाई भिसाको प्रकार, रोजगारदाता, सम्बन्धित कम्पनी वा संस्थासँग भएको करार सम्झौता (COE) तथा कामको आधिकारिक विवरणबारे पूर्ण जानकारी लिएर मात्र श्रम स्वीकृतिका लागि आवेदन गर्न अनुरोध गरेको छ। कसैले पनि जापान पठाइदिने नाममा भिसा, COE वा करार सम्झौता उपलब्ध गराइदिने भन्दै रकम मागेमा तुरुन्त सम्बन्धित निकायमा उजुरी दिन समेत आग्रह गरिएको छ।

त्यस्तै, Transport Driver Candidate Visa अन्तर्गत व्यक्तिगत श्रम स्वीकृतिका लागि विगतमा पेश भएका केही निवेदनहरूबारे पनि विभागले स्पष्टिकरण दिएको छ। उक्त भिसा अन्तर्गत जापानमा ड्राइभिङ लाइसेन्सको परीक्षा उत्तीर्ण गरेपछि मात्र रोजगार सुनिश्चित हुने अवस्था रहेको र स्वदेशमै रोजगारदाता खोज्नुपर्ने भएकाले यस प्रकारको भिसामा श्रम स्वीकृति जारी नगरिने स्पष्ट गरिएको छ।

वैदेशिक रोजगार विभागले जापान रोजगारीका नाममा हुने कुनै पनि किसिमका ठगी, अनियमितता तथा गैरकानुनी क्रियाकलापमा संलग्न व्यक्ति वा संस्थाविरुद्ध कानुनअनुसार कडा कारबाही गरिने दोहोर्‍याउँदै आम नागरिकलाई सचेत र सावधान रहन पुनः आग्रह गरे.को छ।

आम जनता पार्टी पर्सा क्षेत्र नं.२को घरदैलो कार्यक्रम सम्पन्न!

रामजी यादव ,२६ माघ बीरगंज पर्सा

आम जनता पार्टी पर्सा क्षेत्र नं.२को घरदैलो कार्यक्रम सम्पन्न भएको छ।पर्साको बहुदरमाई नगरपालिका वडानं.४डोकैला र पर्सा गढी नगरपालिकाको बहुअर्वामा आम जनता पार्टी पर्सा क्षेत्र नं २ की प्रतिनिधि सभा सदस्य पदकी उम्मेदवार रंजु कुमारी साहले आफ्नो पार्टीका कार्यकर्ता सहित चुनावी घरदैलो कार्यक्रम सम्पन्न गरेका हुन्।

आगामी फागुन २१गते हुने प्रतिनिधी सभाको चुनावलाई लक्षित गर्दै मतदाताको घरसम्म पुगेर जनताको समस्या बुझी सधै साथ दिन प्रतिबद्धता गर्दै प्रत्यक्ष संबाद स्थापित राख्न चुनावी घरदैलो कार्यक्रमलाई तिव्र बनाईको छ ।आम जनता पार्टी पर्सा क्षेत्र नं २का प्रतिनिधि सभा सदस्य पदका उम्मेद्वार साह उहाँका पार्टीका कार्यकर्ताहरुले मतदाताहरुसंग आफ्नो पार्टीको अजेन्डाको बारेमा जानकारी गराएका थिए।

आगामी फागुन २१गते हुने प्रतिनिधि सभाको चुनावमा मतदाताहरुसंग भेटघाटको क्रममा चुनावी छलफल गरि उम्मेदवार रंजु कुमारी साहलाई आ-आफ्नो अमुल्य मत दिई भारी मतले बिजयी गराउन नेता तथा कार्यकर्ताहरुले अनुरोध गरेका थिए।

चुनावी घरदैलो कार्यक्रममा आम जनता पार्टीका जोगीन साह,प्रभु पासवान,किरण देबी,रामसुनर मण्डल ,बिनोद पटेल उमेश पंडीत, जितेन्द्र चौधरी लगायतको उपस्थिती रहेको थियो।

 वीरगन्ज/रक्सौल । कथा वाचनका लागि भारतको रक्सौल आइपुग्नुभएका प्रसिद्ध कथा वाचक अनिरुद्ध आचार्य महाराजले नेपालको प्रवेशद्वारका रूपमा परिचित ‘शंकराचार्य गेट’ को अवलोकन गर्नुभएको छ।

महाराजले वीरगन्ज–रक्सौल सीमा क्षेत्रमा अवस्थित उक्त गेटको निरीक्षण गर्दै यसको धार्मिक, सांस्कृतिक तथा ऐतिहासिक महत्वबारे जानकारी लिनुभएको थियो। अवलोकनका क्रममा उहाँले नेपाल र भारतबीचको सांस्कृतिक तथा धार्मिक सम्बन्ध सुदृढ बनाउन यस्ता संरचनाहरूले महत्वपूर्ण भूमिका खेल्ने बताउनुभयो।

स्थानीय श्रद्धालु तथा सर्वसाधारणको उपस्थितिमा महाराजले गेट परिसरको भ्रमण गर्नुका साथै त्यहाँ उपस्थित भक्तजनसँग छोटो भेटघाट समेत गर्नुभएको थियो। उहाँ रक्सौलमा आयोजना गरिएको धार्मिक कथा वाचन कार्यक्रममा सहभागी हुन आउनुभएको हो, जहाँ ठूलो संख्यामा भक्तजनहरूको उपस्थिति रहने अपेक्षा गरिएको आयोजकले जनाएको छ।

वीरगन्ज–रक्सौल नाका नेपाल–भारतबीचको प्रमुख व्यापारिक तथा आवागमन मार्गका रूपमा परिचित छ। यस क्षेत्रमा निर्माण गरिएको ‘शंकराचार्य गेट’ धार्मिक तथा सांस्कृतिक पहिचान झल्काउने प्रतीकका रूपमा पनि हेरिन्छ।

आचार्य महाराजको आगमन र गेट अवलोकनले स्थानीय धार्मिक तथा सांस्कृतिक गतिविधिमा थप उत्साह थपिएको स्थानीयले बताएका छन्।