बिरगंज, पर्सा, २० कार्तिक 

मकवानपुर। चितवनको राप्ती नगरपालिका–५ स्थित सिपडाँडामा बोलेरो जीप दुर्घटना हुँदा २५ जना घाइते भएका छन्।

जिल्ला प्रहरी कार्यालय चितवनका अनुसार शुक्रबार अपराह्न करिब ४ः३० बजे भण्डाराबाट थाकलटारतर्फ जाँदै गरेको बा.प्र.०१–०३५ च २८८६ नम्बरको बोलेरो जीप अनियन्त्रित भई दुर्घटनामा परेको हो।

सिपडाँडास्थित भित्री सडकखण्डबाट जीप करिब ५० मिटर तल खोल्सामा खसेको प्रहरीले जनाएको छ। दुर्घटनाका समयमा जीपमा सवार २५ जना घाइते भएका थिए।

प्रहरीका अनुसार घाइतेहरूको उद्धार गरी उपचारका लागि अस्पताल पठाइएको छ। उनीहरूको अवस्था मध्यम रहेको बताइएको छ। घाइतेहरूको नाम र ठेगाना भने खुल्न बाँकी छ।

घटनाबारे थप अनुसन्धान भइरहेको जिल्ला प्रहरी कार्यालय चितवनले जनाएको छ।

बिरगंज, पर्सा, १८ कार्तिक 

सशस्त्र प्रहरी बलले बाराको सीमा क्षेत्रमा सञ्चालन गरेको निगरानी तथा चेकजाँचका क्रममा १३ लाख ८४ हजार ६१० रुपैयाँ बराबरका अवैध सामान बरामद गरेको छ।

सीमा क्षेत्रमा हुने चोरी–तस्करी तथा भन्सार छली नियन्त्रण गर्ने उद्देश्यले गरिएको कारबाहीका क्रममा कपडा, किराना सामग्री, मकैको बीउलगायतका सामान बरामद गरिएको सशस्त्र प्रहरीले जनाएको छ।

सशस्त्र प्रहरी बल, नेपाल नं. १२ गण हेडक्वार्टर बाराअन्तर्गतका विभिन्न इकाइले सीमा क्षेत्रमा गरेको निगरानी तथा चेकजाँचका क्रममा ती सामान फेला पारेका हुन्। कारबाहीका क्रममा तस्करीमा प्रयोग गरिएको मोटरसाइकलसमेत नियन्त्रणमा लिइएको छ।

सशस्त्र प्रहरी बल, नेपाल नं. १२ गण बाराका सूचना अधिकारी सशस्त्र प्रहरी नायब उपरीक्षक विक्रममणि अधिकारीका अनुसार बरामद गरिएका सम्पूर्ण सामानको मूल्य १३ लाख ८४ हजार ६१० रुपैयाँ रहेको छ।

उनका अनुसार बरामद सामान आवश्यक कानुनी प्रक्रिया पूरा गरी वीरगञ्ज भन्सार कार्यालयमा बुझाइएको छ।

सीमा क्षेत्रमा हुने अवैध ओसारपसार, चोरी–तस्करी तथा भन्सार छली नियन्त्रण गर्न सशस्त्र प्रहरीले नियमित गस्ती, निगरानी र चेकजाँचलाई थप प्रभावकारी बनाउँदै आएको जनाएको छ।

सीमावर्ती क्षेत्रमा हुने अवैध गतिविधि नियन्त्रणका लागि सुरक्षा निकायले निगरानी बढाएसँगै तस्करी नियन्त्रण अभियानलाई थप तीव्रता दिइएको छ।

बिरगंज, पर्सा, १८ कार्तिक 

विराटनगर । रोजगारीको प्रलोभन देखाएर दुई युवतीलाई बन्धक बनाई जबर्जस्ती यौनधन्दामा लगाएको आरोपमा मोरङ जिल्ला अदालतमा मानव बेचबिखन तथा ओसारपसारसम्बन्धी मुद्दा दायर भएको छ ।

जिल्ला सरकारी वकिल कार्यालय मोरङले घटनामा संलग्न रहेको आरोप लागेका परवेज महमदविरुद्ध मुद्दा दायर गरेको हो । घटनामा संलग्न अर्का आरोपित रामविलास महतो भने फरार रहेको जनाइएको छ ।

अभियोगपत्रअनुसार बेरोजगार रहेका दुई युवतीलाई होटलमा राम्रो कमाइ हुने काम दिलाइदिने प्रलोभन देखाएर विराटनगर ल्याइएको थियो । त्यसपछि उनीहरूलाई विराटनगर महानगरपालिका–१३ स्थित मलाया रोड नजिकैको एक सुनसान घरमा लगेर बन्धक बनाइएको आरोप छ ।

आरोपितहरूले होटल सञ्चालन गर्ने बहानामा घर भाडामा लिएको र त्यहाँका कोठाहरूमा युवतीहरूलाई राखेर बाहिरबाट आउने पुरुषसँग जबर्जस्ती यौनसम्पर्क गर्न बाध्य बनाउने गरेको अभियोगपत्रमा उल्लेख छ ।

युवतीहरूले अस्वीकार गर्दा मानसिक तथा शारीरिक दबाब दिने र डरत्रास देखाएर जबर्जस्ती गर्ने गरिएको आरोप छ । उनीहरूसँग यौनसम्पर्क गरेबापत पुरुषहरूबाट रकम असुल्ने तर युवतीहरूलाई भने कुनै पैसा नदिने गरेको अभियोगपत्रमा जनाइएको छ ।

पीडित युवतीहरूले असह्य भएपछि जिल्ला प्रहरी कार्यालय मोरङमा उजुरी दिएका थिए । त्यसपछि प्रहरीले घटनास्थलमा पुगेर दुवै युवतीलाई उद्धार गरेको थियो । प्रहरीका अनुसार घटनास्थलबाट एक आरोपित परवेज महमदलाई पक्राउ गरिएको थियो भने अर्का आरोपित रामविलास महतो फरार भएका थिए ।

अनुसन्धानका क्रममा पक्राउ परेका आरोपितले प्रहरीसमक्ष घटनामा आफ्नो संलग्नता स्वीकार गरेको विवरणसमेत अभियोगपत्रमा उल्लेख गरिएको छ ।

जिल्ला सरकारी वकिल कार्यालयका सहायक जिल्ला न्यायाधिवक्ता वसन्त काफ्लेले अदालतमा दायर गरेको अभियोगपत्रमा मानव बेचबिखन तथा ओसारपसार (नियन्त्रण) ऐन, २०६४ अनुसार कारबाहीको माग गरिएको छ ।

सरकारी पक्षले आरोपितहरूलाई १० देखि १५ वर्षसम्म कैद र ५० हजारदेखि एक लाख रुपैयाँसम्म जरिवाना गर्न माग गरेको छ । साथै पीडित युवतीहरूलाई उचित क्षतिपूर्ति उपलब्ध गराउन र फरार आरोपित रामविलास महतोविरुद्ध पक्राउ पुर्जी जारी गर्न पनि माग गरिएको छ ।

घटनासम्बन्धी केही प्रमाण परीक्षणका लागि राष्ट्रिय विधि विज्ञान प्रयोगशाला, सामाखुसी काठमाडौं पठाइएको जनाइएको छ ।

 बिरगंज, पर्सा,१७ कार्तिक 

पर्साको वीरगन्जबाट २७.७० तोला चाँदीका विभिन्न सामानसहित बाराका दुई जना पक्राउ परेका छन्।

पक्राउ पर्नेमा बाराको करैयामाई गाउँपालिका–८ घर भई हाल वीरगन्ज महानगरपालिका–१६ नगवामा बस्दै आएका करिब ३६ वर्षीय रामप्रकाश सराफ र बाराकै गढीमाई गाउँपालिका–५ घर भई हाल वीरगन्ज महानगरपालिका–१६ मा बस्दै आएका करिब ३९ वर्षीय कृष्ण सहनी रहेका छन्।

जिल्ला प्रहरी कार्यालय पर्साका अनुसार वीरगन्ज महानगरपालिका–२५ स्थित सिर्सिया चेकपोस्टमा भारतबाट नेपालतर्फ आउँदै गरेको मोटरसाइकल जाँच गर्ने क्रममा उनीहरूको साथबाट चाँदीका विभिन्न सामान बरामद भएको हो।

मंगलबार बिहान बीआर ०५ बीके ४४१७ नम्बरको मोटरसाइकललाई रोकेर चेकजाँच गर्दा २७.७० तोला चाँदीका सामान फेला परेको प्रहरीले जनाएको छ।

इलाका प्रहरी कार्यालय छप्कैयाबाट प्रहरी सहायक निरीक्षक भोगेन्द्र खत्रीको कमाण्डमा खटिएको प्रहरी टोलीले मोटरसाइकलमा सवार दुवै जनालाई चाँदीका सामानसहित नियन्त्रणमा लिएको हो।

पक्राउ परेका दुवै जनामाथि आवश्यक अनुसन्धान भइरहेको जिल्ला प्रहरी कार्यालय पर्साले जनाएको छ।