काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले आफूमाथि लागेका आरोप सम्बन्धी मुद्दामा अदालतबाट न्याय पाउनेमा आफू विश्वस्त रहेको बताएका छन्। बिहीबार जिल्ला अदालत कास्की, पोखरामा तारिख बुझ्न उपस्थित भएका लामिछानेले सञ्चारकर्मीसँग कुराकानी गर्दै कानुनी प्रक्रिया र अदालती निर्णयप्रति आफ्नो पूर्ण सम्मान रहेको स्पष्ट पारे।

अदालत परिसरमा सञ्चारकर्मीसँग बोल्दै उनले भने, “नेपालमा सबैले न्याय पाउने ठाउँ अदालत नै हो, त्यसैले म कानुनी प्रक्रियालाई सम्मान गर्दै आएको छु र आगामी दिनमा पनि त्यही अनुरूप अघि बढ्नेछु।”

लामिछानेले आफूमाथि विभिन्न अदालतमा मुद्दा दर्ता भएका कारण तारिख बुझ्न विभिन्न स्थानमा उपस्थित हुनुपर्ने अवस्था रहेको बताए। त्यसका लागि आफूले समय व्यवस्थापन गर्दै आवश्यक तालिका बनाएर अदालतमा उपस्थित भइरहेको उनले जानकारी दिए।

उनले आफूहरू कानुनी राज्य स्थापना गर्ने उद्देश्यका साथ राजनीति गरिरहेको उल्लेख गर्दै कानुन र न्यायालयप्रति जिम्मेवार बन्नु आफ्नो दायित्व भएको बताए। “हामीले कानुनी राज्यको कुरा गर्ने, तर आफैं कानुनी प्रक्रिया नमान्ने कुरा हुन सक्दैन,” उनले भने।

हाल लामिछानेमाथि लागेका आरोप सम्बन्धी मुद्दा अदालती प्रक्रियामै रहेको र त्यसको अन्तिम निर्णय अदालतबाट नै आउने भएकाले आफूले धैर्यतापूर्वक कानुनी प्रक्रियाको सामना गरिरहेको उनले बताए।

रास्वपा स्रोतका अनुसार लामिछानेले आगामी दिनमा पनि अदालतले तोकेको समय र प्रक्रिया अनुसार उपस्थित हुने र कानुनी लडाइँलाई विधिसम्मत ढंगले अघि बढाउने बताएका छन्।

काठमाडौं – सशस्त्र प्रहरी महानिरीक्षक (आईजी) राजु अर्यालले आसन्न निर्वाचनलाई लक्षित गर्दै देशभरका सशस्त्र प्रहरी युनिटलाई आवश्यक परे आदेशको पर्खाइ नगरी तुरुन्त परिचालन हुन निर्देशन दिएका छन्। उनले निर्वाचनका क्रममा नेपाल प्रहरी वा निर्वाचनमा खटिएका कर्मचारीलाई सहयोग आवश्यक परे तत्काल सुरक्षात्मक कारबाहीमा सक्रिय हुन स्पष्ट आदेश दिएका हुन्।

गण्डकी प्रदेशका विभिन्न जिल्लामा माघ २७ र २८ गते निर्वाचन सुरक्षा अवस्थाबारे स्थलगत अनुगमन गर्दै आईजी अर्यालले भूकम्पजस्ता विपद्मा जस्तै आपतकालीन अवस्थामा स्वतः परिचालन हुनुपर्ने बताएका छन्। उनले सुरक्षाकर्मीलाई ढिलाइ नगरी आवश्यक कदम चाल्न र त्यसपछि मुख्यालयलाई जानकारी गराउन निर्देशन दिएका हुन्।

आईजी अर्यालले भने, “आदेशको पर्खाइमा नबस्नुहोस्, सुरक्षात्मक कारबाहीका लागि तत्काल परिचालन भएर जानकारी गराउनुहोस्। आदेश कुर्नु पर्दैन, यही स्थायी आदेश हो।”

मंगलबार उनले सशस्त्र प्रहरी बल नेपाल नं. २४ कालिका गण कास्की मातहत परिचालन हुने निर्वाचन सुरक्षाकर्मीलाई उच्च आत्मविश्वासका साथ जिम्मेवारी निर्वाह गर्न निर्देशन दिएका थिए। सोही दिन स्याङजा र पाल्पाका सशस्त्र प्रहरी युनिटहरूको अनुगमन गर्दै उनले जिल्लास्तरीय सुरक्षा समितिसँग छलफल गरेका थिए।

स्याङजास्थित जिल्ला प्रशासन कार्यालयमा प्रमुख जिल्ला अधिकारी ईश्वरी प्रसाद अर्याल तथा अन्य सुरक्षा अधिकारीहरूसँग बैठक गरी निर्वाचन सुरक्षाको तयारीबारे जानकारी लिइएको थियो। निर्वाचन विथोल्ने प्रयासलाई असफल बनाउन सबै सुरक्षा निकायबीच समन्वय र सहकार्य अपरिहार्य रहेको उनले बताएका छन्। उनले निष्पक्ष र शान्तिपूर्ण निर्वाचन सम्पन्न गर्न कुनै कमजोरी नगर्न निर्देशन दिएका थिए।

स्याङजाका प्रमुख जिल्ला अधिकारी अर्यालले महानिरीक्षकको स्थलगत अनुगमनले जिल्लाको सुरक्षा व्यवस्थापनमा थप ऊर्जा मिलेको प्रतिक्रिया दिएका छन्।

यस क्रममा आईजी अर्यालले स्याङजा वालिङस्थित नं. ३० गुल्म, गल्याङ निर्वाचन सुरक्षा बेस तथा पाल्पास्थित नं. ३५ गुल्मको निरीक्षण गरी सुरक्षा तयारी अवस्थाबारे जानकारी लिएका थिए। पाल्पामा गुल्मपति सशस्त्र प्रहरी नायव उपरीक्षक झुपा कुमारी पन्थीले सुरक्षा तयारीबारे ब्रिफिङ गरेकी थिइन्। त्यहाँ प्रमुख जिल्ला अधिकारी विनु बज्रचार्य कुँवरसहित सुरक्षा समितिका पदाधिकारीहरूसँग जिल्लाको समग्र शान्ति सुरक्षाबारे छलफल गरिएको थियो।

बुधबार आईजी अर्यालले गुल्मी जिल्लामा समेत निर्वाचन तयारी तथा शान्ति सुरक्षाको अवस्थाबारे जानकारी लिएका छन्। साथै उनले लुम्बिनी प्रदेशमा समेत स्थलगत भ्रमण र अनुगमन गर्दै सुरक्षा तयारीको मूल्यांकन गरेका छन्।

यसैबीच, सशस्त्र प्रहरी अतिरिक्त महानिरीक्षक बंशीराज दाहालले सुदूरपश्चिम प्रदेश अन्तर्गत नं. ७ बाहिनी मातहतका विभिन्न युनिटहरूको अनुगमन गरी निर्वाचन सुरक्षाको अवस्थाबारे जानकारी लिएका छन्।

निर्वाचनलाई निष्पक्ष, भयरहित र शान्तिपूर्ण रूपमा सम्पन्न गराउन सशस्त्र प्रहरी बल नेपालले देशव्यापी रूपमा सुरक्षा तयारीलाई तीव्रता दिएको जनाएको छ।

बागलुङ — बागलुङ बजार क्षेत्रमा स्कूल बस दुर्घटना हुँदा २३ जना विद्यार्थी घाइते भएका छन्। बागलुङ नगरपालिका–१ रामरेखादेखि रातामाटातर्फ जाँदै गरेको ‘न्यू एभरेष्ट बोर्डिङ स्कूल’को ग ३ च ८६२१ नम्बरको बस आज दुर्घटनामा परेको हो।

सहायक प्रमुख जिल्ला अधिकारी नवराज बरालका अनुसार दुर्घटनामा घाइते भएका सबै विद्यार्थीलाई उपचारका लागि धौलागिरि अस्पताल लगिएको छ। अस्पताल स्रोतका अनुसार घाइतेमध्ये तीन जनाको अवस्था गम्भीर रहेको छ भने अन्य विद्यार्थीको अवस्था सामान्य रहेको बताइएको छ। गम्भीर घाइतेहरूको चिकित्सकको निगरानीमा उपचार भइरहेको छ।

प्रारम्भिक जानकारीअनुसार बस मध्यपहाडी लोकमार्गबाट करिब ६० मिटर तल खसेको थियो। दुर्घटनालगत्तै स्थानीय बासिन्दा, प्रहरी र उद्धार टोली घटनास्थलमा पुगेर उद्धार कार्य गरेका थिए। घाइते विद्यार्थीहरूलाई तत्कालै एम्बुलेन्स र अन्य सवारी साधनमार्फत अस्पताल पुर्‍याइएको थियो।

दुर्घटनाको कारणबारे भने हालसम्म स्पष्ट भइसकेको छैन। प्रहरी र प्रशासनले घटनाबारे अनुसन्धान सुरु गरिसकेको जनाएको छ। सडकको अवस्था, सवारीको प्राविधिक पक्ष तथा चालकको अवस्था लगायत सबै पक्षबारे अनुसन्धान भइरहेको अधिकारीहरूले बताएका छन्।

यस घटनाले अभिभावक र स्थानीय समुदायलाई चिन्तित बनाएको छ। विद्यालय प्रशासनले पनि घाइते विद्यार्थीहरूको स्वास्थ्य अवस्थाबारे निरन्तर जानकारी लिइरहेको र आवश्यक सहयोग गर्ने जनाएको छ।

प्रहरीले सडकमा सावधानी अपनाउन र सवारी चालकलाई विशेष सतर्कता अपनाउन आग्रह गरेको छ। दुर्घटनाबारे थप विवरण आउन बाँकी रहेको जिल्ला प्रशासन कार्यालयले जनाएको छ।

काठमाडौं: पत्नी हत्या अभियोगमा दोषी ठहर भई कैद भुक्तान गरिरहेका सशस्त्र प्रहरीका पूर्व प्रहरी नायव महानिरीक्षक (डीआईजी) रञ्जन कोइरालाले दायर गरेको बन्दीप्रत्यक्षीकरण रिट सर्वोच्च अदालतले खारेज गरेको छ। सर्वोच्च अदालतको यस निर्णयसँगै कोइरालाले पुनः २० वर्ष कैद भुक्तान गर्नुपर्ने भएको छ।
बुधबार न्यायाधीशद्वय महेश शर्मा पौडेल र बालकृष्ण ढकालको संयुक्त इजलासले कोइरालाले दायर गरेको बन्दीप्रत्यक्षीकरण रिट खारेज गर्ने आदेश दिएको हो। कोइरालाले स्वास्थ्य अवस्था लगायतका कारण देखाउँदै गत मंसिर २६ गते सर्वोच्च अदालतमा रिट दायर गरेका थिए।
यसअघि मंसिर २८ गते न्यायाधीश बालकृष्ण ढकालको एकल इजलासले रिटमाथि प्रारम्भिक सुनुवाइ गर्दै कारण देखाऊ आदेश जारी गरेको थियो। कोइरालाले दायर गरेको रिटमा गृह मन्त्रालय, प्रधानमन्त्री तथा मन्त्रिपरिषद्को कार्यालय, कारागार व्यवस्थापन विभाग तथा जिल्ला प्रशासन कार्यालयलाई विपक्षी बनाइएको थियो।
पूर्वडीआईजी कोइरालालाई २०६८ साल माघ महिनामा आफ्नै पत्नी गीता ढकालको हत्या गरेको अभियोगमा जिल्ला अदालत तथा उच्च अदालतले जन्मकैद अर्थात २० वर्ष कैद सजाय सुनाएका थिए। तर २०७७ साल असारमा तत्कालीन प्रधानन्यायाधीश चोलेन्द्र शमशेर जबरा र न्यायाधीश तेजबहादुर केसीको संयुक्त इजलासले सजाय घटाउने फैसला गरेपछि कोइराला ८ वर्ष ६ महिना कैद भुक्तान गरेर रिहा भएका थिए।
तर पछि सर्वोच्च अदालतले २०७९ जेठ १२ गते उक्त सजाय घटाउने फैसला बदर गर्दै पुनः जन्मकैदको सजाय कायम गरेको थियो। यससँगै कोइरालालाई बाँकी कैद सजाय भुक्तान गर्नुपर्ने अवस्था सिर्जना भएको हो।
कोइरालामाथि महाराजगञ्ज क्षेत्रमा आफ्नै पत्नीको हत्या गरी शव पालुङ क्षेत्रमा लगेर जलाएको आरोप लागेको थियो। उक्त घटनापछि उनलाई २०६८ माघ २८ गते थानकोटबाट पक्राउ गरिएको थियो।
सर्वोच्च अदालतको पछिल्लो आदेशपछि अब कोइरालाले पूर्ण रूपमा २० वर्ष कैद सजाय भुक्तान गर्नुपर्ने कानुनी अवस्था कायम भएको छ।