पर्सा । ईलाका प्रहरी कार्यालय पटेर्वा सुगौलीका प्रहरी निरीक्षक समुन्त अधिकारीको नेतृत्वमा सञ्चालन गरिएको संयुक्त वन संरक्षण अभियानअन्तर्गत करिब २० क्यु फिट सालको अवैध काठ बरामद गरिएको छ।

वन संरक्षण तथा अवैध कटानी नियन्त्रणका लागि गरिएको उक्त अभियानमा सबैया सब डिभिजन वन कार्यालयका रेन्जर भुपाल रोकाय, कविता दास, वन कर्मचारी लक्ष्मी साह कानु, अरविन्द कुमार, प्रहरी चौकी बढनियारका इन्चार्ज असई धर्मराज उप्रेती, सबैया साझेदारी वन उपभोक्ता समूहका उपाध्यक्ष असलम आलम, सदस्य श्रवण प्रसाद साह तथा सशस्त्र प्रहरी बल नेपाल का सई नारायण अधिकारीसहितको टोलीको सहभागिता रहेको थियो।

संयुक्त टोलीले वन क्षेत्रमा हुने अवैध कटानी, चोरी निकासी तथा तस्करी नियन्त्रण गर्न निगरानी कडा पारिएको जनाएको छ। वन ऐनअनुसार वन विनाश तथा अवैध काठ कारोबारमा संलग्नमाथि कडा कानुनी कारबाही हुने व्यवस्था रहेको छ।

सरोकारवालाहरूले वन संरक्षण प्राकृतिक सम्पदा जोगाउने महत्वपूर्ण अभियान भएकाले स्थानीय समुदाय र सुरक्षा निकायबीच सहकार्य आवश्यक रहेको बताएका छन्।

२८ जेठ,वीरगञ्ज । युवा नेता अकलेश साहको विशेष पहलमा पर्साको पकहामैनपुर गाउँपालिका–४ स्थित श्री नेपाल राष्ट्रिय प्राथमिक विद्यालय, श्यामपुर भेलाहामा नयाँ विद्यालय भवन निर्माण कार्य सुरु भएको छ।

मधेश प्रदेश सरकारको शिक्षा मन्त्रालयबाट विनियोजित १६ लाख रुपैयाँ बजेटमार्फत भवन निर्माणको शिलान्यास गरिएको हो।

शिलान्यास कार्यक्रममा वडा नं. ४ का अध्यक्ष ढेडी प्रसाद यादव, विद्यालयका प्रधानाध्यापक उमेश यादव, विद्यालय व्यवस्थापन समितिका अध्यक्ष दिपनारायण ठाकुर, अभिभावक तथा स्थानीयवासीहरूको उल्लेखनीय उपस्थिति रहेको थियो।

कार्यक्रममा वक्ताहरूले नयाँ भवन निर्माणपछि विद्यालयको शैक्षिक वातावरण थप व्यवस्थित, सुरक्षित र विद्यार्थीमैत्री हुने विश्वास व्यक्त गरे। भवन अभावका कारण भोग्नुपरेका समस्याको अन्त्य भई विद्यार्थीहरूले सहज वातावरणमा अध्ययन गर्न पाउने तथा गुणस्तरीय शिक्षामा पहुँच विस्तार हुने अपेक्षा गरिएको छ।

कार्यक्रममा बोल्दै युवा नेता साहले शिक्षा क्षेत्रको विकासलाई आफ्नो प्रमुख प्राथमिकतामा राखेको उल्लेख गर्दै आगामी दिनमा पनि विद्यालय, युवा तथा समुदायको समग्र विकासका लागि निरन्तर पहल गर्ने प्रतिबद्धता व्यक्त गरे। उनले शिक्षा क्षेत्रमा गरिएको लगानीले भविष्यका सक्षम नागरिक निर्माणमा महत्वपूर्ण योगदान पुग्ने बताए।

स्थानीयवासीहरूले प्रदेश सरकार र युवा नेता अकलेश साहप्रति आभार व्यक्त गर्दै निर्माण कार्य समयमै र गुणस्तरीय रूपमा सम्पन्न गर्न सम्बन्धित निकायलाई आग्रह गरेका छन्।

१६ लाख रुपैयाँको लागतमा सुरु गरिएको यो भवन निर्माणलाई स्थानीय तहमा शिक्षा सुधारतर्फको महत्वपूर्ण कदमका रूपमा लिइएको छ।

काठमाडौँ ।

परराष्ट्रमन्त्री शिशिर खनालले नेपाल–भारत सीमा व्यवस्थापनसम्बन्धी संयुक्त कार्य समूह (ज्वाइन्ट वर्किङ ग्रुप अन बोर्डर म्यानेजमेन्ट)को बैठक आगामी अगस्ट २०२६ मा आयोजना हुने जानकारी दिनुभएको छ । प्रतिनिधि सभाको बुधवारको बैठकमा प्रधानमन्त्री बालेन्द्र साहको तर्फबाट स्पष्टिरकण दिँदै उहाँले यस्तो बताउनुभएको हो । उहाँले नेपाल र भारतबीचको समन्वय, सहकार्य तथा साझेदारीलाई थप प्रभावकारी बनाउन स्थापित विभिन्न द्विपक्षीय संयन्त्रहरूलाई पुनः सक्रिय बनाइएको बताउनु भयो ।

ती संयन्त्रहरूको नियमित बैठकले द्विपक्षीय सम्बन्धलाई थप सुदृढ बनाउन तथा साझा सम्भावना र सहकार्यका विषयमा छलफल गर्न महत्वपूर्ण भुमिका मन्त्री खनालको विश्वास छ । उहाँले नेपाल–भारत सीमा क्षेत्रमा हराएका सीमा स्तम्भहरूको मर्मत, पुनस्र्थापना तथा पुनर्निर्माणको काम अघि बढिरहेको जानकारी पनि दिनुभयो । उहाँले हाल संयुक्त फिल्ड सर्वे टोलीले विभिन्न स्थानमा स्थलगत काम गरिरहेको र यसका लागि चारवटा छुट्टाछुट्टै टोली परिचालन गरिएको बताउनु भयो । उहाँले क्रस बोर्डर अकुपेशनसहितका विभिन्न विषयमा नेपाल र भारत दुवैतिरका सयन्त्रहरुले काम गरिरहेको बताउनु भयो ।

सरकारी सूचना तथा विज्ञापन वितरणमा देखिएको विभेदकारी र स्वेच्छाचारी निर्णयको विरोधमा पर्साका सञ्चारकर्मीहरूले जिल्ला प्रशासन कार्यालय पर्साअगाडि एक घण्टा धर्ना दिएका छन्। नेपाल पत्रकार महासंघको आह्वानमा बिहान ११ बजेदेखि १२ बजेसम्म भएको धर्नापछि सञ्चारकर्मीहरूले सरकारको हालको नीति प्रेस स्वतन्त्रताविरुद्ध रहेको आरोप लगाएका हुन्।

सञ्चारकर्मीहरूले सरकारी सूचना तथा विज्ञापन वितरणमा समान व्यवहार नभएको भन्दै तत्काल नीति सच्याउन सरकारसँग माग गरेका छन्। उनीहरूले प्रेस तथा अभिव्यक्ति स्वतन्त्रता संविधानद्वारा प्रत्याभूत मौलिक अधिकार भएकाले त्यसमा कुनै पनि प्रकारको हस्तक्षेप स्वीकार्य नहुने चेतावनीसमेत दिएका छन्।

कार्यक्रमलाई सम्बोधन गर्दै नेपाल पत्रकार महासंघ मधेश प्रदेशका अध्यक्ष श्याम बञ्जाराले सरकारी सञ्चारमाध्यमलाई मात्र विज्ञापन दिने निर्णयविरुद्ध आन्दोलन जारी रहने बताए। उनले सरकार निर्णय सच्याउन तयार नभएसम्म संघर्ष निरन्तर रहने चेतावनी दिए।

त्यसैगरी नेपाल पत्रकार महासंघ पर्साका अध्यक्ष ओमप्रकाश खनालले सरकार निरंकुशतातर्फ उन्मुख भएको आरोप लगाए। उनले २०६० सालमा तत्कालीन राजाले मिडियालाई पहिलो निशाना बनाएको स्मरण गर्दै अहिलेको सरकारले पनि त्यही प्रवृत्ति दोहोर्याउने प्रयास गरेको टिप्पणी गरे।

धर्नामा प्रेस सेन्टर नेपाल पर्सा, प्रेस चौतारी पर्सा, समाजवादी प्रेस संगठन मधेश तथा विभिन्न सञ्चारमाध्यमका प्रतिनिधिहरूको सहभागिता रहेको थियो। सहभागीहरूले सूचना तथा विज्ञापन वितरणमा देखिएको विभेद अन्त्य गर्न, प्रेस स्वतन्त्रताको सम्मान गर्न र सञ्चारमाध्यमप्रति समान व्यवहार गर्न सरकारसँग माग गरेका छन्।