काठमाडौँ – जल तथा मौसम विज्ञान विभागले देशका चारवटा प्रदेशमा तीव्र गतिको हावाहुरी चल्ने सम्भावना रहेको भन्दै विशेष सतर्कता अपनाउन आग्रह गरेको छ ।

विभागका अनुसार बिहीबार साँझ ५:४५ देखि शुक्रबार बिहान ७:४५ सम्म कोशी, मधेश, लुम्बिनी र सुदूरपश्चिम प्रदेशका जिल्लामा तीव्र गतिको हावाहुरी चल्ने सम्भावना छ ।

हावाहुरीका कारण हुनसक्ने सम्भावित क्षतिलाई मध्यनजर गर्दै विभागले पूर्वतयारी र सावधानी अपनाउन सर्वसाधारणलाई सूचित गरेको हो । मौसम विभागले विशेष बुलेटिन सार्वजनिक गर्दै सचेत हुन अनुरोध गरेको छ ।

आज दिउँसो कोशी, मधेस, बागमती, गण्डकी र लुम्बिनी प्रदेशलगायत कर्णाली र सुदूरपश्चिम प्रदेशको पहाडी र हिमाली भूभागमा बादल लाग्नेछ । कोशी, मधेस, बागमती, गण्डकी र लुम्बिनी प्रदेशका धेरै स्थान तथा कर्णाली र सुदूरपश्चिम प्रदेशको केही स्थानमा चट्याङ्गसहित मध्यमसम्मको वर्षा र हिमपातको सम्भावना रहेको छ ।

काठमाडौँ – आईसीसी विश्वकप लिग–२ अन्तर्गत अहिले जारी हुने खेलमा ओमानले टस जितेर नेपालविरुद्ध पहिले ब्याटिङ गर्ने निर्णय गरेको छ । ओमानका कप्तानले टस जित्दै ब्याटिङ रोजेपछि नेपालले सुरुमा बलिङको निम्तो पाएको हो ।

आजको खेलका लागि नेपाली टोलीमा एक परिवर्तन गरिएको छ । अघिल्लो खेलमा खेलेका स्पिनर ललित नारायण राजवंशीको स्थानमा अलराउन्डर गुल्सन झालाई प्लेइङ–११ मा समावेश गरिएको हो । तीव्र गतिको बलिङसँगै ब्याटिङमा सम्भावना भएकाले नेपालले गुल्सनलाई मैदान उतारेको हो ।

 घरेलु मैदानमा नेपाल आज ओमानलाई न्यून स्कोरमा रोक्दै लिग–२ को तालिकामा आफ्नो स्थिति सुधार गर्ने लक्ष्यका साथ मैदानमा हुनेछ ।

पुरानो प्रतिद्वन्द्वी ओमान

लिग–२ को अघिल्लो चक्रमा सन् २०२० फेब्रुअरीमा ओमानले नेपाल भ्रमण गर्दा नेपाली टोलीको स्वरूप निकै फरक थियो । त्यतिबेला ज्ञानेन्द्र मल्लको कप्तानीमा रहेको नेपालविरुद्ध ओमानले कीर्तिपुरमा ‘क्लिन स्विप’ गरेको थियो । संयोगवश, सोही शृङ्खला नै नेपालको घरेलु मैदानमा खेलिएको पहिलो एकदिवसीय अन्तर्राष्ट्रिय खेल थियो ।

चार वर्षअघिको त्यो टोलीका दीपेन्द्रसिंह ऐरी, रोहित पौडेल, आरिफ शेख, करण केसी, सन्दीप लामिछाने र विनोद भण्डारी अहिले पनि टोलीमा छन् । तर, ओपनरद्वय कुशल भुर्तेल र आसिफ शेखले त्यतिबेला डेब्यु गरेका थिएनन् । अहिले नेपाली टोलीको कमान रोहित पौडेलको हातमा छ भने ओमानको नेतृत्व जतिन्दर सिंहले गरिरहेका छन् ।

लिग २ मा नेपाल अहिले २१ खेलबाट १४ अंकसहित तालिकाको सातौँ स्थानमा छ । शीर्ष चारभित्र रहँदै एकदिवसीय विश्वकप छनोटमा पुग्न नेपाललाई बाँकी रहेका १५ खेलमध्ये करिब १२ खेल जित्नुपर्ने दबाब छ । कप्तान रोहित पौडेलले ब्याटिङमा सुधार गर्नुपर्नेमा जोड दिएका छन् ।

पहिलो खेलमा यूएईविरुद्ध २०० रन मात्र बनाएको नेपालका लागि ओपनिङ जोडी आसिफ र कुशलको प्रदर्शन निर्णायक हुने देखिएको छ । विशेष गरी घरेलु क्रिकेटमा लयमा देखिएका आसिफबाट टोलीले ठूलो इनिङ्सको अपेक्षा गरेको छ । ओमानका बिलाल खान र कलिमुल्लाहको बलिङ अट्याक नेपालका लागि मुख्य चुनौती बन्न सक्छन् ।

ओमान २५ खेलमा २९ अंक जोडेर तालिकाको तेस्रो स्थानमा छ । घरेलु मैदान र दर्शकको साथ पाउँदै आएको नेपाल ओमानसँगको पुरानो हिसाब चुक्ता गर्ने दाउमा हुनेछ ।

१६ बैशाख, काठमाडौँ । सरकारले संवैधानिक परिषद् सम्बन्धी र सहकारी सम्बन्धी अध्यादेश जारी गर्न राष्ट्रपति रामचन्द्र पौडेललाई सिफारिस गरेपछि त्यसबारे धारणा तय गर्न प्रमुख प्रतिपक्षी दल नेपाली कांग्रेसले विपक्षी दलहरूको बैठक बोलाएको छ।

कांग्रेस संसदीय दलका नेता भीष्मराज आङदेम्बेले दिउँसो १२ बजे सिंहदरबार स्थित कांग्रेस संसदीय दलको कार्यालयमा बैठक बोलाएको उनका स्वकीय सचिव एम ढुङ्गानाले जानकारी दिए । ढुङ्गानाका अनुसार विपक्षी दलहरू नेकपा एमाले, नेपाली कम्युनिस्ट पार्टी, राष्ट्रिय प्रजातन्त्र पार्टी र श्रम संस्कृति पार्टीलाई बोलाइएको छ।

गत सोमबार बसेको मन्त्रिपरिषद् बैठकले दुई अध्यादेश जारी गर्नका लागि राष्ट्रपति रामचन्द्र पौडेल समक्ष सिफारिस गरेको थियो। राष्ट्रपति कार्यालयले भने अध्यादेश अध्ययनका क्रममा रहेका बताएको छ।

१६ बैशाख, काठमाडौँ । नेपालको कूटनीतिक इतिहासमा लामो समयदेखि आलोचित बन्दै आएको ‘राजदूत नियुक्ति’ प्रक्रियामा अब आमूल परिवर्तन हुने भएको छ। सरकारले परम्परागत राजनीतिक भागबन्डा र आन्तरिक बढुवाको चक्रलाई तोड्दै पहिलोपटक ‘खुला प्रतिस्पर्धा’ को माध्यमबाट राजदूत नियुक्त गर्ने तयारी थालेको छ।

हालसम्म परराष्ट्र मन्त्रालयका वरिष्ठ कर्मचारी र राजनीतिक दलहरूको सिफारिस (कोटा) का आधारमा मात्र राजदूत नियुक्त हुँदै आएका थिए। तर, वर्तमान सरकारले यो परिपाटीमा सुधार गर्दै योग्य र सक्षम व्यक्तिलाई कूटनीतिक नियोगको नेतृत्व सुम्पिने उद्देश्यले खुला प्रतिस्पर्धाको अवधारणा अघि सारेको हो।

परराष्ट्र मन्त्री शिशिर खनालको सचिवालयका अनुसार, यस प्रक्रियाका लागि प्रधानमन्त्रीको समेत सहमति जुटिसकेको छ। “हामीले कूटनीतिक सेवालाई थप व्यावसायिक र प्रतिस्पर्धी बनाउन चाहेका छौँ, त्यसैले केही निश्चित पदमा खुला प्रतिस्पर्धाबाटै राजदूत छनोट गर्ने निर्णयमा पुगेका छौँ,” मन्त्रालय स्रोतले भन्यो। स्रोतका अनुसार, अर्को हप्ताभित्रै यसबारे औपचारिक विज्ञापन आह्वान गर्ने मन्त्रालयको तयारी छ।

नेपालका हाल ४४ वटा विदेशस्थित नियोगहरू (३४ दूतावास र १० वाणिज्य दूतावास) मध्ये १७ वटामा राजदूत पद रिक्त छन्। विगतमा केपी शर्मा ओली नेतृत्वको सरकारले नियुक्त गरेका राजदूतहरूलाई ‘जेनजी आन्दोलन’ पछिको सुशीला कार्की नेतृत्वको सरकार र २१ फागुनको निर्वाचनपछि बनेको बालेन शाह नेतृत्वको वर्तमान सरकारले फिर्ता बोलाउने निर्णय गरेसँगै यी पदहरू खाली भएका हुन्।

यसका अतिरिक्त, आगामी जुलाई महिनाको अन्त्यसम्ममा ब्राजिल, बहराइन, बंगलादेश, म्यानमार, अष्ट्रिया, ओमान र इजिप्टस्थित राजदूतहरूको कार्यकाल पनि सकिँदैछ। यसरी केही महिनाभित्रै २४ वटा राजदूत पदका लागि नियुक्ति प्रक्रिया अघि बढाउनुपर्ने भएकाले सरकारले यसपटक ठूलो संख्यामा खुला प्रतिस्पर्धाबाट योग्य उम्मेदवार छनोट गर्ने अवसर पाएको छ।

राजदूत नियुक्तिसम्बन्धी निर्देशिका, २०७५ ले कुल राजदूत पदमध्ये ५० प्रतिशत क्यारियर (परराष्ट्र मन्त्रालयका कर्मचारी) र ५० प्रतिशत राजनीतिक नियुक्तिबाट पूर्ति गर्ने व्यवस्था गरेको छ। सरकारको यो ‘खुला प्रतिस्पर्धा’ को अवधारणालाई उक्त निर्देशिकासँग कसरी तालमेल गराइन्छ भन्ने विषय चासोको रूपमा हेरिएको छ।

कूटनीतिक मामिलाका जानकारहरूले सरकारको यो कदमलाई ‘कूटनीतिक सुधारको साहसी प्रयास’ का रूपमा व्याख्या गरेका छन्। यदि प्रक्रिया पारदर्शी र निष्पक्ष ढङ्गले अघि बढ्यो भने यसले नेपालको अन्तर्राष्ट्रिय सम्बन्ध र विदेश नीतिलाई नयाँ उचाइमा पुर्‍याउने अपेक्षा गरिएको छ। तर, राजनीतिक दबाबलाई पन्छाउँदै सरकारले कस्तो मापदण्ड तय गर्छ, त्यसैमा यो प्रयासको सफलता निर्भर रहनेछ।