काठमाडौँ। सिंहदरबार परिसरभित्र संयुक्त राष्ट्र विकास कार्यक्रम (यूएनडीपी) को गाडीले राष्ट्रिय स्वतन्त्र पार्टी (रास्वपा) का सांसदको गाडीलाई ठक्कर दिएको छ।

सिंहदरबारस्थित विज्ञान तथा प्रविधि मन्त्रालय अगाडि उक्त दुर्घटना भएको हो। यूएनडीपीको ६६–१–००१२ नम्बरको गाडीले रास्वपा सांसद नितिमा कार्की भण्डारीले प्रयोग गर्दै आएको बागमती प्रदेश ०१ ०२८ च ९००९ नम्बरको गाडीलाई ठक्कर दिएको प्रहरीले जनाएको छ।

घटनापछि ट्राफिक प्रहरी टोली स्थलगत रूपमा खटिएको छ। दुर्घटनाको कारण र क्षतिबारे थप अनुसन्धान तथा वस्तुस्थिति बुझ्ने काम भइरहेको ट्राफिक प्रहरीले जनाएको छ।

हरिकिशोर शर्मा

पर्सा , ३१ भदौ

पर्साको वीरगञ्ज महानगरपालिका–१७ अलौबाट सशस्त्र प्रहरीले लागूऔषध चरेसजस्तो देखिने पदार्थसहित एक जना भारतीय नागरिकलाई पक्राउ गरेको छ।

सशस्त्र प्रहरी बल, नेपाल सीमा सुरक्षा गुल्म अलौबाट खटिएको गाडी मोबाइल टोलीले शंकास्पद रूपमा आउँदै गरेको भारतीय नम्बर प्लेटको मोटरसाइकललाई रोकेर जाँच गर्ने क्रममा लागूऔषध बरामद गरेको हो।

प्रहरीका अनुसार मोटरसाइकलको ट्याङ्कीभित्र फल्स बटम बनाएर लुकाइराखिएको अवस्थामा अन्दाजी ९.५ किलोग्राम चरेसजस्तो देखिने पदार्थ फेला परेको थियो। उक्त पदार्थ २१ वटा पोकामा प्याक गरी राखिएको अवस्थामा बरामद भएको सशस्त्र प्रहरीले जनाएको छ।

घटनास्थलबाट एक थान मोबाइल र लागूऔषध ओसारपसारमा प्रयोग भएको मोटरसाइकलसमेत नियन्त्रणमा लिइएको छ।

पक्राउ परेका भारतीय नागरिक, बरामद पदार्थ, मोटरसाइकल तथा अन्य सामग्रीलाई आवश्यक अनुसन्धान तथा कानुनी कारबाहीका लागि वडा प्रहरी कार्यालय श्रीपुर, पर्सामा बुझाइएको सशस्त्र प्रहरीले जनाएको छ। बरामद पदार्थको वास्तविक प्रकृति तथा घटनासम्बन्धी थप विवरण अनुसन्धानपछि खुल्ने प्रहरीले जनाएको छ।

परवानीपुर,३० भदौ /

बाराको जितपुरसिमरा उपमहानगरपालिका–२३ भलुहीस्थित सागर आयल पेट्रोल पम्प नजिकै गएराति भएको सवारी दुर्घटनामा परी दुई जनाको मृत्यु भएको छ ।

वीरगंज–पथलैया सडकखण्डमा ना ३ ख ५६१० नम्बरको एलपी ग्यास बोकेको ट्रकले ना ४३ प ५१२२ नम्बरको मोटरसाइकललाई ठक्कर दिँदा दुई जनाको मृत्यु भएको हो ।

मंगलबार राति करिब ८:३० बजे ऐरोटेक ग्यास कम्पनीबाट निस्किएर सर्भिस लेनबाट एक्सप्रेस-वेतर्फ प्रवेश गर्दै गरेको ट्रकले जितपुरबाट वीरगांजतर्फ जाँदै गरेको मोटरसाइकललाई ठक्कर दिएको थियो । दुर्घटनामा गम्भीर घाइते भएका दुवै जनालाई तत्काल उपचारका लागि नारायणी अस्पताल वीरगंजमा पठाइएकोमा चिकित्सकले जाँच गर्दा राति ९:१० बजे दुवैलाई मृत घोषित गरेका हुन् ।

मृतकहरूमा पर्साको वीरगंज–१६ नगवा बस्ने ३५ वर्षीय रवीन्द्र उपाध्याय र बाराको करैयामाई गाउँपालिका–७ का ३० वर्षीय दिलीप चौधरी रहेका छन् । उनीहरूमध्ये मोटरसाइकल चालकको थिए भन्नेबारे अनुसन्धान भइरहेको प्रहरीले जनाएको छ ।

घटना लगत्तै इलाका प्रहरी कार्यालय जितपुरबाट प्रहरी नायब निरीक्षक उमेश निरौला र इलाका प्रहरी कार्यालय सिमराबाट प्रहरी निरीक्षक विनोदराज खत्रीको कमाण्डमा प्राविधिकसहितको टोली खटिएर घटनास्थलको अनुसन्धान गरेको थियो ।

दुर्घटनामा संलग्न रहेकोे ट्रक र चितवन,भरतपुर-७ बस्ने ५८ वर्षीय चालक सुनिलराज पाठकलाई प्रहरीले नियन्त्रणमा लिएका छ । चालक र ट्रक इलाका प्रहरी कार्यालय सिमराको नियन्त्रणमा छ। मोटरसाइकल इलाका प्रहरी कार्यालय जितपुरको नियन्त्रणमा रहेको प्रहरीले जानकारी गराएको छ । मृतक दुवैको शव परीक्षणका लागि नारायणी अस्पतालमै राखिएको प्रहरीले जनाएको‌ छ ।

काठमाडौं,३०भदाैं:काठमाडौंबाट वीरगन्ज आउँदै गरेको इभी माइक्रो दुर्घटना हुँदा चार जनाको मृत्यु भएको छ । मधेस प्रदेश ०३००१ ज ०७२० नम्बरको इभी माइक्रो मकवानपुरको इन्द्रसरोवर गाउँपालिका– २ सुकौरामा मंगलबार दिउँसो दुर्घटना भएको हो।

दुर्घटनामा अन्य तीन जना गम्भीर र एकजना सामान्य घाइते भएका छन्।

प्रहरीका अनुसार माइक्रो सडकबाट करिब पाँच सय मिटर तल खसेको हाे ।

इलाका प्रहरी कार्यालय भीमफेदीका अनुसार, माइक्रोमा ८ जना सवारमध्ये चार जनाको घटनास्थलमै मृत्यु भएको र बाँकी चार जनालाई उद्धार गरिएको छ ।

उद्धार गरिएका १ जनालाई हेटौंडा अस्पताल पठाइएको छ भने बाँकीलाई काठमाडौंतर्फबाट लगिएको मकवानपुरका प्रहरी उपरीक्षक श्याम खत्रीले बताए।

दुर्घटनाको थप विवरण तथा मृतक र घाइतेको पहिचान खुल्न बाँकी रहेको छ ।