चितवन , भदौ २६ –

भरतपुर महानगरपालिका–९ स्थित पूर्व–पश्चिम राजमार्गमा कारमा आगलागी हुँदा नारायणी विद्या मन्दिर शिवाघाटका पूर्वसञ्चालक अमर पराजुलीको मृत्यु भएको छ ।

बा.प्र.०१–०३० च ५५७९ नम्बरको कारमा आज बिहान अचानक आगलागी हुँदा कारभित्र रहेका पराजुलीको घटनास्थलमै मृत्यु भएको जिल्ला प्रहरी कार्यालय चितवनले जनाएको छ ।

आगलागीबाट कार पूर्ण रूपमा जलेर नष्ट भएको छ । दमकलको सहयोगमा आगो नियन्त्रणमा लिइएको प्रहरीले जनाएको छ । शरीर पूर्ण रूपमा जलेका कारण सुरुमा मृतकको पहिचान खुल्न सकेको थिएन ।

आगलागीको कारण भने खुल्न सकेको छैन । घटनाबारे प्रहरीले थप अनुसन्धान गरिरहेको जनाएको छ ।

हरि किशोर शर्मा

पर्सा , २६ भदौ

पर्साको जिराभवानी गाउँपालिकामा बाघको आक्रमणबाट एक वृद्धको मृत्यु भएको छ।

जिराभवानी गाउँपालिका–२ काठमाडौं टोलका ७० वर्षीय नथुनी मिर्दाहा थारूको बाघको आक्रमणबाट मृत्यु भएको इलाका प्रहरी कार्यालय पटेर्वा सुगौलीका प्रहरी निरीक्षक सम्मुन्नत अधिकारीले जानकारी दिनुभयो।

प्रहरीका अनुसार थारू बुधबार बिहान करिब १० बजे घरबाट घाँस काट्न जंगलतर्फ गएका थिए। अबेरसम्म घर नफर्किएपछि परिवार तथा आफन्तले खोजी सुरु गरेका थिए।

खोजी गर्ने क्रममा बिहीबार बिहान सब–डिभिजन वन कार्यालय बसन्तपुरबाट करिब ५०० मिटर भित्र जंगलमा बाघले आक्रमण गरी मारेको अवस्थामा थारूको शव फेला परेको प्रहरीले जनाएको छ।

घटनापछि स्थानीयवासीमा त्रास फैलिएको छ। जंगल क्षेत्रमा बाघको गतिविधि बढेकाले स्थानीयलाई थप सतर्क रहन आग्रह गरिएको छ।

मृतक थारूको शव पोस्टमार्टमका लागि वीरगन्जस्थित नारायणी अस्पताल पठाउने तयारी भइरहेको जिल्ला प्रहरी कार्यालय पर्साले जनाएको छ।

वीरगंज , भदौ २५ –

वीरगंज महानगरपालिका–१५ भेडियाहीमा रोकिएको यातायात व्यवस्था कार्यालयको भवन निर्माण कार्य छिट्टै अघि बढाइने भएको छ।

श्रम तथा यातायात मन्त्री शारदा देवी थापाको उपस्थितिमा जिल्ला समन्वय समिति पर्सामा भएको छलफलमा रोकिएको निर्माण कार्य तत्काल अघि बढाउने र सम्बन्धित निकायबीच आवश्यक समन्वय गर्ने सहमति भएको हो।

बैठकमा मन्त्रालयका सचिव निरञ्जन साह, जिल्ला समन्वय समिति पर्साका उपसभापति पुरणप्रसाद कुर्मी, यातायात व्यवस्था कार्यालयका प्रमुख कुसेश्वर साहलगायतको उपस्थिति रहेको थियो। निर्माण कार्यलाई प्रभावकारी रूपमा अघि बढाउन जिल्ला समन्वय समितिले पहल गर्ने विषयमा समेत छलफल भएको थियो।

भवन निर्माण सम्पन्न नभएसम्म यातायात व्यवस्था कार्यालय प्रतिमा चोकबाट जिल्ला समन्वय समितिको पुरानो भवनमा सञ्चालन गर्ने विषयमा यसअघि नै सहमति भइसकेको जिल्ला समन्वय समिति पर्साका अध्यक्ष अजय सर्राफले बताएका छन्। मन्त्री थापाले भवन निर्माणका लागि आवश्यक समन्वय गरी काम छिट्टै अघि बढाउने प्रतिबद्धता जनाएकी छन्।

बारा । बाराको कलैया उपमहानगरपालिका-२३ स्थित कलैया–वीरगञ्ज सडकखण्डमा सुमोको ठक्करबाट एक अज्ञात युवक पैदलयात्रीको मृत्यु भएको छ।

बिहिवार राति करिब ९ः१० बजे गार्डेन भ्यु रिसोर्ट नजिकै वीरगञ्जबाट कलैयातर्फ आउँदै गरेको ना.१ ज ६४०३ नम्बरको सुमोले पैदल हिँडिरहेका करिब २२/२३ वर्षीय युवकलाई ठक्कर दिएको प्रहरीले जनाएको छ।

दुर्घटनामा घाइते भएका उनलाई तत्काल उद्धार गरी प्रादेशिक अस्पताल कलैया लगिएको थियो। त्यहाँबाट थप उपचारका लागि परवानीपुरस्थित एलएस न्युरो अस्पताल पठाइएकोमा राति १०ः३५ बजे उपचारका क्रममा उनको मृत्यु भएको जिल्ला प्रहरी कार्यालय बाराका प्रवक्ता एवम् प्रहरी नायव उपरीक्षक मीन बहादुर घलेले जानकारी दिए । उनका अनुसार मृतकको शव हाल एलएस न्युरो अस्पतालमै रहेको छ। साथै दुर्घटनामा संलग्न सुमो र चालक प्रहरीको नियन्त्रणमा छन्।

प्रवक्ता घलेका अनुसार मृतकको हालसम्म पहिचान खुल्न सकेको छैन। मृतकको हुलिया उचाइ करिब ५ फिट ६ इन्च, पातलो शरीर, दायाँ हातमा बाला लगाएको, कालो भेस्ट र निलो पाइन्ट लगाएको, उमेर करिब २२/२३ वर्ष रहेको छ।

मृतकलाई चिन्नुहुने वा उनका आफन्तजनलाई जिल्ला प्रहरी कार्यालय बाराको ९८५५०४८१०१, ९८५५०४५१०१ र ९८५५०४५७६६ नम्बरमा वा नजिकको प्रहरी कार्यालयमा सम्पर्क गर्न प्रहरीले अनुरोध गरेको छ।