८ असोज, चितवन । नारायणी नदीमा तीव्र कटान बढेपछि नारायणगढ बजारसहित पश्चिम चितवन जोखिममा परेको छ ।

लगातारको भारी वर्षासँगै नारायणी र त्रिशूली नदी तटीय क्षेत्रमा बाढी तथा कटानको खतरा बढेको हो । भरतपुर महानगरपालिका–१ स्थित गौरेश्वर मन्दिर र नारायणी लिफ्ट सिँचाइ पम्प परिसरमा कटान तीव्र बनेको छ ।

कटान नियन्त्रणका लागि प्रशासन, सुरक्षा निकाय र स्थानीयवासी परिचालित भएका छन् । बोरा र तारजाली प्रयोग गरी अस्थायी तटबन्ध निर्माणको काम भइरहेको छ ।

जिल्ला विपद् व्यवस्थापन समितिका अध्यक्ष एवं प्रमुख जिल्ला अधिकारी गणेश अर्यालले सर्वसाधारणलाई उच्च सतर्कता अपनाउन आग्रह गर्नुभएको छ । उहाँले अत्यावश्यक कामबाहेक लामो दूरीको यात्रा नगर्न र विशेषगरी रातिको यात्रा रोक्न अपिल गर्नुभएको छ । यात्रा गर्नैपर्ने अवस्थामा खानेपानी, सुक्खा खाना र अतिरिक्त कपडा साथमा राख्न सुझाव दिइएको छ ।

नदी किनारका बासिन्दालाई सुरक्षित स्थानमा सर्न पनि प्रशासनले आग्रह गरेको छ । कटानग्रस्त क्षेत्रको अनुगमन गर्दै बागमती प्रदेशका पूर्वसामाजिक विकासमन्त्री विजय सुवेदीले कटान नरोकिए नारायणीको पानी नारायणगढ बजारमा पस्न सक्ने चेतावनी दिनुभएको छ। उहाँले तटबन्ध आयोजनाको दोस्रो चरणको टेन्डरमा भएको ढिलाइले समस्या जटिल बनेको बताउनुभयो । तत्काल बोरा र तारजालीबाट कटान रोक्न तथा दीर्घकालीन समाधानका लागि हिउँदमा प्राविधिक अध्ययनसहित स्पर निर्माण गर्नुपर्ने उहाँको भनाइ छ ।

स्थानीय सामाजिक व्यक्तित्व शैलेन्द्र पियाले कटान नियन्त्रणमा दीर्घकालीन योजना नहुँदा समस्या दोहोरिएको बताउनुभएको छ । दुई वर्षअघि निर्माण गरिएको तटबन्धसमेत भत्किएको उल्लेख गर्दै उहाँले यो समग्र भरतपुर र पश्चिम चितवनको सुरक्षासँग जोडिएको विषय भएको बताउनुभयो ।

सम्भावित बाढी र पहिरोको जोखिमलाई ध्यानमा राख्दै सुरक्षा निकायलाई तयारी अवस्थामा राखिएको छ । अवस्था गम्भीर बने रात्रिकालीन यातायात, विद्यालय तथा कलकारखाना सञ्चालनमा रोक लगाउन सकिने प्रशासनले जनाएको छ ।

काठमाडौं। डोल्पाको जुफाल विमानस्थलमा सीता एयरको जहाज अवतरण गर्ने क्रममा दुर्घटना भएको छ।

नेपालगन्जबाट उडान भरेको सीता एयरको ‘९एन–एजे’ कलसाइन भएको जहाज आज बिहान ८:२५ बजे अवतरणका क्रममा रनवेमा दुर्घटनामा परेको जिल्ला प्रहरी कार्यालय डोल्पाले जनाएको छ।

जिल्ला प्रहरी कार्यालय डोल्पाका प्रवक्ता प्रहरी निरीक्षक पदम रावलका अनुसार, अवतरणका क्रममा जहाजको पछाडिपट्टिको दायाँ चक्का फुस्किएपछि दुर्घटना भएको हो। चक्का बाहिर निस्किएलगत्तै जहाज केही परसम्म उछिट्टिएको थियो।

दुर्घटनालगत्तै पाइलटले होसियारी अपनाउँदै तत्काल इन्जिन बन्द गरेपछि जहाजमा सम्भावित आगलागी हुनबाट जोगिएको छ। दुर्घटनाका कारण जहाज अहिले पनि रनवेमै रोकिएको छ।

प्रहरीका अनुसार, यस घटनामा कुनै पनि किसिमको मानवीय क्षति भने भएको छैन।

रौतहट, ७ असोज । रौतहटको परोहा नपा –८ मोतिपुर स्थित पटेल चौकबाट एक जना भारतीय नागरिकलाई अवैध हतियारसहित पक्राउ गरिएको छ।

पक्राउ पर्नेमा भारतको बिहार राज्य, मोतिहारी जिल्ला, सन्तपुर निवासी गम्भीरा दासको ३५ वर्षीय गोविन्दा दास रहेको प्रहरीले जनाएको छ।

प्रहरी चौकी मोतिपुर तथा सशस्त्र प्रहरी बल नेपाल, बोर्डर आउट पोस्ट (बीओपी) सरमुजवाको संयुक्त टोलीले विशेष सूचनाका आधारमा गरेको निगरानी तथा चेकजाँचका क्रममा दासलाई एक थान कटुवा पेस्तोल सहित नियन्त्रणमा लिएको हो।

सीमावर्ती क्षेत्रमा सुरक्षा निगरानीलाई थप कडाइ गरिरहेको अवस्थामा हतियारसहित भारतीय नागरिक पक्राउ परेपछि घटनालाई सुरक्षा निकायले गम्भीर रूपमा लिएको जनाएको छ। पक्राउ परेका दासलाई आवश्यक अनुसन्धान तथा कानुनी कारबाहीका लागि प्रहरीको नियन्त्रणमा राखिएको छ।

घटनाबारे थप अनुसन्धान भइरहेको र हतियारको स्रोत, उद्देश्य तथा यसमा अन्य व्यक्तिको संलग्नता भए–नभएको विषयमा समेत अनुसन्धान अगाडि बढाइएको सम्बन्धित सुरक्षा निकायले जनाएको छ।

वीरगंज,०६ असाेज । वीरगंज महानगरपालिका–२० अपौनीमा अतिक्रमण गरी बनाइएका घर तथा टहरा हटाएर सार्वजनिक जग्गा खाली गराइएको छ। सार्वजनिक जग्गा खाली भएसँगै लामो समयदेखि रोकिएको करिब ८४ करोड रुपैयाँको विकास योजना अघि बढ्ने भएको छ।

महानगरपालिकाका अनुसार नगर प्रमुख राजेशमान सिंहको निर्देशनमा मंगलबार भौतिक अतिक्रमण नियन्त्रण समितिका संयोजक एवं वडा नम्बर ५ का अध्यक्ष प्रदीपकुमार चौरसियाको नेतृत्वमा नेपाल प्रहरी र नगर प्रहरीको संयुक्त टोलीले अतिक्रमण हटाएको हो।

स्थानीय हृदयनारायण सिंह, लक्ष्मण पण्डित, रमेश सिंह, कृपानारायण सिंह र नन्दकिशोर पुरीलगायतले सार्वजनिक जग्गा अतिक्रमण गरी निर्माण गरेका संरचना हटाइएको महानगरपालिकाले जनाएको छ।

अतिक्रमणका कारण विगत करिब ६ वर्षदेखि विकास योजना कार्यान्वयन हुन सकेको थिएन। उक्त योजनाको ठेक्का ‘स्वच्छन्द निर्माण सेवा’ले पाएको भए पनि निर्माणस्थल खाली हुन नसक्दा काम अघि बढ्न सकेको थिएन।

अब सार्वजनिक जग्गा खाली भएपछि रोकिएको विकास निर्माणको काम सुरु गर्ने बाटो खुलेको महानगरपालिकाले जनाएको छ। लामो समयदेखि रोकिएको योजना अघि बढ्ने भएपछि स्थानीयवासीले महानगरपालिकाको पछिल्लो कदमको स्वागत गरेका छन्।