बिरगंज, पर्सा, २१ कार्तिक
काठमाडौं । राष्ट्रिय स्वतन्त्र पार्टी (रास्वपा) का सांसद राजीव खत्रीले सरकारको प्रस्तावित अध्यादेश रोक्न राष्ट्रपति समक्ष आग्रह गर्ने पत्रकारहरूमाथि टिप्पणी गरेका छन्।
सांसद खत्रीले निष्पक्ष पत्रकारिता गर्ने पत्रकारले प्रस्तावित अध्यादेश रोकिदिन राष्ट्रपतिसमक्ष पुगेर विन्ती गर्नुपर्ने अवस्था नरहेको बताएका छन्। उनले वीरेन्द्र जैरु, युवराज कँडेल र अपिल त्रिपाठीलगायत पत्रकारलाई लक्षित गर्दै उनीहरूले प्रस्तावित अध्यादेशले अभिव्यक्ति स्वतन्त्रता कुण्ठित गर्छ भन्ने महसुस नगरेको हुन सक्ने टिप्पणी गरेका छन्।
सामाजिक सञ्जालमार्फत आफ्नो धारणा सार्वजनिक गर्दै खत्रीले पत्रकारिताको आवरणमा पार्टीकारिता गर्नेहरूले राष्ट्रपतिलाई भेटेर अध्यादेश रोक्न आग्रह गरेको आरोप लगाएका छन्।
‘पत्रकारिताको खोल ओढेर पार्टीकारिता गर्ने अनि राष्ट्रपतिलाई भेटेर अध्यादेश रोकिदिन विन्ती गर्ने? निष्पक्ष पत्रकारिता गर्नेहरूलाई राष्ट्रपति कहाँ पुगेर अध्यादेश रोकिदिन विन्ती गर्नै परेको छैन,’ उनले लेखेका छन्।
उनले सरकारले ल्याउन खोजेको अध्यादेश राष्ट्रपतिले रोक्ने अधिकार संविधानको कुन धारामा रहेको छ भन्दै प्रश्नसमेत गरेका छन्।
राष्ट्रपतिसमक्ष गरिएको आग्रहलाई पत्रकारिताको चौथो अंगको आवाज नभई सञ्चार क्षेत्रभित्रको विकृतिको अभिव्यक्तिका रूपमा चित्रण गर्दै खत्रीले त्यसको शल्यक्रिया आवश्यक रहेको टिप्पणी गरेका छन्।
‘त्यसैले यो विन्ती देशको चौथो अंगले गरेको होइन, अंगमा लागेको ऐँजेरुले हो। जहाँ शल्यक्रियाको आवश्यकता छ,’ उनले सामाजिक सञ्जालमा लेखेका छन्।
सञ्चारमाध्यमलाई व्यवस्थित र मर्यादित बनाउन खोज्दा त्यसलाई निरंकुशताको संज्ञा दिने तथा न्यायाधीशको सम्पत्ति छानबिन गर्दा लोकतन्त्र खतरामा परेको तर्क गर्ने प्रवृत्तिसमेत विरोधाभासपूर्ण रहेको खत्रीको भनाइ छ।
सरकारको प्रस्तावित अध्यादेशलाई लिएर सञ्चार क्षेत्र र राजनीतिक वृत्तमा बहस भइरहेका बेला सांसद खत्रीको यो टिप्पणी सार्वजनिक भएको हो।
बिरगंज, पर्सा, २१ कार्तिक
काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने र प्रधानमन्त्री बालेन्द्र शाह (बालेन) बीच सम्बन्ध बिग्रिएको चर्चा चलिरहेका बेला उनीहरू निकटस्थहरूले भने यस्तो चर्चालाई निराधार भएको दाबी गरेका छन्।
निकटस्थ स्रोतहरूका अनुसार विभिन्न शक्तिकेन्द्रले रवि लामिछानेलाई प्रधानमन्त्री पदको प्रलोभन देखाएर बालेनसँग दूरी बढाउने प्रयास गरिरहेका छन्। तर रवि भने जनताले दिएको पाँच वर्षको म्यान्डेट पूरा गर्न बालेनलाई नै साथ दिने पक्षमा रहेको बताइएको छ।
रविको धारणा सरकारका दैनिक कामकारबाहीमा अनावश्यक हस्तक्षेप नगर्ने, तर गलत निर्णय वा नीतिगत कमजोरी देखिएमा प्रश्न उठाउने रहेको स्रोतको भनाइ छ। सरकारका केही निर्णयमा असहमति देखिनु स्वाभाविक भए पनि त्यसलाई व्यक्तिगत सम्बन्धमा आएको दरारका रूपमा बुझ्न नहुने उनीहरूको तर्क छ।
विशेषगरी प्रहरी नेतृत्व परिवर्तन तथा पत्रकार पक्राउलगायतका विषयमा दुवै पक्षबीच मतभिन्नता देखिएको चर्चा छ। यद्यपि, यस्ता विषयलाई राजनीतिक तथा नीतिगत असहमतिका रूपमा लिनुपर्ने उनीहरू बताउँछन्।
यसैबीच बूढानीलकण्ठमा भएको करिब चार घण्टा लामो भेटवार्तापछि पनि रवि र बालेनबीच संवाद तथा सहकार्य निरन्तर रहेको दाबी गरिएको छ। उक्त भेटले उनीहरूबीचको सम्बन्ध र राजनीतिक सहकार्यबारे उठेका विभिन्न अड्कलबाजीलाई थप चासोको विषय बनाएको छ।
राजनीतिक वृत्तमा अहिले रवि र बालेनबीचको सम्बन्धलाई चासोका साथ हेरिएको छ। तर उनीहरू निकटस्थहरूको भनाइलाई आधार मान्ने हो भने दुवैको प्राथमिकता व्यक्तिगत सत्ता प्रतिस्पर्धाभन्दा जनताले दिएको पाँच वर्षको जिम्मेवारी पूरा गर्नु रहेको देखिन्छ।
अन्ततः पाँच वर्षको जनादेश पूरा गर्न बालेन र रवि प्रतिस्पर्धी होइन, सहयात्री बन्नुपर्ने सन्देश उनीहरू निकटस्थहरूले दिएका छन्।
बिरगंज, पर्सा, २० कार्तिक
काठमाडौं । प्रधानमन्त्री बालेन शाहको आसन्न भारत भ्रमणलाई लक्षित गर्दै नेपालले आर्थिक सहायता, पूर्वाधार विकास, हवाई तथा रेल सम्पर्क विस्तारलगायत महत्त्वपूर्ण विषय भारतसमक्ष प्रस्ताव गर्ने तयारी गरेको छ। भ्रमणका क्रममा नेपालले भारतसँग दुई अर्ब अमेरिकी डलर बराबरको आर्थिक सहयोग माग गर्ने प्रस्ताव अघि सारेको छ।
प्रस्तावित सहयोगमध्ये एक अर्ब अमेरिकी डलर अनुदान र एक अर्ब डलर सहुलियतपूर्ण ऋणका रूपमा उपलब्ध गराउन नेपालले आग्रह गर्ने तयारी गरेको सरकारी स्रोतलाई उद्धृत गर्दै समाचार सार्वजनिक भएको छ।
नेपालले अनुदानबाट बुटवल–पोखरा द्रुतमार्ग निर्माण तथा बाढीबाट क्षतिग्रस्त पूर्वाधार पुनर्निर्माण गर्ने योजना बनाएको छ। त्यस्तै, सहुलियतपूर्ण ऋण जलविद्युत आयोजना र विद्युत् प्रसारण लाइन निर्माणमा उपयोग गर्ने प्रस्ताव छ।
बुटवल–पोखरा द्रुतमार्गलाई प्राथमिकता
नेपालले भारतसँग प्रस्ताव गरेको प्रमुख आयोजनामध्ये बुटवल–पोखरा द्रुतमार्ग पनि एक हो। करिब ७५ करोड अमेरिकी डलर लागत अनुमान गरिएको उक्त आयोजनाका लागि ५० करोड डलर अनुदान माग गर्ने नेपालको तयारी छ।
द्रुतमार्ग निर्माण भएपछि भारतीय सीमाबाट पोखरासम्मको यात्रा सहज र छोटो हुने अपेक्षा गरिएको छ। यसले पोखरा, लुम्बिनी तथा मुक्तिनाथ क्षेत्रको धार्मिक र पर्यटकीय गतिविधिलाई समेत प्रोत्साहन गर्ने विश्वास गरिएको छ।
अनुदानको बाँकी ५० करोड डलर भने गत भदौको बाढीबाट क्षतिग्रस्त संरचनाको पुनर्निर्माण तथा पुनर्स्थापनामा खर्च गर्ने प्रस्ताव छ।
जनकपुर–अयोध्या रेल सेवा सञ्चालनको तयारी
भारत भ्रमणका क्रममा रेल सम्पर्क विस्तारलाई पनि महत्त्वपूर्ण एजेन्डाका रूपमा अघि सारिएको छ। नेपालले जनकपुर र भारतको अयोध्याबीच सिधा रेल सेवा सञ्चालन गर्ने प्रस्ताव गरेको छ।
यसको तयारीस्वरूप भारतीय रेलको १७ डिब्बे रेल जनकपुरसम्म ल्याएर प्राविधिक परीक्षणसमेत गरिएको छ। प्रस्ताव कार्यान्वयन भए नेपाल र भारतका दुई महत्त्वपूर्ण धार्मिक सहरबीच आवागमन सहज हुनेछ।
यसका अतिरिक्त जनकपुरबाट बर्दिबास हुँदै निजगढसम्म रेलमार्ग विस्तार गर्ने तथा भारतको रक्सौलबाट वीरगन्ज र पथलैया हुँदै निजगढसम्म रेल सञ्जाल जोड्ने प्रस्ताव पनि अघि सारिएको छ।
पोखरा र भैरहवाका लागि नयाँ हवाई मार्गको माग
नेपालले पोखरा र भैरहवाका अन्तर्राष्ट्रिय विमानस्थललाई प्रभावकारी रूपमा सञ्चालन गर्न भारतसँग थप हवाई प्रवेशमार्ग उपलब्ध गराउन आग्रह गर्ने भएको छ।
हाल भारत हुँदै नेपाल प्रवेश गर्ने अधिकांश अन्तर्राष्ट्रिय उडानले सिमरा प्रवेशमार्ग प्रयोग गर्नुपर्ने अवस्था छ। पश्चिमतर्फबाट आउने विमानका लागि नयाँ प्रवेशमार्ग उपलब्ध भए उडान दूरी, समय र इन्धन खर्च घटाउन सकिने नेपालको अपेक्षा छ।
त्यस्तै, पोखरा–वाराणसी, भैरहवा–कुशीनगर र नेपालगन्ज–दिल्लीबीच सिधा हवाई सेवा सञ्चालन गर्ने विषय पनि प्रस्तावमा समेटिएको छ।
व्यापार सन्धि पुनरावलोकन र थप बन्दरगाहको माग
नेपालले भारतसँगको वाणिज्य सन्धि पुनरावलोकन गरी नेपाली वस्तुको निर्यातमा देखिएका अवरोध हटाउन प्रस्ताव गर्ने भएको छ।
विशेषगरी चिया, प्लाइउडलगायत नेपाली उत्पादन भारतीय बजारमा प्रवेश गर्दा भोग्नुपरेका गुणस्तर परीक्षण, क्वारेन्टिन तथा अन्य गैरभन्सार अवरोधलाई सहज बनाउन नेपालले जोड दिने तयारी गरेको छ।
यसैगरी तेस्रो मुलुकसँगको व्यापार विस्तारका लागि गुजरात र ओडिसास्थित थप दुई भारतीय बन्दरगाह प्रयोग गर्न पाउने सुविधा उपलब्ध गराउन पनि नेपालले आग्रह गर्नेछ।
ग्यास तथा पेट्रोलियम पाइपलाइन विस्तार
ऊर्जा र इन्धन आपूर्तिलाई सहज बनाउने उद्देश्यले नेपालले भारतसँग थप पाइपलाइन निर्माणको प्रस्ताव गरेको छ।
भारतको मोतीहारीबाट नेपालको सर्लाहीसम्म खाना पकाउने एलपी ग्यास ल्याउन छुट्टै पाइपलाइन निर्माण गर्ने प्रस्ताव अघि सारिएको छ।
त्यस्तै, अमलेखगन्जबाट चितवनको भण्डारासम्म पेट्रोलियम पाइपलाइन विस्तार गर्ने र पूर्वी नेपाललाई लक्षित गरी भारतबाट झापासम्म अर्को पाइपलाइन निर्माण गर्ने विषय पनि छलफलमा राखिने तयारी छ।
नेपालमा आइआइटी र आइआइएमका शाखा खोल्ने प्रस्ताव
शिक्षा र प्रविधिको क्षेत्रमा समेत भारतसँग सहकार्य विस्तार गर्ने नेपालको योजना छ। भारतका प्रतिष्ठित शैक्षिक संस्था इन्डियन इन्स्टिच्युट अफ टेक्नोलोजी (आइआइटी) र इन्डियन इन्स्टिच्युट अफ म्यानेजमेन्ट (आइआइएम) का शाखा नेपालमा स्थापना गर्न प्रस्ताव गरिएको छ।
त्यसैगरी नेपालीसहित नेपालका विभिन्न मातृभाषामा कृत्रिम बुद्धिमत्ता (एआई) प्रविधिको विकास गर्न भारतसँग प्राविधिक सहयोग र ज्ञान आदानप्रदान गर्ने प्रस्ताव पनि अघि सारिएको छ।
क्रिकेट खेलाडी तथा प्रशिक्षकको क्षमता अभिवृद्धिका लागि भारतीय पक्षसँग सहकार्य गर्ने विषयसमेत प्रस्तावमा समावेश छ।
भ्रमणअघि द्विपक्षीय छलफल तीव्र
प्रधानमन्त्री बालेन शाहको भारत भ्रमणको तयारीका क्रममा दुवै देशका अधिकारीबीच विभिन्न तहमा छलफल भइरहेको छ। भारतीय विदेश सचिव विक्रम मिश्रीको नेपाल भ्रमणका क्रममा पनि प्रस्तावित एजेन्डाबारे छलफल भएको थियो।
प्रधानमन्त्री शाहको भारत भ्रमण नोभेम्बर २३ देखि २५ अर्थात् मंसिर ७ देखि ९ गतेसम्म गर्ने तयारी रहेको समाचारमा उल्लेख छ। यद्यपि दुवै देशले भ्रमणको औपचारिक मिति सार्वजनिक गरिसकेका छैनन्।
नेपालले अघि सारेका सबै प्रस्ताव भ्रमणकै क्रममा कार्यान्वयनमा जाने निश्चित भने छैन। विशेषगरी दुई अर्ब डलरको आर्थिक सहायता, नयाँ हवाई प्रवेशमार्ग, रेल सञ्जाल विस्तार र व्यापार सन्धि पुनरावलोकनमा भारतको निर्णय महत्त्वपूर्ण हुनेछ।
भ्रमणबाट नेपाल–भारत सम्बन्धलाई आर्थिक, व्यापारिक तथा पूर्वाधार विकासको क्षेत्रमा थप उचाइमा पुर्याउने नेपालको अपेक्षा छ।
कार्तिक २० गते
जनकपुरधाम । मधेशमा नयाँ सत्ता समीकरण बन्ने भएपछि नेपाली कम्युनिस्ट पार्टी नेकपाका मन्त्रीहरू राजीनामा दिन तयारी गरेका छन् ।
एक सांसदका अनुसार केहीबेर अगाडि नेकपा संसदीय दलको भर्चुअल बैठक भएको थियो । नेकपा अध्यक्ष पुष्पकमल दाहाल प्रचण्डको निर्देशन पश्चात भएको भर्चुअल बैठकमा सरकारबाट बाहरिने निर्णयमा गरेको हो ।
केही बेरपछि नेकपाका चार मन्त्रीले मधेस प्रदेश सरकारलाई राजीनामा पत्र बुझाउने तयारीमा छन् । मधेश प्रदेश सरकारमा नेकपाका चार मन्त्री छन् ।
अर्थमन्त्री संसदीय दलका नेता युवराज भट्टराई, उद्योग पर्यटनमन्त्री कनिष पटेल, गृह सञ्चार तथा कानुन मन्त्री फकिरा महतो र ऊर्जा सिंचाई तथा खानेपानी मन्त्री जवाहर कुशवाहा रहेका छन् ।
गत असोज ३० गते मधेश प्रदेश सरकारबाट नेकपा एमाले बाहिरिएपछि सरकार अल्पमतमा छ । यद्यपि नेकपाले कांग्रेसको मुख्यमन्त्री कृष्णप्रसाद यादवलाई काँध थापिरहेको थियो ।
मधेश सरकारलाई अब विश्वासको मत लिन ८ दिन मात्र बाँकी रहेको छ ।
मधेशमा नेकपा एमालेले जसपा र नेकपा सहितको नयाँ समीकरण बनेको दाबी गरेको छ ।
एमाले संसदीय दलका नेता सरोज कुमार यादवले केन्द्रमै तीन दलका शीर्ष नेता बसेर नयाँ समीकरण बनेको अनलाइनखबरलाई आज बिहान बताएका थिए ।
तर, जसपा नेपालका केन्द्रीय अध्यक्ष उपेन्द्र यादव भने उक्त कुरा सही नभएको दाबी समेत समाजिक सञ्जालमा टिप्पणी गरेका छन् । यद्यपि जसपाभित्र पनि समीकरण बनेको दाबी छ ।
धनुषा, २० कात्तिक । जनकपुरधाम र भारतको अयोध्या धामलाई रेलमार्गमार्फत जोड्ने काम तीव्र पारिएको छ ।
प्रस्तावित जनकपुरधाम–अयोध्याधाम रेल सेवा सञ्चालन गर्नु अघि सुरक्षा तथा प्राविधिक अवस्थाको निरीक्षणका लागि भारतीय रेल्वेका अधिकारी बिहीबार १७ बोगीसहितको रेल लिएर धनुषाको कुर्था रेल्वे स्टेसन आइपुगेका छन् ।
भारतीय रेल्वेका पदाधिकारीसहित डब्ल्यूडीपी–४ डी ४०३७० नम्बरको रेल भारतको अयोध्याबाट जनकपुरधाम ल्याइएको हो । प्रस्तावित रेल सेवा सञ्चालनको पूर्वतयारीस्वरूप रेल ल्याएर प्रारम्भिक परीक्षण तथा निरीक्षण गरिएको नेपाल रेल्वेले जनाएको छ ।
नेपाल रेल्वे कम्पनी लिमिटेडका महाप्रबन्धक परिवेश पराजुलीका अनुसार जनकपुरधाम र अयोध्याबीच रेल सेवा सञ्चालन गर्ने योजनाअनुसार पहिलो चरणमा १७ बोगीसहितको रेल ल्याइएको हो ।
सेवा सञ्चालनको मिति र अन्य व्यवस्थापकीय विषयमा नेपाल तथा भारतबीच औपचारिक सम्झौता हुन भने बाँकी रहेको उहाँले बताउनुभयो ।
रेल सेवा सञ्चालनका लागि आवश्यक सुरक्षा व्यवस्था, रेलमार्गको अवस्था, प्राविधिक क्षमता तथा अन्य व्यवस्थापकीय पक्षको स्थलगत निरीक्षण भइरहेको महाप्रबन्धक पराजुलीले बताउनुभयो ।
भारतीय रेल्वेका अधिकारीले नेपाल रेल्वेका अधिकारीसँग रेल सञ्चालन, सुरक्षा र प्राविधिक तयारीका विषयमा छलफल गर्ने कार्यक्रमसमेत रहेको छ ।
उहाँका अनुसार प्रस्तावित सेवा सञ्चालन गर्न सकिने अवस्था, रेलमार्गको क्षमता र सुरक्षालगायतका विषयलाई प्राथमिकतामा राखेर निरीक्षण भइरहेको छ ।
अहिले रेल सेवा परीक्षण तथा तयारीकै चरणमा रहेकाले सञ्चालनका लागि आवश्यक केही प्राविधिक र प्रशासनिक काम बाँकी छन् । ती काम आन्तरिक रूपमा अघि बढाइएको उहाँले बताउनुभयो ।
नेपालको जनकपुरधामदेखि भारतको अयोध्याधामसम्म प्रस्तावित रेलमार्गको दूरी करिब ४६४ किलोमिटर छ । जनकपुरधाम र अयोध्या धार्मिक तथा सांस्कृतिक दृष्टिले नेपाल र भारतका महत्त्वपूर्ण गन्तव्य हुन् ।
जनकपुरधामलाई माता सीताको जन्मस्थल तथा अयोध्यालाई भगवान् श्रीरामको जन्मस्थलका रूपमा चिनिन्छ । उक्त दुई धार्मिक नगरीलाई रेल सेवामार्फत जोड्न सके धार्मिक पर्यटन तथा दुई देशबीचको जनस्तरको सम्बन्ध विस्तारमा सहयोग पुग्ने अपेक्षा गरिएको छ ।
स्थानीय व्यवसायी तथा सर्वसाधारणले प्रस्तावित रेल सेवा सञ्चालनको तयारीलाई सकारात्मक रूपमा लिएका छन् । रेल सेवा सञ्चालन भएपछि धार्मिक पर्यटकको आवागमन बढ्नुका साथै होटल, रेस्टुरेन्ट, यातायात, खुद्रा पसल तथा अन्य सेवा व्यवसायको कारोबार विस्तार हुने उनीहरूको अपेक्षा छ ।
जनकपुरधाम उद्योग वाणिज्य सङ्घका अध्यक्ष सुरेन्द्र भण्डारीले रेल सेवा सञ्चालन भएपछि जनकपुरधामका धार्मिक तथा पर्यटकीयस्थलमा पर्यटकको आवागमन बढ्ने र त्यसबाट स्थानीय व्यापार व्यवसायले लाभ लिन सक्ने विश्वास व्यक्त गर्नुभयो ।
उहाँले तेस्रो मुलुकबाट आयात तथा निर्यात हुने सामग्रीको ढुवानी सहज बनाउन महोत्तरीको भिठ्ठामोड वा धनुषाको जटही नाकामध्ये कुनै एकलाई व्यापारिक नाकाका रूपमा सञ्चालन गर्न सरकारसँग माग गर्नुभयो ।
अहिले व्यवसायीले टाढाका नाकाबाट सामान ल्याउनुपर्ने बाध्यता छ । जस्का कारण ढुवानी खर्च बढ्ने गरेको छ । जनकपुरधाम क्षेत्रका लागि पायक पर्ने नाका सञ्चालनमा आए स्थानीय व्यवसायी तथा उपभोक्ता दुवै लाभान्वित हुने बताइन्छ ।
नेपाल पत्रकार महासङ्घका केन्द्रीय सदस्य राजेशकुमार कर्णले जनकपुरधाम–अयोध्याधाम रेल सेवा सञ्चालनले नेपाल र भारतबीचको धार्मिक, सांस्कृतिक तथा जनस्तरको सम्बन्ध थप सुदृढ बनाउन सहयोग पुग्ने बताउनुभयो ।
माता सीताको जन्मस्थल जनकपुरधाम र भगवान् श्रीरामको जन्मस्थल अयोध्याबीच रेल सेवा सञ्चालन हुनु धार्मिक तथा सांस्कृतिक दृष्टिले विशेष महत्वको विषय भएको उहाँको भनाइ छ ।
रेल सेवा सञ्चालन भएपछि अयोध्याबाट हजारौँ धार्मिक पर्यटक जनकपुरधाम आउने सम्भावना रहेको उल्लेख गर्दै उहाँले पर्यटकको आवागमन सहज बनाउन दुवै देशका नागरिकलाई लक्षित गरी सीमा आवागमनसम्बन्धी नीति सहज बनाउन सरकारसँग आग्रह गर्नुभयो ।
दीर्घकालीन योजनासहित धार्मिक पर्यटकको आवागमन व्यवस्थित गर्न सके जनकपुरधामसहित मधेस प्रदेशको पर्यटन विकासमा महत्त्वपूर्ण योगदान पुग्ने उहाँले बताउनुभयो ।
प्रस्तावित रेल सेवाको उद्घाटन नेपालका प्रधानमन्त्री वालेन्द्र शाह र भारतका प्रधानमन्त्री नरेन्द्र मोदीले संयुक्त रूपमा गर्ने कार्यक्रम रहेको बताइएको छ ।
प्रस्तावित कार्यक्रमअनुसार भारतको राजधानी नयाँदिल्लीबाट रेल सेवाको उद्घाटन गर्ने तयारी गरिएको जनाइएको छ । यसका लागि दुवै देशका रेल्वे पदाधिकारी, कर्मचारी, सुरक्षा निकायका उच्च अधिकारी तथा प्रशासनिक प्रतिनिधिले आवश्यक तयारी अघि बढाएका छन् ।
रेल सञ्चालनका लागि सुरक्षा व्यवस्थापन, प्राविधिक परीक्षण र प्रशासनिक समन्वयलाई प्राथमिकता दिइएको छ । यसअघि भारतीय प्रधानमन्त्री नरेन्द्र मोदी र नेपालका तत्कालीन प्रधानमन्त्री केपी शर्मा ओलीले संयुक्त रूपमा जनकपुरधामबाट अयोध्यासम्मको बस सेवा शुभारम्भ गर्नुभएको थियो ।
तर, उक्त बस सेवा लामो समय नियमित सञ्चालन हुन सकेन । त्यसैले प्रस्तावित रेल सेवा पनि उद्घाटनमा मात्र सीमित नभई नियमित र व्यवस्थित रूपमा सञ्चालन हुनुपर्नेमा स्थानीयवासीले जोड दिएका छन् ।
- माटोका भाँडा बनाउनेहरू भन्छन्– जीवन धान्नै धौं भो
- रास्वपाका नेताहरूलाई वडाध्यक्ष बन्नै मन छैन, सबैको नजर मेयर र ठूला पदमा : रवि लामिछाने
- आईजी केसीले सचिवालयमा भित्र्याए एसएसपी पोखरेल, पुरानै टीमलाई निरन्तरता दिने नीति
- जगरनाथपुरमा कक्षा ११ का विद्यार्थीलाई गाउँपालिका अध्यक्ष यादवद्वारा कोर्ट–पाइन्ट वितरण
हाम्रो बारेमा
यो वेवसाइट Kathmandu Bulletin को आधिकारिक न्यूज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सुचना प्रविधि, भिडियो तथा जीवनका विभिन्न आयामका समाचार र विश्लेषणलाई यसले समेट्छ।
सञ्चालक एवम् प्रबन्ध निर्देशक
सम्पादक : रिषि केश
पत्रकार : आयुष भुजेल
सन्चालक : बिकि यादव
विज्ञापन
Kathmandu Bulletin मा विज्ञापन गर्न फोन:- 9761929175 मा सम्पर्क गर्नुहोला ।
पत्रकार विवरण
रौतहट :
रोशन कुमार साह
+977-9703493232
बारा र पर्सा :
आर. के. भगत
+977-9712074681
सम्पर्क
📍 ठेगना: बिरगंज, पर्सा
☎ फोन: ९७६१९२९१७५
✉ ईमेल: kathmandubulletin.np@gmail.com
✸ सूचना बिभाग दर्ता नं : ५२५८–२०८२/२०८३