बारा/बाराको परवानीपुर गाउँपालिका–४ स्थित केडिया आँखा अस्पताल अगाडि ईभी गाडीको ठक्करबाट एक ७ वर्षीय भारतीय बालकको मृत्यु भएको छ।

बुधबार दिउँसो करिब १२ः३० बजे वीरगञ्जबाट हेटौंडातर्फ जाँदै गरेको मधेश प्रदेश ०३–००१ ज ०९०१ नम्बरको ईभी गाडीले सडक पार गर्ने क्रममा पैदलयात्री भारत, मोतिहारी जिल्लाका महम्मद गुफानका ७ वर्षीय छोरा महम्मद ईशानलाई ठक्कर दिएको थियो।

गाडीको ठक्करबाट टाउकोमा गम्भीर चोट लागेका ईशानलाई उपचारका लागि वीरगञ्जस्थित बयोधा अस्पताल पुर्‍याइएको थियो। अस्पतालमा उपचारकै क्रममा दिउँसो २ः०८ बजे चिकित्सकले उनलाई मृत घोषणा गरेका प्रहरीले जनाएको छ। बालकको गम्भीर अवस्थामा उनका हजुरबुबा अब्दुल कुदुस अन्सारी उपचारमा संलग्न रहेका थिए।

घटनापछि इलाका प्रहरी कार्यालय परवानीपुर, बाराबाट प्रहरी नायब निरीक्षक बालराज गिरीको कमाण्डमा खटिएको टोलीले ईभी गाडी र चालक वीरगञ्ज महानगरपालिका–३२ निवासी २६ वर्षीय लक्षुमन पासवानलाई नियन्त्रणमा लिएको छ। चालक पासवानलाई इलाका प्रहरी कार्यालय परवानीपुरमा राखी घटनाबारे थप अनुसन्धान भइरहेको प्रहरीले जनाएको छ।

मृतक बालकको शव मुचुल्का पश्चात् सोही दिन साँझ ५ः१५ बजे पोस्टमार्टमका लागि वीरगञ्जस्थित नारायणी अस्पताल लगिएको छ। घटनाको सम्बन्धमा प्रहरीले आवश्यक अनुसन्धान अघि बढाएको जनाएको छ।

काठमाडौँ । रसुवाको टिमुरेमा कार्यरत भन्सार अधिकृत नकुल शर्माको शव गोरखामा भेटिएको छ।

भोटेकोशीमा आएको बाढीपछि सम्पर्कविहीन रहेका शर्माको शव त्रिशूली नदीको गोरखातर्फको किनारमा फेला परेको गोरखाका प्रमुख जिल्ला अधिकारी तुलसीबहादुर श्रेष्ठले जानकारी दिएका छन्।

शर्मा हुम्लाको ताजाकोट गाउँपालिका-२ का बासिन्दा रहेको जनाइएको छ। बाढीपछि उनी सम्पर्कविहीन भएका थिए।

शवको पोस्टमार्टम प्रक्रिया पूरा भएपछि परिवारजनले बुझेर लगेका छन्।

सर्लाही,१६ भदौ । बलरा नगरपालिका–४ स्थित श्री रामसखी मोहित सिंह जनता उच्च माध्यमिक विद्यालयका प्रधानाध्यापक कुटिएको तथा सवारीसाधन तोडफोड गरिएको घटनामा प्रहरीले एक युवकलाई नियन्त्रणमा लिएको छ।

प्रधानाध्यापकलाई कुटपिट गरिएको भन्दै फेसबुकलगायत विभिन्न सामाजिक सञ्जालमा भिडियो सामग्री प्रसारित भएपछि जिल्ला प्रहरी कार्यालय मलंगवा, सर्लाहीको गम्भीर ध्यानाकर्षण भएको प्रहरीले जनाएको छ।

प्रहरीका अनुसार विद्यालयभित्र सरसफाइ गराउने विषयमा प्रधानाध्यापकले विद्यार्थीलाई गालीगलौज तथा दुर्व्यवहार गरेको आरोपबारे विद्यार्थी र शिक्षकबीच छलफल भइरहेको अवस्थामा विवाद उत्पन्न भएको थियो। सोही क्रममा बलरा नगरपालिका–४ निवासी करिब ५५ वर्षीय प्रधानाध्यापक वीरेन्द्र झामाथि कुटपिट हुँदा उनी सामान्य घाइते भएका थिए। घटनाका क्रममा सवारीसाधनसमेत तोडफोड भएको प्रहरीले जनाएको छ।

घटनामा संलग्न रहेको आरोपमा बलरा नगरपालिका–२ निवासी २० वर्षीय अभिषेक कापडलाई प्रहरीले तत्काल नियन्त्रणमा लिएको छ। घटनामा संलग्न अन्य व्यक्तिहरूबारे समेत थप अनुसन्धान भइरहेको जिल्ला प्रहरी कार्यालय सर्लाहीले जनाएको छ।

सर्लाही प्रहरीका प्रवक्ता तथा सूचना अधिकारी प्रहरी नायव उपरीक्षक वेदप्रसाद गौतमले घटनाबारे आवश्यक अनुसन्धान भइरहेको जानकारी दिए।

राजन कुमार बानिया / पर्सा १४ भदाैं

रसुवाकाे भोटेकोशी बाढीबाट प्रभावित नागरिकहरूको राहत तथा पुनर्स्थापनाका लागि पर्साकाे जगरनाथपुर गाउँपालिकाले १५ लाख रुपैयाँ आर्थिक सहयोग गर्ने भएको छ।गाउँपालिका अध्यक्ष श्रीकान्त प्रसाद यादवको अध्यक्षतामा आइतबार बसेको गाउँ कार्यपालिका (बोर्ड) काे बैठकले १५ लाख रुपैयाँ सहयोग गर्ने निर्णय गरेको हो

अध्यक्ष यादवका अनुसार, गाउँपालिकाे विपद् व्यवस्थापन काेषबाट ५ लाख ५१ हजार तथा गाउँपालिकका जनप्रतिनिधिहरुकाे एक महिनाकाे तलबभत्ता सुविधा बराबरको रकम र गाउँपालिकामा कार्यरत कर्मचारीहरुबाट नेपाल सरकारले ताेके बमाेजिमकाे रकम गरी कूल १५ लाख रुपैयाँ आर्थिक सहयाेग गर्ने निर्णय गरिएको हाे।

आइतबार बाेर्ड बैठकबाट निर्णय गरिएको रकम संकलन गरेर दुई तीन दिनभित्रै प्रधानमन्त्री दैवी प्रकाेप उद्धार काेषमा जम्मा गरिने गाउँपालिकाका प्रमुख प्रशासकीय अधिकृत सन्देश यादवले जानकारी दिए।

बाढीका कारण जनधनको ठूलो क्षति व्यहोरेका रसुवा,नुवाकोट,धादिङ लगायतका नागरिकलाई विपद्को यस कठिन समयमा राहत र पुनर्स्थापनामा मद्दत पुगोस् भन्ने उद्देश्यले आकस्मिक बाेर्ड बैठक डाकेर आर्थिक सहयोग गर्ने निर्णय गरिएको गाउँपालिका अध्यक्ष यादवले बताए