रौतहट । रौतहटको गढीमाई नगरपालिका-९ मा १७ वर्षीया किशोरी आफ्नै घरमा झुण्डिएको अवस्थामा मृत फेला परेकी छन्।

स्थानीय कृष्णनन्द सहनीकी १७ वर्षीया छोरी पुष्पा सहनी शनिबार साँझ आफ्नै दुईतले घरको माथिल्लो तलास्थित कोठामा काठको बिममा सलको पासो लगाएको अवस्थामा मृत फेला परेकी हुन्।

प्रहरीका अनुसार शुक्रबार साँझ करिब ७ः१५ बजे उनकी आमाले पुष्पालाई झुण्डिएको अवस्थामा देखेपछि तत्काल प्रहरी चौकी बरियारपुरमा खबर गरेकी थिइन्। सूचना प्राप्त भएपछि प्रहरी सहायक निरीक्षक संजय झाको कमाण्डमा दुई जनाको प्रहरी टोली घटनास्थल पुगेको थियो।

घटनास्थलमा पुगेको प्रहरीले प्रारम्भिक अनुसन्धान तथा आवश्यक प्रक्रिया अघि बढाउँदै थप अनुसन्धानका लागि इलाका प्रहरी कार्यालय गरुडाबाट प्रहरी निरीक्षक उज्वल क्षेत्रीको कमाण्डमा SOCO सहितको टोली खटाएको जनाएको छ।

प्रहरीका अनुसार मृतक पुष्पा अविवाहित थिइन्। घटनास्थल प्रहरी चौकी बरियारपुरबाट करिब दुई किलोमिटर दक्षिणमा पर्छ।

किशोरीले यस्तो कदम चाल्नुको कारण भने हालसम्म खुल्न सकेको छैन। घटनाको प्रकृति र सम्भावित कारणबारे प्रहरीले थप अनुसन्धान गरिरहेको जनाएको छ।

काठमाडौं । सरकारले वरिष्ठ सहसचिव इन्दु घिमिरेलाई सचिवमा बढुवा गर्दै रक्षा मन्त्रालयको सचिवमा पदस्थापन गरेको छ।

शुक्रबार बसेको मन्त्रिपरिषद् बैठकले बढुवा सिफारिस समितिबाट पहिलो नम्बरमा सिफारिस भएकी घिमिरेलाई सचिवमा बढुवा गर्ने निर्णय गरेको हो। सचिवमा बढुवा हुनुअघि उनी संस्कृति, पर्यटन तथा नागरिक उड्डयन मन्त्रालयमा कार्यरत थिइन्।

यसैगरी, रक्षा सचिव केदारनाथ शर्मालाई गृह मन्त्रालयको सचिवमा सरुवा गरिएको छ। शर्मालाई गृहमा सरुवा गरेपछि रिक्त भएको रक्षा सचिवमा नवनियुक्त सचिव घिमिरेलाई पदस्थापन गरिएको हो।

सचिवमा बढुवा भएलगत्तै पहिलो पदस्थापनमै रक्षा मन्त्रालयको जिम्मेवारी पाउने अवसर घिमिरेले पाएकी छन्।

काठमाडौं । प्रधानमन्त्री दैवी प्रकोप उद्धार कोषमा राजी राणाले एक करोड ९ लाख रुपैयाँ आर्थिक सहयोग गरेकी छन् । यो रकम राहत कोषमा व्यक्तिगततर्फबाट उपलब्ध गराइएको ठूलो मध्येको सहयोग हो ।

व्यावसायिक पृष्ठभूमिकी राणा ८७ वर्षीया हुन् । राणाले सहयोगी कृष्ण बस्नेतमार्फत पठाएको सहयोग रकमको चेक शुक्रबार अर्थमन्त्री डा. स्वर्णिम वाग्लेले मन्त्रालयमा बुझे ।

सो क्रममा राणाको कार्यालयमा काम गर्ने कर्मचारीहरूले आफ्नै तर्फबाट ८० हजार रुपैयाँ सहयोग पनि अर्थमन्त्रीलाई हस्तान्तरण गरे । राणाले थप २५ लाख रुपैयाँ बराबरको जिन्सी र खाद्यान्न सहयोगको पनि तयारी गरेकी छन् । अर्थ र गृह मन्त्रालयसँग समन्वय गरेर आवश्यक परेको स्थानमा सो रकम बराबरको सहयोग गर्ने प्रतिबद्धता उनले गरेकी छन् ।

काठमाडौँ। सरकारले गृह सचिवको जिम्मेवारी केदारनाथ शर्मालाई दिएको छ। शुक्रबार बसेको मन्त्रिपरिषद् बैठकले शर्मालाई गृह सचिवमा सरुवा गर्ने निर्णय गरेको हो।

यसअघि उनी रक्षा मन्त्रालयको सचिव थिए। २०८२ मंसिरमा रक्षा मन्त्रालयको जिम्मेवारी पाएका शर्मालाई गृहको जिम्मेवारी दिने निर्णय भएको हो।

हाल गृहसचिव रहेका राजकुमार श्रेष्ठ भदौ १५ गतेबाट अनिवार्य अवकास हुने छन्।