१९ भदौ,वीरगञ्ज । मानव बेचबिखन तथा ओसारपसारको आरोपमा पर्सा प्रहरीले एक जनालाई १९ वर्षपछि पक्राउ गरेको छ।

पक्राउ पर्नेमा सखुवा प्रसौनी गाउँपालिका–४ का अयुब मियाँ अन्सारी रहेका छन्। उनलाई मानव बेचबिखन तथा ओसारपसारसम्बन्धी पुरानो घटनामा संलग्न रहेको आरोपमा प्रहरीले पक्राउ गरेको हो।

जिल्ला प्रहरी कार्यालय पर्साका प्रहरी प्रवक्ता डीएसपी चक्रबहादुर मल्लका अनुसार अन्सारीमाथि वीरगञ्ज महानगरपालिका–श्रीपुरकी ‘क’ नाम गरेकी महिलालाई भारत हुँदै कतार पुर्‍याई त्यहाँबाट साउदी अरबमा बेच्न सहयोग गरेको आरोप छ।

प्रहरीका अनुसार २०६३ साल चैत १५ गते रोजगारीका लागि ती महिलालाई भारत हुँदै कतार पुर्‍याइएको थियो। कतार पुगेपछि उनलाई २–३ दिन आफूसँग राखेर अब्दुल कादिर भन्ने कादिर अन्सारीले ९० हजार रुपैयाँमा साउदी अरबमा बिक्री गरेको भन्दै प्रहरीमा जाहेरी परेको थियो।

जाहेरीका आधारमा घटनाको अनुसन्धान अघि बढाउने क्रममा अयुब मियाँ अन्सारीको समेत संलग्नता देखिएपछि उनलाई पक्राउ गरिएको डीएसपी मल्लले जानकारी दिए।

प्रहरीले अन्सारीलाई मानव बेचबिखन तथा ओसारपसारसम्बन्धी मुद्दामा हिरासतमा राखेको छ। घटनाबारे थप अनुसन्धान भइरहेको जिल्ला प्रहरी कार्यालय पर्साले जनाएको छ।

सर्लाही , भदौ १८ –

धनकौल गाउँपालिका–३ हरकठवाबाट चार दिनदेखि बेपत्ता १० वर्षीया बालिका चाँदकुमारी यादव मृत फेला परेकी छन्।

स्थानीय रामविनय यादवकी छोरी चाँदकुमारी गत आइतबारदेखि बेपत्ता थिइन्। बुधबार साँझ धनकौल गाउँपालिका–४ स्थित मनुष्मारा खोलामा उनको शव फेला परेको इलाका प्रहरी कार्यालय बरहथवाका प्रहरी नायब उपरीक्षक गोपीकृष्ण सुवेदीले जानकारी दिए।

प्रहरीका अनुसार बालिकाको नुहाउने क्रममा खोलामा डुबेर मृत्यु भएको प्रारम्भिक आशंका गरिएको छ। घटनाबारे थप अनुसन्धान भइरहेको प्रहरीले जनाएको छ।

पोखरा,१९भदाैं: कास्कीको पोखरा महानगरपालिका–१८ गैरीचौतारा घुम्तीबाट भारतीय नम्बर प्लेटको कार फेवातालमा खस्दा दुई जनाको मृत्यु भएको छ । दुई जना घाइते भएका छन्।

शुक्रबार बिहान करिब ४:५० बजे सेदीबाट लेकसाइडतर्फ आउँदै गरेको भारतीय नम्बर प्लेट बीआर ०५ बी बी ६७५९ नम्बर को कार चालकले नियन्त्रण गुमाउँदा सडकबाट करिब २० मिटर तल फेवातालमा खसेको प्रहरीले जनाएको छ।

घटनाको खबर पाएलगत्तै वडा प्रहरी कार्यालय बैदामबाट प्रहरी नायब उपरीक्षक सूर्यबहादुर बोगटीको कमाण्डमा १५ जना प्रहरी तथा सशस्त्र प्रहरी बल नेपाल नंबर २४ हेडक्वाटर कालिका गण कास्कीबाट १३ जनाको टोली उद्धारका लागि परिचालन भएको थियो।

उद्धारका क्रममा कारमा सवार भारतको बिहार राज्यकाे रक्साैल घर बताउने २७ वर्षीय अनमोल कुमार यादव र ३३ वर्षीय सुरज यादवलाई जीवितै उद्धार गरी उपचारका लागि अस्पताल पठाइएको प्रहरीले जनाएको छ। दुवैको अवस्था मध्यम रहेको र बोल्न सक्ने अवस्थामा रहेको बताइएको छ।

त्यसैगरी, बिहान ५:५५ बजे फेवातालको पानीभित्रबाट अचेत अवस्थामा दुई जनालाई उद्धार गरी पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पताल लगिएको थियो। चिकित्सकले बिहान ६:२१ बजे ती दुवै जनालाई मृत घोषणा गरेका हुन्।

मृत्यु हुनेमा भारतको बिहार राज्यकाे रक्साैल घर भएका २६ वर्षीय नवदीप कुमार यादव र करिब ४०–४५ वर्षीय एक पुरुष रहेका छन्। दोस्रो मृतकको नाम खुल्न बाँकी रहेको प्रहरीले जनाएको छ।

क्रेनको सहयोगमा बिहान ६:२० बजे कारलाई फेवातालबाट निकालेर वडा प्रहरी कार्यालय बैदाममा ल्याइएको छ। घटनाबारे थप अनुसन्धान भइरहेको प्रहरीले जनाएको छ।

वीरगन्ज,१८ भदौं : भोटेकोशी र त्रिशुली नदिको विनाशकारी बाढीबाट प्रभावित तथा पीडित परिवारको राहत तथा उद्धारका लागि तेली कल्याण समाज पर्साले १ लाख १ हजार रुपैयाँ सहयोग गर्ने भएकोे छ ।

बिहीबार वीरगन्जमा तेली कल्याण समाज पर्साका अध्यक्ष ध्रुब साहको अध्यक्षतामा बसेको बैठकले प्रधानमन्त्री दैवी प्रकोप उद्धार कोषमा १ लाख १ हजार रुपैयाँ जम्मा गर्ने निर्णय गरेको हो ।

प्राकृतिक विपद्का बेला पीडित तथा प्रभावित नागरिकलाई सहयोग गर्नु सबैको सामाजिक दायित्व भएको भन्दै अध्यक्ष साहले राहत तथा उद्धार कार्यमा तेली जातिको तर्फबाट सक्दो सहयोग गर्ने प्रतिबद्धता समेत जनाए ।

बैठकमा तेली कल्याण समाजका नगर अध्यक्ष पन्नालाल साह तेली, जिल्ला सचिव वीरेन्द्र साह, गणेशप्रसाद साह, पारस साह, प्रदीप साह, श्रीलाल साह, ताराचन्द साह, मोहन साह, राजकुमार साह, उमेश साह, बाँके बिहारी साह, उपेन्द्र साह व्यास, कासी साहजी लगायतको उपस्थिति रहेको थियो ।