वीरगन्ज । वीरगन्ज महानगरपालिकाले सडक तथा सार्वजनिक क्षेत्रमा जथाभावी तानिएका इन्टरनेट र टेलिभिजन केवलका तार व्यवस्थापन गर्ने अभियान सुरु गर्ने भएको छ। महानगरले पहिलो चरणमा शंकराचार्य गेटदेखि छपकैयास्थित ईदगाह चोकसम्मको क्षेत्रमा रहेका अव्यवस्थित तार हटाएर व्यवस्थित गर्न लागेको हो।

महानगरपालिकाले बिहीबारदेखि नै अभियान सञ्चालन गर्ने तयारी गरेको जनाएको छ। तार व्यवस्थापनका क्रममा सम्बन्धित सेवा प्रदायक संस्थाका प्रतिनिधिहरूको उपस्थितिमा अनावश्यक तथा प्रयोगमा नरहेका तार हटाउने र आवश्यक तारलाई व्यवस्थित गरिनेछ।

महानगरपालिकाको प्रशासन शाखा प्रमुख विजय गुप्ताको अध्यक्षतामा बसेको सरोकारवालाहरूको बैठकले तार व्यवस्थापन अभियान अघि बढाउने निर्णय गरेको हो। बैठकमा सातवटा इन्टरनेट सेवा प्रदायक र एउटा टेलिभिजन केवल सेवा प्रदायक संस्थाका प्रतिनिधिहरू सहभागी थिए।

महानगरपालिकाले पटक–पटक बैठकमा बोलाउँदा पनि अनुपस्थित हुने वा तार व्यवस्थापन अभियानमा सहयोग नगर्ने सेवा प्रदायकलाई प्रचलित कानुन तथा महानगरको नियमअनुसार कारबाही गर्ने निर्णयसमेत गरेको छ।

सडक तथा सार्वजनिक स्थानमा अव्यवस्थित रूपमा रहेका तारका कारण सहरको सौन्दर्यमा असर पर्नुका साथै पैदलयात्री तथा सवारी आवागमनमा समेत जोखिम बढ्दै गएको भन्दै महानगरले तार व्यवस्थापनलाई प्राथमिकतामा राखेको हो। पहिलो चरणको अभियानको प्रभावकारिता हेरेर अन्य क्षेत्रमा समेत तार व्यवस्थापन विस्तार गर्ने महानगरको तयारी छ।

विराटनगर । विराटनगर–१६ दरैयास्थित कोलर चोकबाट ६० किलो गाँजा बरामद भएको घटनामा प्रयोग भएको भनिएको को १ च ६६२० नम्बरको सुजुकी भ्यान आफ्नो स्वामित्वमा नरहेको दिव्य ज्योति अस्पताल प्रालिले स्पष्ट पारेको छ। बुधबार पत्रकार सम्मेलन गर्दै अस्पतालले विभिन्न सञ्चारमाध्यम तथा अनलाइन पोर्टलमा उक्त भ्यानलाई ‘दिव्य ज्योति अस्पताल प्रालि’सँग जोडेर समाचार प्रकाशित तथा प्रसारित भएकोप्रति गम्भीर ध्यानाकर्षण भएको जनाएको हो।

अस्पतालका अध्यक्ष देवा यादवले को १ च ६६२० नम्बरको सुजुकी भ्यान अस्पतालको स्वामित्वमा नरहेको स्पष्ट पारे। भ्यानमा अस्पतालको नाम लेखिएको भए पनि त्यसकै आधारमा सवारीसाधनलाई अस्पतालसँग जोडेर समाचार सम्प्रेषण हुँदा संस्थाको प्रतिष्ठा र जनविश्वासमा अनावश्यक भ्रम सिर्जना भएको यादवले बताए। उनले सञ्चारमाध्यमलाई समाचार प्रकाशन तथा प्रसारण गर्नुअघि सवारीसाधनको वास्तविक स्वामित्व र घटनासँगको सम्बन्धबारे सत्यतथ्य पुष्टि गर्न आग्रह गरे।

अस्पतालले उक्त गाँजा बरामद घटनामा आफ्नो कुनै संलग्नता नरहेको स्पष्ट पार्दै सेवाग्राही, शुभचिन्तक तथा आम नागरिकलाई भ्रममा नपर्नसमेत आग्रह गरेको छ।

रौतहट । रौतहटको राजपुर नगरपालिका–५ राजपुर निवासी तथा पूर्व संघीय सांसद किरण कुमार साहका बुवा एवं नेपाली कांग्रेस रौतहटका भूतपूर्व जिल्ला उपसभापति हजारी साह आफ्नै पुरानो घरमा मृत अवस्थामा फेला परेका छन्।

बुधबार बिहान साह आफ्नै पुरानो घरमा मृत अवस्थामा फेला परेका हुन्। घटनाको जानकारी पाएलगत्तै जिल्ला प्रहरी कार्यालय रौतहटबाट प्रहरी टोली घटनास्थलमा पुगेर घटनास्थलको निरीक्षण, मुचुल्का तथा आवश्यक प्रमाण संकलन गरी अनुसन्धान अघि बढाएको छ।

प्रहरीका अनुसार कानुनी प्रक्रिया पूरा गरी शवलाई पोस्टमार्टमका लागि प्रादेशिक अस्पताल गौर पठाइएको छ। मृत्युको कारणबारे अहिलेसम्म आधिकारिक निष्कर्ष सार्वजनिक भएको छैन। पोस्टमार्टम प्रतिवेदन तथा थप अनुसन्धानपछि मात्रै घटनाको यथार्थ कारण खुल्ने प्रहरीले जनाएको छ।

प्रहरीले घटनाका सबै पक्षलाई ध्यानमा राखेर अनुसन्धान जारी राखेको जनाएको छ। घटनाको थप आधिकारिक विवरण आउन बाँकी रहेको छ।

विराटनगर । विराटनगरको सीमावर्ती क्षेत्रबाट प्रहरीले अस्पतालको नाम लेखिएको भ्यानबाट करिब ६० किलो गाँजा बरामद गरेको छ।

विराटनगर महानगरपालिका–१६ दरैयास्थित कोलर चोकमा मंगलबार राति सशस्त्र प्रहरी बल नेपाल बीओपी दरैयाबाट खटिएको टोलीले ‘दिव्य ज्योती अस्पताल प्रा. लि.’ लेखिएको को १ च ६६२० नम्बरको सुजुकी भ्यान रोकेर जाँच गर्ने क्रममा गाँजा बरामद गरेको हो।

सशस्त्र प्रहरीका अनुसार राति करिब ११ बजे सुरक्षाकर्मीले भ्यान रोकेर चेकजाँच गर्न खोज्दा चालक गाडीमै नबसी फरार भएका थिए।

चालक भागेपछि सुरक्षाकर्मीले भ्यानको खानतलासी गर्दा दुईवटा बोरामा प्याक गरेर राखिएको अवस्थामा करिब ६० किलो गाँजा फेला परेको जनाएको छ।

बरामद गरिएको गाँजा र भ्यानलाई आवश्यक अनुसन्धान तथा कानुनी कारबाहीका लागि नेपाल प्रहरीलाई बुझाउने तयारी भइरहेको सशस्त्र प्रहरीले जानकारी दिएको छ।

चालक फरार रहेकाले घटनाबारे थप अनुसन्धान भइरहेको जनाइएको छ।