रक्सौल, कार्तिक ७ –

दीपावली र छठ पर्वलाई लक्षित गर्दै भारत–नेपाल सीमावर्ती क्षेत्रमा सुरक्षा सतर्कता बढाइएको छ । पूर्वी चम्पारणका प्रहरी अधीक्षक स्वर्ण प्रभातले सीमावर्ती क्षेत्रको सुरक्षा व्यवस्थाको निरीक्षण गर्दै सुरक्षा निकायलाई निगरानी प्रभावकारी बनाउन निर्देशन दिएका छन् ।

भारतीय सञ्चारमाध्यम भ्वाइस अफ रक्सौलका अनुसार प्रहरी अधीक्षक प्रभातले बिहीबार साँझ लाला छपरा–मटियरवा सीमा क्षेत्रको आकस्मिक निरीक्षण गरेका थिए । उनले सीमा क्षेत्रमा खटिएका सशस्त्र सीमा बल (एसएसबी) तथा प्रहरी अधिकारीसँग भेटेर सुरक्षा अवस्था र गतिविधिबारे जानकारी लिएका थिए ।

निरीक्षणअघि उनले छौडादानो प्रहरी थानाको अनुगमन गरेका थिए । त्यसपछि रक्सौलका प्रहरी उपरीक्षक (एसडीपीओ) मनीष आनन्दसँगै सीमावर्ती क्षेत्रमा पुगेका उनले बेलदरवा एसएसबी क्याम्पका अधिकारी र आदापुर प्रहरी थानाका प्रमुखसँग सीमा सुरक्षाबारे छलफल गरेका थिए ।

निरीक्षणका क्रममा उनले भारतीय तथा नेपाली क्षेत्रका स्थानीय बासिन्दासँग संवाद गर्दै उनीहरूका समस्या र दैनिक जीवनबारे जानकारी लिएका थिए । आपत्कालीन अवस्थामा प्रहरी सहायता लिन डायल ११२ मा सम्पर्क गर्न आग्रह गर्दै उनले प्रहरी र नागरिकबीच समन्वय कायम राख्नुपर्नेमा जोड दिएका थिए ।

सीमावर्ती क्षेत्रबाट फर्कने क्रममा प्रभातले रक्सौल प्रहरी थानाको पनि निरीक्षण गरेका थिए । उनले अपराध नियन्त्रण, सुरक्षा सतर्कता, प्रहरी मेसको सरसफाइ र खानाको गुणस्तरमा ध्यान दिन निर्देशन दिएका थिए । चाडपर्वका बेला सीमा क्षेत्रमा सुरक्षा निगरानी र प्रहरी–एसएसबीबीच समन्वयलाई थप प्रभावकारी बनाउने उद्देश्यले निरीक्षण गरिएको जनाइएको छ ।

धोबिनी, पर्सा। शिक्षा सबै बालबालिकाको नैसर्गिक अधिकार हो र आर्थिक अभावका कारण कुनै पनि बालबालिका शिक्षाबाट वञ्चित हुन नपरोस् भन्ने उद्देश्यका साथ Human Love Charity Fund ले सञ्चालन गर्दै आएको ‘शिक्षा साथ अभियान’ अन्तर्गत निःशुल्क कक्षा सञ्चालन कार्यक्रमको आज धोबिनी गाउँपालिका–५, टोल धोबिनीमा औपचारिक उद्घाटन गरिएको छ।

संस्थाका प्रमुख सल्लाहकार मुकेश प्रसाद पटेलको अध्यक्षतामा सम्पन्न उद्घाटन कार्यक्रममा प्रमुख अतिथिका रूपमा धोबिनी गाउँपालिका–५ का वडा अध्यक्ष मनौवर अहमद उपस्थित हुनुहुन्थ्यो। कार्यक्रमको उद्घोषण संस्थाका सदस्य विकास कुमार साहले गर्नुभएको थियो भने संस्थाका वित्तीय प्रमुख सल्लाहकार एमडी खालिद जियाले उद्घाटन सत्रमा मन्तव्य राख्नुभएको थियो।

यस अभियानलाई सफलतापूर्वक सञ्चालन गर्न शिक्षिका अमृता कुमारी साह र अस्मिता कुमारी साहले संस्थासँग सहकार्य गर्दै निःशुल्क शिक्षण सेवा प्रदान गर्ने जिम्मेवारी लिनुभएको छ। कार्यक्रममा स्थानीय समाजसेवी, बुद्धिजीवी, संस्थाका सदस्यहरू तथा विद्यार्थी भाइबहिनीहरूको उपस्थिति रहेको थियो।

Human Love Charity Fund ले शिक्षा, स्वास्थ्य, गरिब तथा असहाय परिवारको सहयोग, विपद् प्रभावितलाई राहतलगायतका सामाजिक सेवाका क्षेत्रमा निरन्तर काम गर्दै आएको छ। चार सयभन्दा बढी परिवारलाई सहयोग पुर्‍याइसकेको संस्थाले अब शिक्षाको पहुँच विस्तारलाई थप प्राथमिकतामा राख्दै ‘शिक्षा साथ अभियान’ अघि बढाएको छ।

यस अभियानअन्तर्गत संस्थाले आवश्यकताअनुसार विभिन्न गाउँ, टोल तथा सहरमा निःशुल्क कक्षा सञ्चालन गर्ने लक्ष्य लिएको छ। विशेषगरी प्रारम्भिक तहका बालबालिकाको सिकाइलाई बलियो बनाउने उद्देश्यले सञ्चालन गरिने कक्षामा सहभागी विद्यार्थीहरूलाई संस्थाको तर्फबाट निःशुल्क कापी, किताब, कलम तथा अन्य आवश्यक शैक्षिक सामग्री उपलब्ध गराइनेछ। यी कक्षाहरूमा सहभागी हुन विद्यार्थीहरूले कुनै शुल्क तिर्नुपर्ने छैन।

संस्थाको विश्वास छ—शिक्षामा गरिएको सहयोग नै बालबालिकाको भविष्य निर्माणमा गरिएको लगानी हो। त्यसैले यो अभियान केवल कक्षा सञ्चालनमा सीमित नभई शिक्षाप्रति जागरूकता फैलाउने, बालबालिकालाई सिकाइमा प्रोत्साहित गर्ने र समाजमा शिक्षामैत्री वातावरण निर्माण गर्ने उद्देश्यसहित अघि बढाइएको छ।

Human Love Charity Fund ले आगामी दिनमा पनि समाजका आवश्यकता पहिचान गर्दै मानवता, सेवा र समान अवसरको भावनाका साथ यस्ता सामाजिक अभियानलाई निरन्तरता दिने प्रतिबद्धता व्यक्त गरेको छ।

“शिक्षा सबैको अधिकार हो, कुनै पनि बालबालिका शिक्षाबाट वञ्चित हुनुहुँदैन।”

Human Love Charity Fund — मानव सेवा, शिक्षाको विकास र उज्ज्वल भविष्य निर्माणका लागि निरन्तर समर्पित।

पर्साको ठोरी गाउँपालिका–३ स्थित बुद्धनगरको ओडारखोला बगरमा एक भारतीय युवकको शव फेला परेको छ ।

जिल्ला प्रहरी कार्यालय पर्साका अनुसार भारतको बिहार राज्यअन्तर्गत पश्चिम चम्पारण जिल्लाको इनरवा क्षेत्रस्थित खमियाका लालु देवानका २० वर्षीय छोरा इरसाद आलमको शव फेला परेको हो । शव पोस्टमार्टमका लागि नारायणी अस्पताल, वीरगञ्ज पठाइएको थियो । पोस्टमार्टमपछि आफन्तलाई शव बुझाइएको प्रहरीले जनाएको छ ।

मृतकका आफन्तका अनुसार आलम चार दिनदेखि परिवारको सम्पर्कमा थिएनन् । उनी स्थानीय गोलु ठाकुरसँगै ठोरी आएको आफन्तले बताएका छन् ।

यसैबीच, भारतको इनरवा प्रहरीमा ठाकुरविरुद्ध किटानी जाहेरी परेपछि उनलाई पक्राउ गरिएको बताइएको छ । खमियाका शम्भु यादवका अनुसार ठाकुरलाई मैनाटाँड थानामा राखेर सोधपुछ भइरहेको छ ।

युवकको मृत्युको कारण खुल्न सकेको छैन । घटनाबारे नेपाल र भारतका सम्बन्धित प्रहरी निकायले अनुसन्धान गरिरहेका छन् ।

मुख्य चाड दशैँको बेला अहिले किसानलाई पाकेको धान भित्र्याउन भ्याइनभ्याइ छ ।

धेरैजसो ठाउँमा दशैँको टीका कोजाग्रत पूर्णिमा अर्थात् पर्सि सोमबारसम्म लगाउने गरिन्छ । तर मौसम पूर्वानुमान महाशाखाले बुधबार ११ गतेदेखि पानी पर्ने प्रक्षेपण गरेसँगै दशैँको टीकाकैबीच किसानलाई पाकेको धानबाली काट्न र भित्र्याउन हतारो भएको छ । अहिले अन्नको भण्डार तराई/मधेशदेखि पहाडी क्षेत्रमा धान पाकेर पहेँलपुर भएको छ ।

जेठ, असारमा रोपिएको बर्खे धानबालीका लागि गरिएको लगानीअनुसार अहिले बेलैमा भित्र्याउन नपाए नोक्सानी हुने जोखिम छ । धान काटिसकेका तर अहिलेसम्म भण्डारण गर्न नपाएका किसानलाई पानी परे खेतको बाली भिज्ने डर छ । काट्न बाँकी रहेकालाई पनि हावाहुरी र पानीले धान ढाल्ने चिन्ता छ । धानको बाला लामो समयसम्म भिजे बिग्रने जोखिम हुन्छ । 

विगतमा पनि असोज/कात्तिक महिनामा आएको बेमौसमी बाढी र वर्षाले तयारी अवस्थाको धानबाली नष्ट गर्दा किसानले क्षति बेहोर्नुपरेको थियो । मंगलबारदेखि पानी पर्न सक्ने मौसमबारेका जानकारले यसअघि नै भनेकोमा मौसम पूर्वानुमान महाशाखाले भने आधिकारिक रुपमा ढिलो गरी पूर्वतयारी गर्न सचेत गराएको छ । त्यसअनुसार किसानलाई तत्काल धान काट्न र भित्र्याउन समस्या पनि छ ।

दशैँको बेला भएकाले काम गर्ने जनशक्तिको अभाव छ । अर्थात् खेतमा काम गर्ने खेताला वा मजदुर पाउन निकै मुस्किल छ । थ्रेसर, ट्र्याक्टर जस्ता आधुनिक उपकरणको सुविधा लिन सहज छैन । हतार–हतार काटिएको धान राम्रोसँग सुकाउन र सुरक्षित भण्डारण गर्न पनि समस्या हुने गर्छ ।

मौसमविद्ले किसानलाई मौसमको अवस्था हेरेर मात्र धान काट्न र काटिसकेको धानलाई सुरक्षित ठाउँमा राख्न सुझाव दिएका छन् । नार्कको राष्ट्रिय कृषि वातावरण अनुसन्धान केन्द्रले कृषि मौसम सल्लाह बुलेटिनमार्फत् पाकिसकेको धानबाली १० गते मंगलबारभित्र भित्र्याउन आग्रह गरेको छ ।

त्यस्तै मंगलबारयता भित्र्याउन नसके मौसम सुधार भएपछि मात्र प्राविधिकको सल्लाहअनुसार धान काट्ने र भित्र्याउने गरी समय मिलाउन, बाला पसाएका र नपाकेको धान भए खेतमा विभिन्न ठाउँबाट कुलेसो काटी पानीको निकास व्यवस्था गर्न किसानलाई सल्लाह छ ।