२८ बैशाख, काठमाडौँ । अमेरिकी राष्ट्रपति डोनाल्ड ट्रम्पले युद्ध अन्त्यका लागि इरानले अघि सारेको पछिल्लो प्रस्तावलाई पूर्ण रूपमा अस्वीकार गरिदिएका छन्। आफ्नो ‘ट्रुथ सोसल’ प्लेटफर्ममार्फत प्रतिक्रिया दिँदै ट्रम्पले इरानी प्रतिनिधिहरूबाट प्राप्त जवाफ चित्तबुझ्दो नभएको र प्रस्तावित योजना अमेरिकाका लागि मान्य नहुने स्पष्ट पारेका हुन् ।
इरानले आइतबार मात्रै पाकिस्तानका मध्यस्थकर्तामार्फत वासिङ्टनलाई एक नयाँ शान्ति प्रस्ताव पठाएको थियो। इरानी सरकारी सञ्चारमाध्यमका अनुसार उक्त प्रस्तावमा सबै मोर्चामा जारी युद्धको अन्त्य र तेहरानमाथि लगाइएका आर्थिक प्रतिबन्धहरू फुकुवा गरिनुपर्ने सर्त राखिएको थियो। विशेष गरी, अमेरिकाले इरानी तेल निर्यातमा लगाएको प्रतिबन्ध ३० दिनका लागि हटाउनुपर्ने र इरानी बन्दरगाहहरूमा कायम नौसैनिक नाकाबन्दी अन्त्य गर्नुपर्ने माग इरानको थियो।
‘वाल स्ट्रिट जर्नल’ का अनुसार वार्ता निष्कर्षमा पुग्न नसक्नुको मुख्य कारण इरानको आणविक कार्यक्रम नै हो। अमेरिकाले इरानको युरेनियम भण्डार र आणविक गतिविधिमा कडा नियन्त्रणको माग राख्दै आएको छ, जसमा इरान अझै सहमत हुन सकेको छैन। ट्रम्पले इरानी प्रस्तावलाई ‘अपूर्ण’ भन्नुको पछाडि यी प्राविधिक र सुरक्षासम्बन्धी विषयहरू नै प्रमुख रहेको विश्लेषण गरिएको छ।
यसैबिच, इजरायली प्रधानमन्त्री बेन्जामिन नेतान्याहुले इरानसँगको सङ्घर्ष अझै तार्किक निष्कर्षमा नपुगेको बताएका छन्। अमेरिका र इजरायलको साझा उद्देश्य इरानको आणविक सपनालाई पूर्ण रूपमा ध्वस्त पार्नु रहेको उल्लेख गर्दै उनले युद्ध अन्त्यको घोषणा गर्न हतार नगर्ने सङ्केत दिएका छन्।
इरानले पाकिस्तानको मध्यस्थतामा कूटनीतिक निकास खोज्ने प्रयास गरे पनि ट्रम्पको पछिल्लो कठोर प्रतिक्रियाले मध्यपूर्वमा जारी तनाव तत्काल मत्थर हुने सम्भावना क्षीण देखिएको छ। अब अमेरिकाले इरानमाथि थप दबाब बढाउँछ वा नयाँ सर्तसहितको काउन्टर प्रस्ताव पठाउँछ भन्नेतर्फ विश्व समुदायको ध्यान केन्द्रित भएको छ।
२८ बैशाख, माडी (चितवन) । चितवनको माडी नगरपालिका–७ देवेन्द्रपुर स्थित दक्षिण सोमेश्वर कालिका धार्मिक समितिको आयोजनामा आगामी जेठ २ गते शनिबार “११औं शनि जयन्ति उत्सव” भव्य रूपमा आयोजना हुने भएको छ।
समितिले प्रत्येक वर्ष यही दिनलाई विशेष धार्मिक उत्सवका रूपमा विविध कार्यक्रमसहित मनाउँदै आएको छ। शनि देवप्रतिको आस्था, धार्मिक परम्पराको संरक्षण तथा स्थानीय कला–संस्कृतिको प्रवर्द्धन गर्ने उद्देश्यले निरन्तर आयोजना हुँदै आएको उक्त उत्सव यस वर्ष झन् विशेष र आकर्षक ढंगले सम्पन्न गरिने आयोजकले जनाएको छ।
उत्सवका अवसरमा धार्मिक पूजा–आराधना, भजन प्रतियोगिता, दुना टपरी बनाउने प्रतियोगिता, सांस्कृतिक कार्यक्रम तथा विशेष दोहोरी प्रस्तुति आयोजना गरिनेछ। कार्यक्रमको मुख्य आकर्षणका रूपमा चर्चित दोहोरी च्याम्पियन प्रकाश पराजुलीको विशेष प्रस्तुति रहनेछ।
समितिका अध्यक्ष युवा पण्डित सुदर्शन सुबेदीका अनुसार भजन प्रतियोगिताको प्रथम, द्वितीय र तृतीय पुरस्कार क्रमशः रु. ७ हजार, रु. ५ हजार र रु. ३ हजार निर्धारण गरिएको छ। त्यसैगरी दुना टपरी बनाउने प्रतियोगितामा प्रथम हुनेलाई रु. १ हजार ५ सय, द्वितीयलाई रु. १ हजार तथा तृतीयलाई रु. ५ सय पुरस्कार प्रदान गरिनेछ।
अध्यक्ष सुबेदीका अनुसार कार्यक्रमको अवसरमा शनि धामको विकास, संरक्षण तथा धार्मिक गतिविधिमा निरन्तर सहयोग पुर्याउँदै आएका विभिन्न समूह, संस्था तथा व्यक्तिहरूलाई सम्मान समेत गरिनेछ। उहाँले धार्मिक चेतना विस्तारसँगै स्थानीय कला, संस्कृति र मौलिक परम्पराको संरक्षण गर्ने उद्देश्यले उत्सवलाई निरन्तरता दिइएको बताए ।
पछिल्लो समय उक्त क्षेत्र धार्मिक तथा पर्यटकीय दृष्टिकोणले समेत महत्त्वपूर्ण गन्तव्यका रूपमा परिचित बन्दै गएको उनको भनाइ छ । समितिले सम्पूर्ण श्रद्धालु, भक्तजन तथा स्थानीयवासीलाई कार्यक्रममा सहभागी भई उत्सवलाई भव्य र सभ्य रूपमा सफल बनाउन आग्रह गरेको छ।
२८ वैशाख, सर्लाही । सर्लाहीमा सडेको अवस्थामा एक पुरुषको शव फेला परेको छ ।
जिल्ला प्रहरी कार्यालय सर्लाहीका प्रवक्ता तथा डीएसपी सरोज राईका अनुसार हिजो आइतबार साँझ करिब ४:३० बजे गोडैता नगरपालिका–६ बग्दहस्थित चिनी मिल नजिक हुलाकी सडक खण्डको छेउमा बेवारिसे अवस्थामा शव फेला परेको हो ।
स्थानीयवासीले सडक आसपासबाट दुर्गन्ध आएपछि प्रहरीलाई खबर गरेका थिए । सूचना प्राप्त भएपछि प्रहरी चौकी गोडैताबाट प्रहरी टोली घटनास्थल पुगेको थियो ।
प्रहरीका अनुसार अन्दाजी ४० देखि ४५ वर्ष उमेर समूहका पुरुषको शव सडेगलेको अवस्थामा भेटिएको हो । शव अत्यधिक सडेकाले मृतकको पहिचान खुल्न सकेको छैन ।
मृतकको शव पोस्टमार्टमका लागि प्रादेशिक अस्पताल मलंगवामा राखिएको प्रहरीले जनाएको छ ।
घटनाबारे थप अनुसन्धान भइरहेको जिल्ला प्रहरी कार्यालय सर्लाहीले जनाएको छ । प्रहरीले मृतकको पहिचान खुलाउने प्रयाससँगै घटनाको प्रकृतिबारे अनुसन्धान जारी राखेको छ ।
२८ वैशाख, काठमाडौं । काठमाडौंमा अवतरणको क्रममा टर्किस एयरलाइन्सको विमानमा आगो लागेको छ । आगो दमकलक प्रयोग गरेर अहिले नियन्त्रणमा लिइएको छ ।
विमानमा रहेका सबै यात्रुहरु सुरक्षित रहेको नेपाल नागरिक उड्डयन प्राधिकरण (क्यान)का सूचना अधिकारी ज्ञानेन्द्र भुलले बताए ।
उनका अनुसार यात्रुहरुलाई इर्मेन्सी ढोका खोलेर उद्धार गरिएको थियो । सो विमानमा चार बच्चासहित २७७ यात्रु थिए ।
विमानमा आगो लागेपछि उद्धारका क्रममा केही यात्रुलाई सामान्य चोट लागेको छ । विमानमा केही शव र सामानहरु पनि रहेको छ ।
इस्तानबुलबाट काठमाडौं आएको TK726 विमानमा आज बिहान पौने सात बजेतिर अवतरण गर्ने क्रममा चक्कामा आगो लागेको थियो ।
उक्त विमान धावनमार्गमै रोकिएपछि अहिले अन्तर्राष्ट्रिय उडान अवतरण प्रभावित भएको छ ।
विमान धावनमार्गमै अड्किएकाले अन्तर्राष्ट्रिय उडानका ठूला जहाजहरुको नियमित तालिका प्रभावित भएको छ
वीरगंज । जिल्ला हुलाक कार्यालय पर्साले लोककल्याणकारी विज्ञापन प्रसारणको अवस्थाबारे अनुगमनलाई तीव्रता दिएको छ । सोही क्रममा आज पोखरिया स्थित रेडियो पोखरियाको स्थलगत अनुगमन गरिएको छ।
रेडियो पोखरियाका प्रबन्ध निर्देशक शम्भु कुमार सुमनका अनुसार विज्ञापन बोर्डमार्फत प्रसारण हुँदै आएका लोककल्याणकारी विज्ञापनहरूको प्रभावकारिता तथा मापदण्ड पालना भए/नभएको विषयमा अनुगमन गरिएको हो ।
जिल्ला हुलाक कार्यालय पर्साका प्रमुख नमाेनाथ यादवको नेतृत्वमा भएको अनुगमन टोलीमा जिल्ला प्रशासन कार्यालय पर्साका प्रतिनिधि शाखा अधिकृत विनय गुप्ता, नेपाल पत्रकार महासंघ पर्साका अध्यक्ष ओमप्रकाश खनाल लगायतको सहभागिता रहेको थियो ।
अनुगमनका क्रममा सञ्चार माध्यमहरूले लोककल्याणकारी विज्ञापन प्रसारण गर्दा अपनाउनुपर्ने मापदण्ड, समय तालिका तथा सामग्रीको गुणस्तरबारे समेत जानकारी लिइएको थियो । साथै, सम्बन्धित निकायले तोकेको निर्देशिका पालना गर्न सञ्चार माध्यमलाई सुझावसमेत दिइएको अनुगमन टोलीले जनाएको छ ।
प्रमुख यादवका अनुसार पर्सा जिल्लाभित्र सञ्चालनमा रहेका अन्य रेडियो तथा टेलिभिजन संस्थाहरूको पनि क्रमशः स्थलगत अनुगमन जारी रहेको छ । उनले लोककल्याणकारी सन्देश प्रभावकारी रूपमा जनतासम्म पुर्याउने उद्देश्यले यस्तो अनुगमन गरिएकाे बताए ।
हाम्रो बारेमा
यो वेवसाइट Kathmandu Bulletin को आधिकारिक न्यूज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सुचना प्रविधि, भिडियो तथा जीवनका विभिन्न आयामका समाचार र विश्लेषणलाई यसले समेट्छ।
सञ्चालक एवम् प्रबन्ध निर्देशक
सम्पादक : रिषि केश
पत्रकार : आयुष भुजेल
विज्ञापन
Kathmandu Bulletin मा विज्ञापन गर्न फोन:- 9761929175 मा सम्पर्क गर्नुहोला ।
सम्पर्क
📍 ठेगना: बिरगंज, पर्सा
☎ फोन: ९७६१९२९१७५
✉ ईमेल: kathmandubulletin.np@gmail.com
✸ सूचना बिभाग दर्ता नं : ५२५८–२०८२/२०८३