१ जेठ,वीरगञ्ज । डिभिजन वन कार्यालय बाराले शुक्रबार बिहान त्रिभुवन राजमार्गअन्तर्गत ३ नम्बर पुल नजिकको बस्तीमा डोजर चलाएर संरचना हटाएको छ। पर्सा राष्ट्रिय निकुञ्ज र डिभिजन सडक कार्यालय हेटौंडाको टोलीको सहयोगमा वन तथा सडक क्षेत्रभित्र रहेका घरटहरा हटाइएको हो।

डिभिजन वन कार्यालय बाराका प्रमुख सुजित कुमार झाले वन क्षेत्र र निकुञ्जको सीमाभित्र बस्ती तथा व्यवसाय सञ्चालन भइरहेको भन्दै हटाउन बाध्य भएको बताए। उनका अनुसार यसअघि पटक–पटक माइकिङ तथा लिखित सूचना जारी गरिएको थियो।

दुई साताअघि सडक विभागले त्रिभुवन राजपथको दुवैतर्फ २५–२५ मिटर क्षेत्र खाली गर्न सूचना जारी गरेपछि स्थानीय व्यवसायीहरूले सडक सीमाभित्रका संरचना आफैं हटाएका थिए। तर शुक्रबार थप डोजर चलाइएपछि व्यवसायी तथा स्थानीयले राज्यले दमनात्मक शैली अपनाएको आरोप लगाएका छन्।

स्थानीय अगुवा अनिल पाख्रिनले २०४५ सालदेखि व्यवसाय गर्दै आएका स्थानीयलाई पर्याप्त समय नदिई हटाइनु अन्यायपूर्ण भएको बताए। उनले सडक क्षेत्रभित्रका घरटहरा हटाइसकेपछि पनि बाँकी संरचनामा डोजर चलाइएको गुनासो गरे।

हेटौंडा–पथलैया सडकखण्डको ३ नम्बर पुल क्षेत्र यात्रुहरूको विश्रामस्थलका रूपमा परिचित थियो। उक्त क्षेत्रमा ७० भन्दा बढी होटल तथा साना व्यवसाय सञ्चालनमा रहेका थिए। बजार हटाइएपछि स्थानीयको जीविकोपार्जन संकटमा परेको भन्दै चिन्ता व्यक्त गरिएको छ।

स्थानीय व्यवसायी मिनाकुमारी रुम्बाले पसलको आम्दानीबाट ऋण लिएर हालै मात्रै नयाँ घर निर्माण गरेको बताइन्। “सडक क्षेत्रभन्दा बाहिर बसेपछि सुरक्षित हुन्छ भन्ने सोचेकी थिएँ, तर अहिले सबै गुमाएँ,” उनले भनिन्।

उद्योग वाणिज्य संघ जीतपुरसिमराका अध्यक्ष मोहन शर्माले व्यवसायीलाई स्थानान्तरणका लागि पर्याप्त समय नदिई डोजर चलाइनु अमानवीय भएको टिप्पणी गरे। उनले यसलाई स्थानीयको मानवअधिकारमाथिको दमनसमेत भएको बताए।

यता वन कार्यालयले भने पटक–पटकको सूचना बेवास्ता गरेपछि कानुनी प्रक्रिया अनुसार संरचना हटाइएको स्पष्ट

पारेको छ।

वीरगञ्जस्थित हरि खेतान बहुमुखी क्याम्पसमा क्याम्पस प्रमुख किशोरी रायमाथि कालोमोसो दल्ने प्रयास तथा दुर्व्यवहार भएको घटनाले शैक्षिक क्षेत्र तरंगित बनेको छ। असन्तुष्ट शिक्षक समूहले विरोध प्रदर्शनका क्रममा क्याम्पस प्रमुखमाथि हातपातसमेत गरेको क्याम्पस प्रशासनले जनाएको छ।

क्याम्पस प्रशासनका अनुसार करार सेवामा कार्यरत चार जना शिक्षकको सेवा अन्त्य गर्ने निर्णयपछि विवाद उत्पन्न भएको हो। क्याम्पसले २०८३ साल वैशाख २१ गतेदेखि लागू हुने गरी लालकिशोर प्रसाद पटेल, रबिन्द्र कुमार यादव, पूजा गुप्ता तथा दिलिप कुमार पण्डितको सेवा समाप्त गरिएको जनाएको छ।

सेवा अन्त्यको निर्णयप्रति असन्तुष्टि जनाउँदै सम्बन्धित पक्षले क्याम्पस परिसरमा ताला लगाएको बताइएको छ। क्याम्पस प्रमुख किशोरी रायले पटक–पटक वार्ता तथा ताला खोल्न आग्रह गरे पनि स्थिति सामान्य हुन नसकेको प्रशासनको भनाइ छ।विवाद चर्किंदै जाँदा केही व्यक्तिले क्याम्पस प्रमुख रायमाथि कालोमोसो दल्ने प्रयास गर्नुका साथै दुर्व्यवहार र हातपात गरेको क्याम्पस सञ्चालक समितिले जनाएको छ। घटनापछि केही समय क्याम्पस क्षेत्र तनावग्रस्त बनेको थियो भने सुरक्षाकर्मी परिचालन गरी अवस्था नियन्त्रणमा लिइएको बताइएको छ।

घटनाप्रति क्याम्पस प्रशासनले गम्भीर ध्यानाकर्षण भएको जनाएको छ। शैक्षिक संस्थाभित्र असहमति राख्ने लोकतान्त्रिक विधि हुँदाहुँदै हिंसात्मक तथा अपमानजनक गतिविधि हुनु दुःखद भएको प्रशासनको भनाइ छ। यस्ता घटनाले विद्यार्थीमा नकारात्मक सन्देश जाने तथा शैक्षिक वातावरण नै प्रभावित हुने सरोकारवालाहरूले बताएका छन्।

क्याम्पस प्रशासनले घटनामा संलग्न व्यक्तिमाथि आवश्यक कानुनी कारबाही गर्न सम्बन्धित निकायसँग माग गरेको छ। घटनाबारे थप अनुसन्धान तथा छलफल भइरहेको जनाइएको छ।

३१ बैशाख, काठमाडौँ । वाणिज्य बैंकहरूले जेठ महिनाका लागि सार्वजनिक गरेको नयाँ ब्याजदर सूचीमा पुनः गिरावट आएको छ ।

वित्तीय प्रणालीमा अधिक लगानीयोग्य रकम (तरलता) थुप्रिएको र कर्जाको माग न्यून रहेका कारण बैंकहरूले ब्याजदर घटाउने क्रमलाई निरन्तरता दिएका हुन् । यसपटकको गिरावटसँगै बैंकको मुद्दती निक्षेपमा पाइने ब्याजले बजारको महँगी (मूल्यवृद्धि) लाई समेत धान्न नसक्ने अवस्था सिर्जना भएको छ ।

वाणिज्य बैंकहरूले जेठका लागि व्यक्तिगत मुद्दती निक्षेपको अधिकतम औसत ब्याजदर ० दशमलव ०५९५ प्रतिशत बिन्दुले घटाएर ४ दशमलव ३४३ प्रतिशतमा झारेका छन् । नेपाल राष्ट्र बैंकको तथ्याङ्कअनुसार चैत महिनाको उपभोक्ता मुद्रास्फीति ४ दशमलव ४७ प्रतिशत रहेको छ । यसको अर्थ, बैंकमा मुद्दती निक्षेप राख्ने बचतकर्ताले पाउने प्रतिफलभन्दा बजारमा महँगीको दर उच्च छ, जसले गर्दा सर्वसाधारणको बचतको वास्तविक मूल्य घट्दै गएको देखिन्छ ।

जेठ महिनाका लागि ७ वटा बैंकले ब्याजदर घटाएका छन् भने १३ बैंकले वैशाखकै दरलाई स्थिर राखेका छन् । ब्याजदर घटाउने बैंकहरूमा सिटिजन्स, हिमालयन, कुमारी, नेपाल बैंक, एनआईसी एसिया, एनएमबी र स्ट्यान्डर्ड चार्टर्ड रहेका छन् । हाल एनएमबी बैंकले ५ वर्षभन्दा माथिको अवधिका लागि तोकेको ४ दशमलव ८० प्रतिशत ब्याजदर नै बजारको सबैभन्दा उच्च दर बनेको छ। धेरैजसो बैंकको ब्याजदर अहिले ४ देखि साढे ४ प्रतिशतको बीचमा खुम्चिएको छ ।

बैंकहरूमा पैसा थुप्रिएपछि राष्ट्र बैंकले स्थायी निक्षेप सुविधा लगायतका उपकरणमार्फत अर्बौँ रुपैयाँ खिचेर तरलता व्यवस्थापन गरिरहेको छ । निक्षेपको ब्याजदर घट्दा बैंकहरूको आधार दर (बेस रेट) कम हुन गई ऋण लिनेहरूका लागि ब्याज सस्तो हुने भए तापनि आफ्नो मिहिनेतको कमाइ बैंकमा राखेर ब्याजबाट घरखर्च चलाउने न्यून आय भएका बचतकर्ताहरू भने प्रत्यक्ष मारमा परेका छन् ।

सिरहा । सिरहाको बरियारपट्टी क्षेत्रमा हराएका ३ वर्षीय बालक अभियान्स यादव मृत अवस्थामा फेला परेका छन् । प्रहरीले बालकको शव स्थानीय पोखरीमा भेटिएको जनाएको छ । शवमा गम्भीर चोटपटकका साथै हातखुट्टा काटिएको अवस्था देखिएकाले घटनाले थप रहस्य पैदा गरेको छ ।

लक्ष्मीपुर पतारी गाउँपालिका–३ लबटोली निवासी भोगेन्द्र प्रसाद यादवका छोरा अभियान्स बुधबारदेखि सम्पर्कविहीन भएका थिए । उनी आफ्नी आमा अमृत यादवसँग बरियारपट्टी गाउँपालिका–४ सोहपुर पुगेका बेला अचानक हराएका थिए । परिवारले आफन्त तथा आसपास क्षेत्रमा खोजी गर्दा पनि पत्ता नलागेपछि साँझ इलाका प्रहरी कार्यालय बरियारपट्टीमा खबर गरिएको थियो ।

त्यसपछि प्रहरी नायब निरीक्षक ज्योती प्रकाश कार्कीको नेतृत्वमा खटिएको टोलीले खोजी अभियान सुरु गरेको थियो । खोजतलासकै क्रममा गाउँ नजिकैको पोखरीमा बालकको शव फेला परेको प्रहरीले जनाएको छ ।

प्रहरीका अनुसार शवको अवस्था अत्यन्त शंकास्पद देखिएकाले घटनामाथि गम्भीर अनुसन्धान सुरु गरिएको छ । शव पोस्टमार्टमका लागि अस्पताल पठाइएको छ ।

प्रारम्भिक अनुसन्धानमा बालकका आमाबुबाबीच विगत तीन वर्षदेखि पारिवारिक विवाद रहेको खुलेको प्रहरीले जनाएको छ । बालकका बुबा वैदेशिक रोजगारीमा रहेका छन् भने आमा माइतीमै बस्दै आएकी थिइन् ।