नेपाल पत्रकार महासंघ बारा शाखाको कार्यसमिति बैठकमै कुटपिट भएको छ। आगामी जेठ ९ गते हुने वार्षिक साधारणसभा तथा पुरस्कार वितरणसम्बन्धी तयारीका लागि बुधबार दिउँसो कलैयास्थित महासंघ कार्यालयमा बसेको बैठक तनावग्रस्त बनेपछि पत्रकार धिरेन्द्र तिवारीमाथि हातपात भएको हो।

बैठकका क्रममा महासंघका सचिव पुष्पराज खतिवडासँग विवाद चर्किएपछि आफूमाथि एक्कासी आक्रमण भएको तिवारीले बताएका छन्। उनका अनुसार विवाद बढ्दै जाँदा खतिवडाले हातको बुढीऔँलामा टेकेर घाइते बनाएको र पछि बेल्चाले समेत प्रहार गरेको उनको आरोप छ।

‘बैठक चलिरहेकै बेला ममाथि एक्कासी आक्रमण भयो। मेरो हातको बुढीऔँला रगताम्मे हुने गरी टेकियो र कुटपिट गरियो,’ तिवारीले भने, ‘त्यसपछि अरु केही व्यक्तिहरूले समेत ममाथि हातपात गरे।’

घटनामा संलग्न भनिएका तिवारी र खतिवडा दुवै प्रेस चौतारीनिकट पत्रकार हुन्। महासंघले प्रदान गर्ने पुरस्कार वितरणमा अध्यक्ष, सचिवलगायत केही पदाधिकारीले आर्थिक चलखेल गरेको भन्ने आरोप लागेपछि तिवारीसहित केही कार्यसमिति सदस्यहरूले त्यसको विरोध गर्दै आएका थिए। सोही विषयलाई लिएर बैठकभित्रै बहस चर्किँदै गएपछि अवस्था तनावपूर्ण बनेको बताइएको छ।

बैठककै क्रममा प्रेस चौतारीका जिउतप्रसाद यादव र प्रेस युनियनका प्रभु प्रसाद यादवबीच समेत भनाभन हुँदै कुर्सी हानाहानको अवस्था सिर्जना भएको प्रत्यक्षदर्शीहरूले बताएका छन्। त्यसपछि बैठक अवरुद्ध बनेको छ भने कार्यालय परिसरमै असहज वातावरण सिर्जना भएको थियो।

यता नेपाल पत्रकार महासंघ बारा शाखाका सहसचिव तथा सूचना अधिकारी इन्दीप कोइरालाले घटनाप्रति गहिरो दुःख व्यक्त गर्दै बैठकमै भएको कुटपिटको घटनाले संस्थाको गरिमा र अनुशासनमा गम्भीर प्रश्न उठाएको बताएका छन्। उनले आफू सो बैठकमा उपस्थित हुन नसकेको स्पष्ट पार्दै यदि उपस्थित भएको भए स्थिति नियन्त्रणमा लिन सक्ने दाबी गरे।

कोइरालाका अनुसार महासंघजस्तो पेशागत संस्थाभित्र यस प्रकारको हिंसात्मक घटना हुनु अत्यन्तै दुर्भाग्यपूर्ण हो र यसले सम्पूर्ण पत्रकार समुदायको छविमा नकारात्मक असर पारेको छ। उनले घटनाको वास्तविक कारण र संलग्न पक्षहरूको पहिचान गर्न निष्पक्ष छानबिन आवश्यक रहेको उल्लेख गर्दै, आवश्यकता परे छानबिन समिति गठन गर्ने वा कानुनी प्रक्रिया अघि बढाउन प्रहरीको सहयोग लिने बताए।

उनले सबै पक्षलाई संयमित रहन आग्रह गर्दै भविष्यमा यस्ता घटना दोहोरिन नदिन संस्थागत अनुशासन र आपसी समन्वय मजबुत बनाउनुपर्नेमा जोड दिए।

पत्रकार महासंघ बाराका अध्यक्ष रमेश बहादुर क्षेत्री र सचिव पुष्पराज खतिवडालाई प्रहरीले नियन्त्रणमा लिएको छ।

साभार-sajha nigrani 

काठमाण्डौ ६ पर्सा 

पर्सा जिल्लाको बिभिन्न नाकाबाट हुने अपराधीक गतिविधि तस्करी, नेपाल बाट भारत तर्फ र भारत बाट नेपाल भित्रिने वस्तुहरूको प्रमाण सहितको समाचार र भिडियाे प्रकाशित हुन् साथ कारवाही हुने गरेको छ। 

तर ईलाका प्रहरी कार्यालय पोखरिया कोे मातहतमा रहेको नाकाहरु बाट हुने तस्करीको मूख्य सेटिङ् मिलाउने भूमिका वर्षौं देखि कार्यरत रहेका रमाकान्त पासवान अहीले ईलाका प्रहरी कार्यालय पोखरीयाका राजा बनेर हिँडेका छन्। 

पटक पटक थुप्रै समाचार प्रकाशित भएपनि नाकामा रहेका चौकी इन्चार्ज फेरिए घुमुवा फेरिए तर अहीले सम्म प्रमूख घुमुवा पासवान फेरिएन। पोखरीया प्रहरी निरीक्षक फेरिएपनि आफ्नो पहुँच र सेटिङ् कोे साम्राज्य देखाउँदै अहिले पनि घुमुवा रमाकान्त पासवान आफ्नो असुली आतंक तीब्र रुपमा बढाएका हुन्। 

 ग्रामीण क्षेत्रबाट वीरगञ्ज जोड्ने मुख्य बाटो तीलावे पूल देखि भिस्वा, मिर्जापुर, जानकीटोला, महुवन सम्म पोखरियाकोे क्षेत्र पर्ने भएकाले कूनै पनि नाका प्रयोग गरी कतै कूनै ठाउँमा तस्करीको सामान ओसारपसार गर्न घुमुवा पासवानले आफ्नो असुली गरी सहज बाटो बनाएको एक व्यापारीले नाम उल्लेख न गर्ने गरी यस सँस्था लाई जानकारी दिएका छन। 

पासवान कहीले अमरपट्टि चौकी कहीले जानकीटोला त कहीले कालिकामाई क्षेत्रकोे चौकी त कहिले भिस्वा चौकी तीर कार्यरत रहेको झुटो विवरण दिने गरेका छन्। क्षेत्रको अनेकौ नाका कोे चौकी बाट कमिसन सहीत आफ्नो र ईलाका प्रहरी कार्यालय पोखरीया का प्रहरी निरीक्षक कोे महिनावारी बुझी हरेक बस्तुको तस्करी गर्ने ग्रीन सिग्नल दिने गरेका छन्। 

ईलाका प्रहरी कार्यालय पोखरियाका प्रमूख फेरिए निति नियम फेरियो तर यो तस्करीको साम्राज्य चलाउने घुमुवा माथि कहीले र कसले कारवाही गर्ने यस विषयमा सम्बन्धित निकायले ध्यान दिन अति आवश्यक बुझिन्छ। 

६ जेठ,काठमाडौं । करिब पाँच वर्षदेखि सञ्चालन हुँदै आएको बुद्धएयरको नेपालगञ्ज–पोखरा सिधा हवाई उडान केही समयका लागि स्थगित गरिएको छ।

बुद्धएयर नेपालगञ्ज स्टेशनका प्रमुख विनितविक्रम शाहका अनुसार भारतबाट आउने धार्मिक पर्यटकको संख्या घट्नु र इन्धन खर्च बढ्नुका कारण उडान एक महिनाका लागि रोकिएको हो। मलमासका कारण भारतीय पर्यटकको आगमन कम हुनु पनि उडान स्थगनको कारण भएको उनको भनाइ छ।

विसं २०७८ साउन १७ गतेदेखि सातामा तीन दिन सञ्चालन हुँदै आएको यो सिधा उडान मंगलबारदेखि स्थगित गरिएको हो। पर्यटन प्रवर्द्धन र यात्रु सहजताका लागि सुरु गरिएको सेवा हाल अनिश्चित बनेको छ।

उडान बन्द भएपछि पश्चिम नेपालका यात्रु, पर्यटन व्यवसायी र सर्वसाधारण प्रभावित भएका छन्। अब यात्रुहरू पुनः करिब १४ घण्टाको सडक यात्रामा निर्भर हुनुपर्ने अवस्था आएको छ।

नाट्टा नेपालगञ्जको पहलमा सुरु गरिएको यो सेवा निजी क्षेत्रको प्रयास भए पनि सरकारी पहल अभावका कारण दीर्घकालीन रूपमा टिकाउन कठिन भएको पर्यटन व्यवसायीहरूको भनाइ छ।

सुरुमा १८ सिट क्षमताको विमानमार्फत सञ्चालन गरिएको उडानले बर्दिया राष्ट्रिय निकुञ्ज, कर्णाली चिसापानी र राराजस्ता गन्तव्यमा पर्यटक आवागमन सहज बनाएको थियो। साथै भारतका लखनउ, कानपुर र दिल्लीबाट आउने पर्यटकलाई पनि पोखरा पुग्न सहज भएको थियो।

उडान सुरु हुँदा रु ४,९३५ देखि रु ७,६३५ सम्म भाडा निर्धारण गरिएको थियो। यात्रु संख्या घट्दै गएपछि र इन्धन मूल्य बढेपछि सेवा निरन्तर सञ्चालन गर्न कठिन भएको बुद्धएयरले जनाएको छ।

नेपाल प्रहरीको रणनीतिक योजना २०८३-२०८५ सार्वजनिक गर्दै प्रहरी महानिरीक्षक दानबहादुर कार्की ।

नवप्रवर्तन, इमान्दारिता र तत्परतामार्फत् मानवअधिकारमैत्री नागरिककेन्द्रीत प्रहरी सेवालाई अझ परिस्कृत गर्दै लैजाने र रुपान्तरण गर्ने ध्येयका साथ ७ वटा रणनीतिक क्षेत्र, ३६ वटा रुपान्तरणकारी रणनीति र ९९ वटा मुख्य कार्यक्रम समेटेर नेपाल प्रहरीले रणनीतिक योजना २०८३-२०८५ सार्वजनिक गरेको छ । प्रहरी महानिरीक्षक दानबहादुर कार्कीको प्रमुख आतिथ्यतामा सार्वजनिक गरिएको नेपाल प्रहरीको रणनीतिक योजना २०८३-२०८५ ले नेपाल प्रहरीको आधुनिकीकरणमा ठूलै फड्को मार्ने अपेक्षा गरिए पनि त्यसको लक्ष्य भेट्टाउन परम्परागत बजेटले नधान्ने देखिन्छ ।

रणनीतिक योजनाको कार्यान्वयन र अनुगमनको पाटोलाई प्रभावकारी बनाउन विगतका योजना कार्यान्वयनमा देखिएका समस्या तथा कमजोरीहरुको पूर्वानुमान गरी सम्भावित चुनौतीहरुको निराकरण गर्ने उपायसमेत सुझाइएको नेपाल प्रहरीको रणनीतिक योजना २०८३-२०८५ मा जनशक्तिको सेवा विशिष्ठिकृत कार्य विवरण, कार्य सम्पादनमा आधारित वृत्ति-विकास, अपराध-अनुसन्धान, प्रहरी कार्यको विशिष्ठिकरण, आधारभूत क्षमता स्थापना, प्रहरी-प्रशासन र सेवा प्रवाहका प्रणालीहरुको कार्य दक्षता, कार्य प्रभावकारितामा सुधार अल्पकालीन लक्ष्यमा उल्लेख छ ।

त्यसैगरी नीतिगत र कानूनी सुधार, समुदाय-प्रहरी सहकार्य संस्थागत र सुदृढ, समस्या, पूर्वानुमानमा आधारित अपराध रोकथाम र नियन्त्रण प्रणाली, सुपरीवेक्षण, अनुगमन, मूल्याङ्कनका वैज्ञानिक मापदण्डहरुको विकास र कार्यान्वयनसमेत अल्पकालीन लक्ष्यमा समावेश गरिएको छ । आगामी साउन १ गतेबाट कार्यान्वयनमा जाने नेपाल प्रहरीको रणनीतिक योजना २०८३-२०८५ मा समाजमा शान्ति-सुव्यवस्था, न्यायिक पहुँच, प्रहरी सेवा प्रवाहको स्तरमा अभिबृद्धिद्वारा सु-शासन प्रवर्द्धन, पारदर्शी प्रहरीद्वारा जनविश्वास र सन्तुष्टीको स्तरमा अभिबृद्धि, अपराधको रोकथाम, नियन्त्रण, अनुसन्धानमा प्रभावकारिता, दक्ष, नैतिकवान र उत्प्रेरित मानव संशाधन, सुदृढ पूर्वाधार र कार्य वातावरण दीर्घकालीन लक्ष्यमा समेटिएको छ ।

सरकारको १ सय बूँदे कार्ययोजनालाई सफल पार्ने ध्येय राखेको झैं लाग्ने नेपाल प्रहरीको रणनीतिक योजना २०८३-२०८५ सार्वजनिक कार्यक्रममा प्रहरी महानिरीक्षक दानबहादुर कार्कीले ‘सरकारका कार्ययोजना सफल पार्नु आफ्नो तर्फबाट हाम्रो प्रमुख दायित्व हो’ भन्दै नेपाल प्रहरीलाई परम्परागत पुलिसिङबाट आधुनिक, वैज्ञानिक र प्रविधिमा आधारित संगठनका रुपमा विकास गर्ने मार्गचित्र कोरिएको प्रष्ट्याएका थिए । नेपाल प्रहरीका केन्द्रीय प्रवक्ता प्रहरी नायब महानिरीक्षक अविनारायण काफ्ले भन्छन्- ‘२०८०-२०८२ को रणनीतिक योजनाको समीक्षासहित नेपाल प्रहरी संगठनलाई समय-सापेक्ष बनाउँदै झन् जनउत्तरदायी, मानवअधिकार-नागरिकमैत्री आधुनिक नेपाल प्रहरी बनाउने गन्तव्य निर्धारण गरेर रणनीतिक योजना सार्वजनिक गरिएको हो ।’

लोकतान्त्रिक व्यवस्थामा नागरिकको गुनासो सुनुवाई गर्न प्रविधिको उच्चतम प्रयोग गर्ने अग्रणी संगठन नेपाल प्रहरीको रणनीतिक योजना २०८३-२०८५ मा पनि प्रविधिको झन् बढी उपयोग गर्दै आधुनिक पुलिसिङद्वारा नागरिक सेवामा समर्पित रहने उल्लेख छ । अन्वेषण, योजना तथा विकास निर्देशनालयका प्रमुख प्रहरी नायब महानिरीक्षक राजेन्द्रप्रसाद भट्ट प्रविधियुक्त, प्रमाणमुखी र सूचनामा आधारित अनुसन्धानात्मक क्षमताको विकासद्वारा अपराध-अनुसन्धानको प्रभावकारिता अभिबृद्धि गर्दै कृत्रिम बौद्धिकतालगायत सूचना प्रविधिका प्रणालीहरुलाई क्रमशः मूल प्रवाहीकरण गरी सांगठनिक कार्य दक्षता बढाउँदै सेवा प्रवाहमा प्रभावकारिता, चुस्तता र नागरिकको पहुँच अभिबृद्धि गर्ने लक्ष्य रहेको बताउँछन् ।

आवश्यक साधन-स्रोतको पर्याप्तताविना भएको साधन-स्रोतको उच्चतम प्रयोगद्वारा नेपाल प्रहरीको रणनीतिक योजना २०८०-२०८२ मा ९४.७२ प्रतिशत समग्र उपलब्धी प्राप्त भएको पाइएको छ । उक्त योजनामा १३ वटा मुख्य लक्ष्यहरु, ४० वटा कार्यगत उद्देश्यहरु र २ सय ७ वटा क्रियाकलाप समेटिएका थिए । ‘चुस्त प्रहरी सेवा र सुरक्षित समुदाय’ का लागि नेपाल प्रहरीले नागरिक सहायता तथा गुनासो व्यवस्थापन अनलाइन प्रणालीको पनि शुभारम्भ गरेको छ । यसको प्रमुख ध्येय बदलिँदो समयअनुसार नागरिकका आकांक्षा, भावना र चाहनालाई सम्बोधन गर्नु नै हो । नेपाल प्रहरी अहिले कहाँ छ, बदलिएर कस्तो हुनेछ ? यसको पूर्णखाका नेपाल प्रहरीको रणनीतिक योजना २०८३-२०८५ मा प्रष्ट रुपमा कोरिएको छ । यसको प्रभावकारी कार्यान्वयनको सुनिश्चितताका लागि वार्षिक कार्ययोजनाहरु निर्माण गरिने, प्रहरी महानिरीक्षकदेखि इलाका प्रहरी कार्यालयसम्मका प्रमुखहरुले आ-आफ्ना सुपरीवेक्षकसँग गर्ने कार्य सम्पादन सम्झौताको सम्पन्न गर्नुपर्ने क्रियाकलापहरुभित्र रणनीतिक योजनाका कार्यक्रमहरु समेत समावेश गरिने नेपाल प्रहरी प्रधान कार्यालयले जनाएको छ ।

दक्षिण एसियामा उत्कृष्ठ अनुसन्धाता कहलिएको, मुलुकभर सरकारको पहिलो उपस्थिति जनाउने नेपाल प्रहरी अहिले पनि भौतिक पूर्वाधार तथा साधन-स्रोतको पर्याप्तताविनै नागरिक सेवामा समर्पित छ । कतिपय कार्यालयहरु भाडाकै घरमा छन् भने कतिपय कार्यालयहरुमा सवारी साधन नै छैनन् । यही अवस्थाबीच सरकारले निर्धारण गरेको १ सय बूँदे कार्ययोजनालाई सफल पार्ने ध्येयका साथ आधुनिक पुलिसिङको अवधारणासहित सार्वजनिक गरिएको नेपाल प्रहरीको रणनीतिक योजना २०८३-२०८५ मा उल्लेखित प्रावधानले गन्तव्य भेट्टाउन सरकारले आगामी आर्थिक वर्षको बजेटमा पर्याप्त साधन-स्रोतको व्यवस्था नगरिदिने हो भने सम्भव हुन गाह्रो छ ।