पर्सा ११ कार्तिक

चुनाव नजिकिँदै जाँदा धोबीनी गाउँपालिकाको भलो चाहने, विकास गर्ने र जनताको सेवामा समर्पित हुने भन्दै विभिन्न आश्वासन बाँड्नेहरूको भीड बढ्न थालेको छ। जनताको सुखदुःखमा साथ दिने र गाउँपालिकालाई समृद्ध बनाउने प्रतिबद्धता व्यक्त गर्नेहरू सक्रिय भइरहेका छन्। तर यतिबेला जनताले एउटा महत्वपूर्ण प्रश्न उठाउन थालेका छन्—विगतमा भएका भनिएका भ्रष्टाचार, अनियमितता र बेथितिबारे प्रश्न कसले गर्ने? जनताको करबाट संकलित रकमको हिसाब कसले माग्ने?

शिक्षा, स्वास्थ्य, कृषि, भौतिक पूर्वाधार तथा अन्य विकासका क्षेत्रमा भएका कामको वास्तविक अवस्था के छ? विद्यालयको शैक्षिक गुणस्तर, स्वास्थ्य संस्थाको सेवा प्रवाह, किसानका समस्या र विकास निर्माणका योजनाहरूको प्रभावकारिता कस्तो छ? यी प्रश्नको जवाफ जनताले खोजिरहेका छन्।

चुनावका बेला विकासका ठूला सपना बाँड्नेहरूलाई अब जनताले विगतका कामको हिसाब माग्नुपर्छ। जनताको करबाट खर्च भएको रकम कहाँ, कसरी र कुन प्रयोजनमा प्रयोग भयो? विकासका नाममा विनियोजित बजेटले जनताको जीवनमा कति परिवर्तन ल्यायो? योजनाहरू समयमै सम्पन्न भए कि भएनन्? यस्ता विषयमा पारदर्शिता र जवाफदेहिता सुनिश्चित हुनु आवश्यक छ।

समाज सुधार्ने, सुशासन कायम गर्ने र जनताको जीवनस्तर उकास्ने कुरा गर्नेहरूले पहिले आफ्नै गाउँपालिकाभित्रका बेथिति सुधार्ने साहस देखाउनुपर्छ। जनतालाई आश्वासन मात्र होइन, कामको प्रमाण चाहिएको छ। भाषणभन्दा परिणाम र प्रतिबद्धताभन्दा कार्यसम्पादन महत्वपूर्ण हुन्छ।

सार्वजनिक काममा प्रश्न उठाउनेहरूलाई कहिलेकाहीँ विरोधी, विकासविरोधी वा अनावश्यक आलोचकको संज्ञा दिइने गरेको छ। तर लोकतन्त्रमा प्रश्न उठाउनु नागरिकको अधिकार हो। सार्वजनिक पदमा बसेका व्यक्ति र संस्थाहरू जनताप्रति उत्तरदायी हुनुपर्छ। सत्य प्रश्नलाई अपमान, आरोप वा धम्कीका माध्यमबाट दबाउन खोज्नु लोकतान्त्रिक मूल्यविपरीत हो।

धोबीनी गाउँपालिकाका जनताले अब व्यक्तिको जयजयकारभन्दा कामको मूल्याङ्कन गर्नुपर्ने समय आएको छ। चुनावका बेला बाँडिने आश्वासनलाई मात्र आधार बनाएर होइन, विगतको कार्यसम्पादन, पारदर्शिता, इमानदारी र जनताप्रतिको जिम्मेवारीका आधारमा नेतृत्व छनोट गर्नुपर्छ।

अब जनताको आवाज स्पष्ट हुनुपर्छ—

आश्वासन होइन, कामको प्रमाण चाहिन्छ।

भाषण होइन, विकासको परिणाम चाहिन्छ।

व्यक्तिको प्रशंसा होइन, जनताको प्रश्नको जवाफ चाहिन्छ।

चुनाव नजिकिँदै गर्दा धोबीनी गाउँपालिकामा जनताको एउटै माग हुनुपर्छ—विगतको हिसाब सार्वजनिक गर, वर्तमानमा जवाफदेही बन र भविष्यका लागि स्पष्ट योजना प्रस्तुत गर।

जनताको कर, जनताको अधिकार र जनताको भविष्यसँग जोडिएका विषयमा प्रश्न उठाउनु विरोध होइन, जिम्मेवार नागरिकको कर्तव्य हो।

अब जनता चुप लागेर आश्वासन सुन्ने होइनन्, हिसाब माग्नेछन।

बिरगंज, पर्सा, ९ कार्तिक 

चितवन । भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले जनताले मन्त्रीलाई भेट्न धाउनुपर्ने नभई मन्त्री स्वयं जनतामाझ पुगेर उनीहरूका समस्या सुन्नुपर्ने बताएकी छन्।

भरतपुर विमानस्थलमा पत्रकारहरूसँग कुराकानी गर्दै मन्त्री रावलले सरकारले गरिरहेका काम, आगामी योजना तथा जनताको हितमा चालिएका कदमबारे नागरिकलाई जानकारी गराउन आफू जनतामाझ पुगेको बताइन्।

उनका अनुसार सरकारको प्राथमिकतामा भूमिहीन नागरिकका समस्या समाधान गर्ने तथा सहकारी पीडितको बचत फिर्ता गर्ने विषय रहेका छन्।

समस्याग्रस्त सहकारीमा बचत गरेका नागरिकको रकम फिर्ता गर्ने प्रक्रिया सुरु भइसकेको उल्लेख गर्दै मन्त्री रावलले उक्त कार्यलाई थप तीव्रता दिइने बताइन्। लामो समयदेखि बचत फिर्ता नपाएर पीडामा रहेका नागरिकलाई राहत दिन सम्बन्धित सहकारीमाथि आवश्यक दबाब दिनुपर्नेमा उनले जोड दिइन्।

मन्त्री रावलले सरकारका योजना र कार्यप्रगतिबारे जनतालाई प्रत्यक्ष जानकारी गराउनु आवश्यक रहेको बताउँदै नागरिकका गुनासा सुन्न र समस्या समाधानका लागि सरकार प्रतिबद्ध रहेको उल्लेख गरिन्।

भूमिहीन नागरिकको समस्या सम्बोधन गर्ने विषयमा बोल्दै उनले लामो समयदेखि बसोबास गर्दै आएका नागरिकलाई सोही स्थानको जग्गाको स्वामित्व उपलब्ध गराउने प्रक्रियामा रहेका कानुनी जटिलता हटाउन काम भइरहेको जानकारी दिइन्।

उनले आवश्यक नीतिगत सुधार गरिसकिएको र कार्यान्वयनका क्रममा देखिने अवरोधसमेत समाधान गर्दै सरकार अघि बढ्ने बताइन्।

भूमिहीन नागरिकलाई बसोबास गरिरहेको स्थानबाट हटाइने हो कि भन्ने आशङ्का नगर्न आग्रह गर्दै मन्त्री रावलले जग्गाधनी पुर्जा उपलब्ध गराउने प्रक्रियालाई अघि बढाइने स्पष्ट पारिन्।

मन्त्री रावलका अनुसार जनताको समस्या बुझ्न, सरकारी कामबारे जानकारी दिन र नागरिकका अपेक्षा सम्बोधन गर्न मन्त्री स्वयं जनतामाझ पुग्नु आवश्यक छ।

विराटनगर, ८ कात्तिक ।

विराटनगरमा लामो समयदेखि व्यवसाय गर्दै आएका ६५ वर्षीय लालजीप्रसाद गुप्ता मृत अवस्थामा भेटिएका छन्। मोरङको विराटनगर महानगरपालिका–६ र सुनसरीको बर्जु गाउँपालिका जोड्ने केशलिया खोलाको पुल नजिकै उनको शव फेला परेको हो।

भारतीय नागरिक रहेका गुप्ता विगत ३० वर्षदेखि विराटनगर–६ स्थित महावीर रोडमा ‘लाल ब्याट्री पसल’ सञ्चालन गर्दै आएका थिए।

बोरामा बेरिएको अवस्थामा शव फेला आइतबार बिहान सुनसरीको बर्जु गाउँपालिका–२ भीमपुरतर्फ खोला किनारमा स्थानीयले बोरामा पोको पारिएको अवस्थामा शव देखेपछि प्रहरीलाई खबर गरेका थिए।

जिल्ला प्रहरी कार्यालय सुनसरीका प्रवक्ता तथा प्रहरी नायब उपरीक्षक (डिएसपी) चन्द्र खड्काका अनुसार घटनाको प्रकृति हेर्दा गुप्ताको हत्या गरी शव फालिएको जस्तो देखिएको छ। बोरामा बेरिएर फालिएकाले घटना शंकास्पद रहेको र प्रहरीले विभिन्न कोणबाट विस्तृत छानबिन सुरु गरिसकेको उनले जानकारी दिए।

घटनास्थलमा तालिमप्राप्त कुकुर तथा प्राविधिक टोली परिचालन गरी प्रहरीले आवश्यक प्रमाणहरू संकलन गरेको जनाएको छ।

८ कातिक,बारा । मकवानपुरको हेटौँडामा करिब १५ किलो चाँदीजस्तो देखिने वस्तुसहित चार जना भारतीय नागरिक पक्राउ परेका छन्।

हेटौँडा उपमहानगरपालिका–१५, रातोमाटेबाट आइतबार दिउँसो उनीहरूलाई प्रहरीले पक्राउ गरेको हो। विशेष सूचनाका आधारमा प्रहरी चौकी रातोमाटेबाट प्रहरी नायब निरीक्षक प्रमोदप्रसाद साहको कमान्डमा खटिएको टोलीले वीरगञ्जबाट काठमाडौँतर्फ जाँदै गरेको ना.३ च ७०७९ नम्बरको सानो भ्यान जाँच गर्ने क्रममा उक्त वस्तु फेला पारेको थियो।

 भ्यानमा सवार चारै जना भारतीय नागरिकलाई चाँदीजस्तो देखिने करिब १५ किलो वस्तुसहित नियन्त्रणमा लिइएको प्रहरीले जनाएको छ।

पक्राउ परेका व्यक्तिहरू र बरामद वस्तुका सम्बन्धमा प्रहरीले थप अनुसन्धान गरिरहेको जनाएको छ। बरामद वस्तु वास्तविक चाँदी हो वा होइन भन्नेबारे भने पुष्टि हुन बाँकी छ।