२२ वैशाख, काठमाडौं । नेपाल उद्योग वाणिज्य महासंघको नयाँ कार्यसमिति चयनका लागि मतदान सुरु भएको छ । राष्ट्रिय प्रज्ञा प्रतिष्ठानमा आज मतदान भइरहेको छ ।

सोमबार महासंघको ६० औं वार्षिक साधारणसभा उद्घाटन भएको थियो । महासंघको विधान अनुसार वरिष्ठ उपाध्यक्ष स्वतः अध्यक्ष हुने प्रावधान छ । सोही अनुसार अन्जन श्रेष्ठ स्वतः अध्यक्ष हुनेछन् ।

तर उपाध्यक्ष र कार्यकारिणी समिति सदस्यका लागि भने आज मतदान भइरहेको छ । महासंघमा हेमराज ढकाल र शिव प्रसाद घिमिरेका दुई प्यानल चुनावी मैदानमा छन् ।

ढकाल प्यानलले वरिष्ठ उपाध्यक्षमा ढकाललाई उम्मेदवार घोषणा गरिसकेको छ । अब निर्वाचित हुने वरिष्ठ उपाध्यक्ष श्रेष्ठ पछि स्वतः अध्यक्ष हुनेछन् । महासंघका अध्यक्ष चन्द्र ढकाल, वरिष्ठ उपाध्यक्ष अन्जन श्रेष्ठ लगायतले मतदात गरिसकेका छन् ।

२२ बैशाख, काठमाडौं । निजी क्षेत्रको छाता संगठन नेपाल उद्योग वाणिज्य महासंघको नयाँ नेतृत्व चयनका लागि निर्वाचन प्रक्रिया आज मंगलबारदेखि विधिवत् रूपमा सुरु भएको छ ।

महासंघको विधानअनुसार नयाँ कार्यसमिति छनोट गर्नका लागि अहिले बिहानदेखि मतदान कार्य अगाडि बढाइएको हो । महासंघको विद्यमान वैधानिक व्यवस्थाअनुसार वर्तमान वरिष्ठ उपाध्यक्ष स्वतः अध्यक्ष हुने प्रावधान रहेको छ। सोही बमोजिम अञ्जान श्रेष्ठ महासंघको आगामी कार्यकालका लागि निर्विरोध अध्यक्ष बन्ने निश्चित भएको छ । अध्यक्ष पदको टुंगो लागिसके पनि अन्य महत्वपूर्ण पदहरूका लागि भने चुनावी मैदानमा कडा प्रतिस्पर्धा देखिएको छ ।

प्यानलगत प्रतिस्पर्धामा उत्रिए उम्मेदवार

वरिष्ठ उपाध्यक्षसहितका अन्य पदाधिकारी र कार्यकारिणी सदस्य पदका लागि भने उद्योगी-व्यवसायीहरू दुई फरक प्यानल बनाएर चुनावी मैदानमा उत्रिएका छन् । दुवै समूहले आफ्ना एजेन्डाहरू अघि सार्दै मतदाता रिझाउन र कार्यसमितिमा आफ्नो वर्चस्व कायम गर्न कसरत गरिरहेका छन् ।

महासंघको यो निर्वाचनले आगामी दिनमा निजी क्षेत्रको मुद्दालाई सरकारसमक्ष कसरी लैजाने र वर्तमान आर्थिक चुनौतीहरूलाई कसरी सामना गर्ने भन्ने दिशा निर्देश गर्ने अपेक्षा गरिएको छ । मतदान प्रक्रिया सकिएलगत्तै गणना सुरु गरी आजै वा भोलिसम्ममा अन्तिम परिणाम सार्वजनिक गर्ने तयारी निर्वाचन समितिको रहेको छ ।

२२ बैशाख, काठमाडौं । स्थानीय बजारमा मंगलबार सुन र चाँदी दुवैको मूल्यमा ठूलो गिरावट आएको छ ।

नेपाल सुनचाँदी व्यवसायी महासंघका अनुसार वैशाख २२ गते सुनको मूल्य प्रतितोला ३ हजार ८ सय रुपैयाँले ओरालो लागेको हो भने चाँदीको मूल्यमा पनि उल्लेख्य कमी देखिएको छ । पछिल्लो विवरण अनुसार, आज छापावाल सुन प्रतितोला २ लाख ९१ हजार रुपैयाँमा कारोबार भइरहेको छ। अघिल्लो दिन सोमबार सुन प्रतितोला २ लाख ९४ हजार ८ सय रुपैयाँमा खरिदबिक्री भएको थियो । एकै दिन ३ हजार ८ सय रुपैयाँको यो गिरावटलाई बजारमा पछिल्लो समयकै ठूलो गिरावट मानिएको छ ।

चाँदीको भाउमा पनि मन्दी

सुनसँगै चाँदीको मूल्यमा पनि गिरावट आएको छ । मंगलबार चाँदी प्रतितोला १५० रुपैयाँले घटेर ४ हजार ८ सय ४० रुपैयाँ कायम भएको छ। यसअघि सोमबार चाँदी प्रतितोला ५ हजार ३० रुपैयाँमा कारोबार भएको थियो ।

अन्तर्राष्ट्रिय बजारमा हुने उतारचढावका कारण नेपाली बजारमा पनि मूल्य प्रभावित भएको व्यवसायीहरूले बताएका छन् । पछिल्लो केही दिनदेखि सुनको मूल्यमा निरन्तर सामान्य गिरावट आइरहेकोमा आज भने भारी गिरावट देखिएको हो । यसले सुन खरिद गर्ने तयारीमा रहेका उपभोक्तालाई केही राहत मिलेको छ ।

२२ बैशाख, काठमाडौं । आगामी आर्थिक वर्षको बजेट निर्माणको प्रक्रियालाई तीव्रता दिँदै अर्थ मन्त्रालयले विभिन्न नौ वटा मन्त्रालयका विभागीय मन्त्री र सचिवहरूसँग मन्त्रालयगत बजेट छलफल सम्पन्न गरेको छ ।

सोमबार बिहान ११ बजेदेखि सुरु भई साँझ साढे ७ बजेसम्म चलेको उक्त छलफलमा आगामी वर्षको नीति तथा कार्यक्रम र बजेटको सिलिङबारे विस्तृत संवाद भएको हो ।

बजेट तथा कार्यक्रम महाशाखाले तय गरेको कार्यतालिका अनुसार पहिलो दिन गृह मन्त्रालयबाट छलफलको सुरुआत गरिएको थियो । त्यसलगत्तै श्रम, रोजगार तथा सामाजिक सुरक्षा, उद्योग, वाणिज्य तथा आपूर्ति, कानुन, सञ्चार, शिक्षा, खेलकुद, संघीय मामिला र भूमि व्यवस्था मन्त्रालयसँग छुट्टाछुट्टै चरणमा छलफल अघि बढाइएको थियो ।

अर्थमन्त्रीको नेतृत्वमा स्रोत व्यवस्थापनको खोजी

लफलको नेतृत्व अर्थमन्त्री डा.स्वर्णिम वाग्लेले गर्नुभएको थियो । छलफलमा अर्थ र राजस्व सचिव, बजेट लेखन समितिका सदस्यहरू र विभिन्न महाशाखा प्रमुखहरूले सम्बन्धित मन्त्रालयका मन्त्री र सचिवहरूसँग स्रोत व्यवस्थापन र खर्चको प्राथमिकताका विषयमा परामर्श गरेका थिए ।

विशेष गरी मन्त्रालयहरूले प्रस्ताव गरेका नयाँ कार्यक्रम र तिनको कार्यान्वयन योग्यतामाथि अर्थ मन्त्रालयले प्रश्न र सुझाव राखेको बुझिएको छ ।

विभागीय मन्त्रीहरूको सक्रिय सहभागिता

मन्त्रालयगत छलफलमा श्रममन्त्री रामजी यादव, उद्योगमन्त्री गौरी कुमारी, कानुनमन्त्री सोविता गौतम, सञ्चारमन्त्री डा. विक्रम तिमिल्सिना, शिक्षामन्त्री सस्मित पोखरेल र संघीय मामिलामन्त्री प्रतिभा रावल लगायतको उपस्थिति रहेको थियो । मन्त्रीहरूले आफ्ना मन्त्रालयका प्राथमिकताका योजनाहरू प्रस्तुत गर्दै आवश्यक बजेट सुनिश्चित गर्न अर्थ मन्त्रालयको ध्यानाकर्षण गराएका थिए ।

बजेट लेखनको अन्तिम तयारी भइरहँदा अर्थ मन्त्रालयले मंगलबार पनि बाँकी मन्त्रालयहरूसँग छलफललाई निरन्तरता दिने तालिका रहेको छ । सरकारले जेठ १५ गते संसद्मा बजेट प्रस्तुत गर्नुपर्ने संवैधानिक व्यवस्था अनुसार अहिले मन्त्रालयमा बजेट निर्माणको चटारो बढेको हो ।