रौतहट । रौतहटमा करेन्ट लागेर एक वृद्धाको मृत्यु भएको छ । जिल्लाको गुजरा नगरपालिका–१ मनहर्वाकी ८४ वर्षीया कान्छी देवी चौधरीको करेन्ट लागेर ज्यान गएको हो ।

जिल्ला प्रहरी कार्यालय रौतहटका अनुसार मृतक चौधरी चन्द्रपुर नगरपालिका–८ बसन्तपुरस्थित आफ्नी छोरी–ज्वाइँ लालबिहारी चौधरीको घरमा बस्दै आएकी थिइन् । आइतबार दिउँसो करिब १२ बजे मटर जडित धाराबाट पानी भर्ने क्रममा अचानक करेन्ट लाग्दा उहाँ गम्भीर घाइते भएकी थिइन् ।

घाइते चौधरीलाई तत्काल उपचारका लागि चपुरस्थित अस्पताल पुर्‍याइए पनि उपचारकै क्रममा मृत्यु भएको प्रहरीले जनाएको छ । घटनाको जानकारी प्राप्त हुनासाथ इलाका प्रहरी कार्यालय चन्द्रनिगाहपुरबाट प्रहरी निरीक्षक रुपेश कुमार झाको कमाण्डमा टोली खटिएको थियो । टोलीले घटनास्थलमा पुगेर प्रारम्भिक अनुसन्धान तथा कानुनी प्रक्रिया पूरा गरेको छ ।

शव परीक्षणका लागि सरकारी अस्पताल चपुर पठाइएको र पोस्टमार्टमपछि अपराह्न शव परिवारलाई बुझाइएको जिल्ला प्रहरी कार्यालय रौतहटका प्रहरी प्रवक्ता एवं डिएसपी विष्णु प्रदीप बस्यालले जानकारी दिनुभयो ।

वीरगन्ज,८ चैत : वीरगन्जको एक लजको कोठाबाट एक भारतीय दम्पति मृत अवस्थामा फेला परेका छन् ।वीरगन्जको नयाँँ बसपार्कको भानु चोक नजिकको नवदुर्गा लजको कोठाभित्र एउटै सीलीङ् फयान (पंखा)मा दुवै जना पासो लगाएर झुण्डिएको अवस्थामा मृत फेला परेका हुन् ।

भारतको पश्चिम बंगाल प्रान्तको कोलकत्ताका अन्दाजी ३४ वर्षीय बपन पत्रामा र उनकी पत्नि –नाम नुखलेको ) अन्दाजी ३०÷३२ वर्षकी महिला एउटै पंखामा पासो लगाएर झुण्डिएको अवस्थामा मृत फेला परेको जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक हरिबहादुर बस्नेतले जानकारी दिए ।

होटल सञ्चालले दिएको जानकारी अनुसार, ती दुवै जना चैत ४ गते बिहान लजमा बास बस्न आएका थिए । त्यहि दिन लजको कोठाबाट उनिहरु संगै बाहिर निस्किएर बजार घुमेर फेरि लजमै फर्किएका थिए ।

आइतबार बिहान अबेरसम्म पनि उनिहरुमध्ये कोहिपनि कोठाबाट नस्किएपछि लजका कर्मचारीले कोठाको ढोकामा पुगेर ढक्ढक्याउँदापनि भित्रबाट कोठा नखुलेपछि लजका सञ्चालकले बिहान ११ बजेतिर प्रहरीकोमा खबर गरेका थिए । त्यसपछि लजमा पुगेको प्रहरीले भित्रबाट चुकुल लगाइएको ढोका फोडेर पस्दा ती दुवै जना एउटै पंखामा पासो लगाएर झुण्डिएको अवस्थामा मृत भेटिएको प्रहरी नायब उपरीक्षक बस्नेतले जानकारी दिए ।

लजमा बास बस्न आएको दिन उनिहरुले कलकताका बपन पत्रमाको नाममा लजको रजिष्टरमा नाम इन्ट्री गराएको देखिएको भन्दै बस्नेतले भने,‘ मृतक महिलाको नाम रजिष्टरमा इन्ट्री छैन । त्यसका कारण उनको पहिचान खुल्न सकेको छैन ।’

उनिहरु कुन कारण किन वीरगन्ज आएको यसबारेमा पनि खुल्न नसकेको उनले बताए । मृतक दुवै जनाको शव पोष्टमार्टमका लागि नारायणी अस्पतालमा पठाइएको बस्नेतले जानकारी दिए ।घटनाका बारेमा प्रहरीले अनुसन्धान गरिरहेको भन्दै प्रहरी नायब उपरीक्षक बस्नेतले भने,‘ लज सञ्चालक र त्यहाँका अन्य कर्मचारीलाई बोलाएर सोधपुछ गरिरहेका छौं ।’

वीरगंज ८ चैत। वीरगंज स्थित हरी खेतान बहुमुखी क्याम्पसमा कक्षा १२ को त्रैमासिक परीक्षा अन्तिम समयमा आएर स्थगित गरिएपछि विद्यार्थीहरू आक्रोशित बनेका छन्। विरोध प्रदर्शनका क्रममा विद्यार्थीहरूले क्याम्पसको बसमा तोडफोड गर्दा ठूलो क्षति पुगेको छ।

क्याम्पस प्रशासनले पूर्वनिर्धारित मितिमा सञ्चालन हुने भनिएको परीक्षा आकस्मिक रूपमा स्थगित गरेको सूचना जारी गरेपछि परीक्षा दिन पुगेका विद्यार्थीहरू आन्दोलित बनेका हुन्। आक्रोशित विद्यार्थीहरूले क्याम्पस परिसरमै भेला भई परीक्षा यथाशीघ्र सञ्चालन गर्नुपर्ने मागसहित प्रदर्शन गरेका थिए।

विद्यार्थीहरूले नियमित कक्षा र शैक्षिक गतिविधि अवरोध नहुने गरी व्यवस्थापन गर्नुपर्ने, पटक–पटक हुने परीक्षा स्थगनको अन्त्य गर्नुपर्ने लगायतका माग राख्दै क्याम्पसको मूलद्वार अगाडि धर्ना दिएका थिए। उनीहरूले क्याम्पस प्रमुख तथा सञ्चालक समितिविरुद्ध नाराबाजी समेत गरेका छन्।

विद्यार्थीहरूको आरोपअनुसार क्याम्पसभित्र शिक्षा शाखा, प्रशासन, कर्मचारी तथा सञ्चालक समितिबीचको आन्तरिक विवादका कारण पटक–पटक पठनपाठन र परीक्षा प्रभावित हुँदै आएको छ। यसले आफ्नो शैक्षिक भविष्य अन्योलमा परेको उनीहरूको भनाइ छ।

प्रदर्शनका क्रममा विद्यार्थीहरूले र्‍याली निकाल्दै घण्टाघरसम्म पुगेर चक्काजाम गरेका थिए। साथै टायर बालेर विरोध जनाउँदा मुख्य सडक केही समयका लागि पूर्ण रूपमा अवरुद्ध भएको थियो।

जिल्ला प्रहरी कार्यालय पर्साका अनुसार स्थिति नियन्त्रणबाहिर जान नदिन ठूलो संख्यामा सुरक्षाकर्मी परिचालन गरिएको थियो। प्रदर्शनका क्रममा केही विद्यार्थीहरू तोडफोडमा उत्रिएपछि सामान्य झडपको अवस्था सिर्जना भएको र केहीलाई नियन्त्रणमा लिइएको प्रहरीले जनाएको छ।

यता, विद्यार्थीहरूले निमित्त क्याम्पस प्रमुख रवीन्द्र यादवको राजीनामा माग गर्दै आन्दोलन जारी राखेका छन्। क्याम्पस प्रशासनले भने परीक्षा स्थगनको स्पष्ट कारण सार्वजनिक गरेको छैन।

वीरगन्ज,८चैत : वीरगरगन्ज महानगरपालिका वडा नम्बर १० स्थित हरि खेतान बहुमुखी क्याम्पसका विद्यार्थीहरुले शिक्षकहरुको आन्दोलनका कारण परीक्षा दिन नपाएपछि सडकमा प्रदर्शन गरेका छन् ।

क्याम्पसको कक्षा ११ र १२ मा अध्ययनरत विद्यार्थीहरुको परीक्षा आइतबारदेखि सञ्चालन हुने कार्यतालिका क्याम्पस प्रशासनले सार्वजनिक गरेको थियो । तर बिहान परीक्षा दिन क्याम्पसमा पुगेका विद्यार्थीहरुलाई मूल गेटमै रोकेका थिए ।

त्यसपछि आक्रोशीत विद्यार्थीहरुले क्याम्पसको गेट अगाडि प्रदर्शन गर्ने क्रममा स्थिती तनावपूर्ण भएपछि प्रहरीले लाठी चार्ज गर्नुका साथै तीन जना विद्यार्थीहरुलाई नियन्त्रणमा लिएपछि थप आक्रोशीत बनेका विद्यार्थीहरुले घण्टाघर चोकमा पुगेर प्रदर्शन गरेका हुन् ।

क्याम्पस अगाडिबाट नारबाजी गर्दै घण्टाघर चोकमा पुगेका उनिहरुले सडकमै धर्ना बसेर चक्काजाम समेत गरे । क्याम्पस व्यवस्थापन र शिक्षकबीचको द्धन्द्धका कारण परीक्षाबाट बञ्चित हुन पुगेका उनिहरुले सडकमा टायर बालेर नाराबाजीसमेत गरे ।

प्रदर्शनमा सहभागी कक्षा १२ को शिक्षा संकायमा अध्ययनरत छात्र ओशष साहले क्याम्पसा विगत १ वर्षदेखि व्यवस्थापन र शिक्षकबीचको द्धन्द्ध चलिरहेका आँफुहरुको भविष्य बर्बाद भइरहेको बताए ।

आइतबारदेखि सुरु हुने भनिएको परीक्षा दिन क्याम्पसमा पुग्दा आन्दोलनरत शिक्षकहरुले परीक्षा रद्ध गरिएको भन्दै क्याम्पसभित्र प्रवेश नै गर्न नदिएको उनले बताए । उनले भने, हाम्रो १ वर्षदेखि कुनैपनि आन्तरिक परीक्षा हुन पाएको छैन । सरहरुले आन्दोलनका बहानामा पढाउनै छाड्नु भएको छ । परीक्षा दिनबाटसमेत बञ्चित पारिएपछि हामीहरु बाध्य भएर सडकमा उत्रिनु परेको हो ।

परीक्षाको माग गरेर क्याम्पसभित्र प्रवेश गर्न खोज्दा उल्टै प्रहरीले लाठी चार्ज गर्नका साथै तीन जना विद्यार्थीलाई पक्रेरपनि लगेको उनले बताए । क्याम्पस प्रमुख रविन्द्र यादव र सञ्चालक समितिका अध्यक्ष प्रेमप्रकाश खेतानले राजीनामा नदिएसम्म आँफुहरुको आन्दोलन नरोकिने चेतावनी समेत दिए ।

प्रदर्शनमा सहभागी ठाकुरराम बहुमुखी क्यनाम्पसका स्ववियु सभापति राजकुमार यादवले सामुदायिक क्याम्पसलाई सञ्चालक समितिमा रहेकाहरुले निजीकरण गरेर बर्बाद पारेको आरोप लगाए । उनले क्याम्पस व्यवस्थापन पक्ष र शिक्षकहरुबीचको आपसी द्धन्द्धले विधार्थीहरुको भविष्य बर्बाद भइरहेको बताए।

यता क्याम्पस सञ्चालक समितिका सल्लाहकार जयप्रकाश खेतानले भने शिक्षकहरुले विद्यार्थीहरुलाई उचालेर क्याम्पसको शैक्षिक वातावरण विगारिरहेको बताए । नाजाय माग राखेर शिक्षकहरुले आन्दोलन गरेकोका कारण उनिहरुको माग व्यवस्थापन पक्षले पुरा गर्नसक्ने अवस्था नरहेको बताए ।

क्याम्पस प्रमुख रविन्द्र यादव भने सम्पर्कमा आउन चाहेनन् । उनको मोबाइल नम्बरमा पटक पटक फोन गर्दासमेत सम्पर्क हुन सकेन ।