काठमाडौं : नेपालको लिपुलेक हुँदै सुरु गर्न लागिएको कैलाश मानसरोवर यात्राबारेमा नेपाल सरकारले पठाएको ‘कूटनीतिक नोट’मा भारतले प्रतिक्रिया जनाएको छ। आइतबार नेपालको परराष्ट्र मन्त्रालयले नेपाल सरकारले लिम्पियाधुरा, लिपुलेक र कालापानी नेपालको अभिन्न भू-भाग रहेको तथ्यमा सरकार पूर्णतः स्पष्ट र अडिग रहेको भन्दै ध्यानाकर्षण गराएको थियो।
त्यसको प्रतिक्रिया दिँदै भारतीय विदेश मन्त्रालयका प्रवक्ता रणधीर जैयसवालले लिपुलेक १९५४ देखि नै कैलाश मानसरोवर यात्राका लागि प्रयोग हुँदै आएको पुरानो मार्ग भएको विज्ञप्तिमा उल्लेख गरेका छन्।
‘यस विषयमा भारतको धारणा सधैं स्पष्ट र स्थिर रहेको छ। लिपुलेक १९५४ देखि नै कैलाश मानसरोवर यात्राका लागि प्रयोग हुँदै आएको पुरानो मार्ग हो। यसै बाटो हुँदै यो यात्रा दशकौँदेखि चल्दै आएको छ। त्यसैले यो कुनै नयाँ कुरा होइन।’ विज्ञप्तिमा भनिएको छ, ‘सीमा सम्बन्धी दाबीको हकमा भारतले सधैं यस्ता दाबीहरू न त उचित छन्, न त ऐतिहासिक तथ्य र प्रमाणमा आधारित छन् भन्ने कुरा दोहोर्याउँदै आएको छ। यसरी एकतर्फी रूपमा क्षेत्रीय दाबी विस्तार गर्ने प्रयास स्वीकार्य हुन सक्दैन।’
विज्ञप्तिमा भारत नेपालसँग द्विपक्षीय सम्बन्धका सबै विषयमा खुला र सकारात्मक संवाद गर्न तयार रहेको उल्लेख छ। ‘विशेष गरी, दुवै देशबीच सहमति भएका बाँकी सीमा सम्बन्धी मुद्दाहरूलाई वार्ता र कूटनीतिक माध्यमबाट समाधान गर्न भारत प्रतिबद्ध छ’विज्ञप्तिमा भनिएको छ।
बुटवल : बुटवलको मोतीपुर औद्योगिक क्षेत्रका प्रभावित सुकुम्बासीहरू आन्दोलित भएका छन्। आइतबार उनीहरूले बुटवल उपमहानगरपालिका–१७ स्थित रानीगंज खेलकुद मैदानमा विरोध प्रदर्शनसहित विरोध कार्यक्रम गरेका छन्। हजारौंको संख्यामा सुकुम्बासी नागरिकहरू विरोधमा सहभागी थिए। पीडितहरूले आफ्ना मागहरूसहित बुटवल उपमहानगरपालिकाका नगरप्रमुख खेलराज पाण्डेयलाई ज्ञापनपत्रसमेत बुझाएका छन्।
नेपाल सरकारले निर्माणको प्रक्रियामा रहेको मोतीपुर औद्योगिक क्षेत्रभित्र पर्ने सुकुम्बासी बस्तीलाई खाली गराउनका लागि पत्राचार गरेपछि यहाँका प्रभावित क्षेत्रका नागरिकहरू आन्दोलन भएका हुन्। हालै मात्र औद्योगिक क्षेत्र व्यवस्थापन लिमिटेडले आफ्नो क्षेत्राधिकारभित्र पर्ने अव्यवस्थित बस्ती तथा अन्य भौतिक संरचना हटाउने प्रक्रिया अघि बढाउन उपमहानगरपालिकालाई निर्देशन दिएको छ। उक्त निर्देशनपछि सुकुम्बासी बस्तीका नागरिकहरू आन्दोलित भएका हुन्।
०५७ सालदेखि रानीगंज क्षेत्रमा बस्ती बस्दै आएको छ। बेलवास बेथरी सडक निर्माण गर्ने क्रममा हटाइएका बस्तीका नागरिकहरूलाई समेत सरकारले रानीगंजमा बस्ने व्यवस्था मिलाएको थियो। यही क्षेत्रमा अहिले खेलकुद मैदान, हाटबजारलगायत संरचनाहरूसमेत निर्माण भएका छन्। मोतीपुर औद्योगिक क्षेत्र निर्माण गर्ने क्रममा विस्थापित घरधुरीहरूलाई बसोबासको व्यवस्था मिलाएपछि मात्र औद्योगिक क्षेत्र निर्माणको काम अघि बढेको थियो। तर, संघीय सरकारले एकाएक पुनः बस्ती खाली गराउन पत्राचार गरेपछि आफूहरू बाध्य भएर आन्दोलनमा उत्रनु परेको संघर्ष समितिका संयोजक छवि रास्कोटीले जानकारी गराए।
‘यो सरकारले सुकुम्बासी क्षेत्रमा बसोबास गर्ने नेपाली नागरिकहरूलाई मान्छै नै मानेको छैन’, रास्कोटीले भने, ‘यसरी अपमानित हुने गरी नागरिकलाई दुःख दिन मिल्छ ? जग्गा सरकारको हो भने नागरिक कसका हुन ? सरकारले जवाफ दिनुपर्छ।’ उनले ०५७ सालमा तत्कालिन गाविसले धुरी कर लिएर यहाँका स्थानीयलाई बस्ने अधिकार दिएको उनले बताए। अहिले यस क्षेत्रमा सरकारले गर्नुपर्ने सबै लगानी गरेर नागरिकलाई बसोबासको व्यवस्था मिलाएको उनले सुनाए।
बुटवल उपमहानगरपालिकाले मोतीपुर औद्योगिक क्षेत्रमा पर्ने बस्ती जोगाउने गरी पहल गरिरहेको थियो। तर, केन्द्रको निर्देशनले आफूलाई अप्ठ्यारो बनाएको जनप्रतिनिधिहरूले प्रतिक्रिया दिएका छन्। यस क्षेत्रको विवाद समाधान र स्थानीयको हितलाई ध्यानमा राख्दै बस्ती जोगाएर औद्योगिक क्षेत्र निर्माण गर्नका लागि कार्यदल बनाएर काम गरिएको बुटवल उपमहानगरपालिकाका नगरप्रमुख खेलराज पाण्डेले बताए।
पाण्डेले पीडितहरूले दिएको ज्ञापनपत्र बुझ्दै केन्द्रले बस्ती खाली गर्न निर्देशन दिए पनि औद्योगिक क्षेत्राधिकरभित्र पर्ने बस्तीमा डोजर नलाग्ने आश्वासन दिएका छन्। पीडित पक्षहरूसँग यसअघि भएको सहमति कार्यान्वयनमा आफू प्रतिबद्ध रहेको उनको प्रतिक्रिया छ। औद्योगिक क्षेत्रभित्र पर्ने जग्गाको ०७३ सालमा स्थानीयको विरोधका बीच सरकारले हेलिकप्टरबाट जग्गाको नक्सांकन गरेको स्थानीयले बताए। स्थानीयको चर्को विरोधले गर्दा त्यसबेला औद्योगिक क्षेत्रको निर्माणको कामले गति लिन सकेको थिएन। हाल औद्योगिक क्षेत्रभित्र पर्ने जग्गामा कुल २ हजार ५ सय बढी घरधुरी बसोबास गर्दै आएका छन्।
जग्गाको वास्तविक अवस्था अध्ययन गरी कानुनी आधारसहित प्रतिवेदन तयार गरेर बुटवल उपमहानगरले यसअघि नै औद्योगिक क्षेत्र व्यवस्थापन लिमिटेडलाई बुझाएको थियो। करिब ८ सय १३ बिघा क्षेत्रफल जग्गामा प्रस्तावित औद्योगिक क्षेत्रलाई स्थानीयको विरोध र बसोबासको अवस्थालाई ध्यानमा राख्दै घटाएर करिब ५ सय बिघामा सीमित गर्ने र बाँकी जग्गा स्थानीयलाई छाड्ने सहमति भइसकेको उपमहानगरले जनाएको छ। तर, स्थानीयलाई छाडेको जग्गामा पनि डोजर चलाउन निर्देशन दिएपछि पीडितहरू आक्रोशित छन्। उनीहरू कुनै पनि बहानामा आफू बसिरहेको घरजग्गामा डोजर लगाउन नदिने चेतावनी दिएका छन्।
काठमाडौं : सोमबार नेपाली बजारमा सुनको मूल्य ३०० रुपैयाँले घटेको छ। नेपाल सुन -चाँदी व्यवसायी महासंघका अनुसार आज आइतबारको तुलनामा ३०० रुपैयाँले घटेर प्रतितोला सुनको भाउ २ लाख ९४ हजार ८०० कायम भएको छ। आइतबार प्रतितोला सुनको मूल्य २ लाख ९५ हजार १०० पुगेको थियो। सो दिन एक तोला सुनको मूल्य १ हजारले घटेको थियो।
यसैगरी चाँदीको मूल्य भने सामान्य वृद्धि भएको छ। महासंघका अनुसार यसदिन २० रुपैयाँले बढेर एक तोला चाँदी ५ हजार ३० रुपैयाँमा कारोबार भइरहेको छ।
आइतबार प्रतितोला चाँदी ५ हजार १० रुपैयाँमा खरिदबिक्री भएको थियो।
काठमाडौं,२१ वैशाख । नेपाली कांग्रेसको केन्द्रीय कार्यसम्पादन समितिको बैठक आज बस्दैछ। बैठक दिउँसो १ बजे पार्टी केन्द्रीय कार्यालय सानेपामा बोलाइएको हो।
बैठकमा पार्टीका आन्तरिक विषयसँगै समसामयिक राजनीतिक एजेन्डामाथि छलफल हुने तयारी गरिएको छ। कांग्रेस महामन्त्री गुरुराज घिमिरेका अनुसार बिहान ११ बजे एजेन्डा तय गर्न छुट्टै छलफल गरिनेछ।
कार्यवाहक मुख्य सचिव कृष्णप्रसाद दुलालले बैठकमा केन्द्रीय कार्यसम्पादन समितिका पदाधिकारी तथा सदस्यहरूलाई अनिवार्य उपस्थितिका लागि जानकारी गराइएको बताएका छन्।
जीतपुरसिमरा उपमहानगरपालिका १ पथलैयाबाट ट्राफिक प्रहरीले आइतबार साँझ दुई युवकलाई लागूऔषध गाँजासहित नियन्त्रणमा लिएको छ ।
मादक पदार्थ सेवन जाँचका लागि खटिएको पथलैयास्थित नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय र प्रहरी चौकीको संयुक्त टोलीले २१ किलो गाँजासहित दुई युवकलाई नियन्त्रणमा लिएको हो ।
नियन्त्रणमा लिइएका दुबै युवक मकवानपुरका हुन् । प्रहरीका अनुसार पक्राउ पर्नेमा स्कुटर चालक हेटौंडा उपमहानगरपालिका ११ छतिवन घर भई राक्सिराङ ७ बस्ने १९ वर्षीय सुरेन्द्र कुँवर र स्कुटरमा सवार राक्सिराङ गाउँपालिका ७ का १९ वर्षीय सलमान गुरुङ रहेका छन् ।
मापसे जाँचका लागि रोक्न खोज्दा भाग्ने प्रयास गरेपछी संयुक्त प्रहरी टोलीले बागमती प्रदेश ०३-००३प ५७६४ नम्बरको स्कुटरसहित उनीहरुलाई नियन्त्रणमा लिएको हो । उनीहरुलाई रोकेर जाँच गर्दा दुई वटा झोलामा लुकाएर राखिएको गाँजा बरामद भएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय मधेस प्रदेशका प्रवक्ता एवम् ट्राफिक प्रहरी नायब उपरीक्षक वकिलबहादुर सिंहले जानकारी दिए ।
नियन्त्रणमा लिइएका दुई युवकलाई गाँजासहित थप कारवाहीका लागि इलाका प्रहरी कार्यालय सिमरामा पठाइएको प्रवक्ता सिंहले बताए ।
हाम्रो बारेमा
यो वेवसाइट Kathmandu Bulletin को आधिकारिक न्यूज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सुचना प्रविधि, भिडियो तथा जीवनका विभिन्न आयामका समाचार र विश्लेषणलाई यसले समेट्छ।
सञ्चालक एवम् प्रबन्ध निर्देशक
सम्पादक : रिषि केश
पत्रकार : आयुष भुजेल
विज्ञापन
Kathmandu Bulletin मा विज्ञापन गर्न फोन:- 9761929175 मा सम्पर्क गर्नुहोला ।
सम्पर्क
📍 ठेगना: बिरगंज, पर्सा
☎ फोन: ९७६१९२९१७५
✉ ईमेल: kathmandubulletin.np@gmail.com
✸ सूचना बिभाग दर्ता नं : ५२५८–२०८२/२०८३