काठमाडौं । सशस्त्र प्रहरी बल, नेपालका महानिरीक्षक (आईजीपी) नारायणदत्त पौडेलले आर्थिक सुशासन, सीमा सुरक्षा र विपद् व्यवस्थापनलाई आफ्नो कार्यकालको प्रमुख प्राथमिकतामा राख्दै सङ्गठनलाई परिणाममुखी र जनउत्तरदायी बनाउने प्रतिबद्धता व्यक्त गरेका छन्।
बिहीबार आयोजित पत्रकार सम्मेलनमा बोल्दै आईजीपी पौडेलले सङ्गठनको कार्यसम्पादनलाई थप प्रभावकारी, पारदर्शी र व्यावसायिक बनाउने उद्देश्यसहित आवश्यक नीतिगत तथा संरचनागत सुधार अघि बढाइने बताए।
सीमा सुरक्षालाई थप मजबुत बनाउने क्रममा उनले जनशक्ति र प्रविधिको सीमितताबीच पनि प्रभावकारी परिचालनमा जोड दिइने उल्लेख गरे। सीमा नाकामा हुने आवतजावतलाई सहज, व्यवस्थित र सुरक्षित बनाउन तथा सीमा अपराध नियन्त्रणलाई प्रभावकारी बनाउन ‘बोर्डर इन्टरयाक्सन टिम (बीआईटी)’ को अवधारणा पाइलट परियोजनाका रूपमा लागू गरिने जानकारी दिए।
उनका अनुसार प्रमुख सीमा नाकाहरूमा स्क्रिनिङ प्रणालीलाई प्रभावकारी बनाउँदै समकक्षी सुरक्षा निकायसँग समन्वय बढाउन बीआईटी परिचालन गरिनेछ।
राजस्व चुहावट नियन्त्रण सरकारको उच्च प्राथमिकतामा रहेको उल्लेख गर्दै आईजीपी पौडेलले सङ्गठनभित्र हुने कुनै पनि प्रकारको आर्थिक अनियमितताप्रति ‘जिरो टोलरेन्स’ (शून्य सहनशीलता) को नीति अवलम्बन गरिने स्पष्ट पारे। उनले आर्थिक अनुशासन, पारदर्शिता र जवाफदेहितालाई संस्थागत बनाउन गुनासो व्यवस्थापनलाई प्रभावकारी बनाइने र आवश्यक संरचनागत सुधारसमेत अघि बढाइने बताए।
सङ्गठनको दीर्घकालीन विकास र रणनीतिक योजनालाई व्यवस्थित बनाउन ‘नीति अनुसन्धान तथा योजना निर्देशनालय’ लाई स्तरोन्नति गरी सञ्चालनमा ल्याइएको जानकारी दिँदै उनले यस निर्देशनालयले भविष्यका चुनौतीहरूको अध्ययन, अनुसन्धान तथा नीतिगत योजना निर्माणमा महत्वपूर्ण भूमिका खेल्ने विश्वास व्यक्त गरे।
विपद् व्यवस्थापनका क्षेत्रमा सशस्त्र प्रहरीले स्थापनाकालदेखि नै अग्रणी भूमिका निर्वाह गर्दै आएको उल्लेख गर्दै आईजीपी पौडेलले मनसुनलगायत सम्भावित विपद्लाई लक्षित गरी आवश्यक जनशक्ति, स्रोतसाधन र प्रतिकार्य योजना तयारी अवस्थामा राखिएको बताए। सम्बन्धित निकायसँगको समन्वयमा उद्धार तथा राहत कार्यलाई अझ प्रभावकारी बनाइने उनको भनाइ छ।
आईजीपी पौडेलले सीमा सुरक्षा, आर्थिक सुशासन, संस्थागत सुधार र विपद् व्यवस्थापनलाई सन्तुलित रूपमा अघि बढाउँदै सशस्त्र प्रहरी बललाई अझ सक्षम, पारदर्शी र जनविश्वासयोग्य सुरक्षा संगठनका रूपमा स्थापित गर्ने प्रतिबद्धता दोहोर्याए।
बिरगंज १३ असार
श्री गहवामाई तीर्थ क्षेत्र विकास समितिको आयोजनामा शनिबार माईस्थान मन्दिर परिसरमा निःशुल्क स्वास्थ्य शिविर सम्पन्न भएको छ। समितिका अध्यक्ष श्याम पोखरेल, उपाध्यक्ष देवानन्द कलवार,सचिव पप्पु गुप्ता र कोषाध्यक्ष रवि अग्रवाल सम्मिलित समितिले गठन गरेको उपसमितिका संयोजक श्याम गुप्ताको नेतृत्वमा शिविर आयोजना गरिएको हो। शिविरको उद्घाटन चिकित्सक डा। मनोज गुप्ताले गरेका थिए।
आर्थिक अभावका कारण गुणस्तरीय स्वास्थ्य सेवाबाट वञ्चित श्रद्धालु तथा सर्वसाधारणलाई स्वास्थ्य सेवा उपलब्ध गराउने उद्देश्यले प्रत्येक वर्षझैँ यस वर्ष पनि निःशुल्क स्वास्थ्य शिविर सञ्चालन गरिएको समितिले जनाएको छ।
समितिका सचिव पप्पु गुप्ताका अनुसार असार ३२ गते आयोजना हुने गहवामाई रथयात्राको अवसर पारेर शिविर सञ्चालन गरिएको हो। शिविरबाट ३५५ जनाले स्वास्थ्य सेवा लिएका थिए।
शिविरमा आँखा, दाँत, हाडजोर्नी तथा कान रोगसँगै मधुमेह र थाइराइडसम्बन्धी परीक्षण तथा परामर्श सेवा प्रदान गरिएको थियो।
उपसमितिका संयोजक श्याम गुप्ताका अनुसार शिविरका क्रममा मोतियाबिन्दु पहिचान भएका बिरामीहरूको संस्थाको पहलमा निःशुल्क शल्यक्रिया समेत गरिने व्यवस्था मिलाइएको छ। कार्यक्रममा कार्यक्रम सहसंयोजक अनुप कुमार अग्रवाल समितीका सदस्यहरु ओशन गुप्ता, राजन गुप्ता, ललित अग्रवाल, विवेक कुमार, मुन्ना सर्राफ लगायतको सक्रिय सहभागिता थियो ।
बारा, असार १३
जननेता स्वर्गीय मदन भण्डारीको ७५औँ जन्मजयन्तीको अवसरमा मदन भण्डारी फाउन्डेशन जिल्ला कमिटी बारा द्वारा कलैयास्थित प्रादेशिक अस्पताल कलैयाका बिरामीहरूलाई फलफूल वितरण गरिएको छ।
फाउन्डेशनले सामाजिक उत्तरदायित्वअन्तर्गत आयोजना गरेको कार्यक्रममा फाउन्डेशनका मधेस प्रदेश अध्यक्ष राजमहमद रायले प्रमुख अतिथिका रूपमा सहभागी भएका थिए। उनले अस्पतालमा उपचाररत बिरामीहरूको शीघ्र स्वास्थ्यलाभको कामना गर्दै फलफूल वितरण गरेका थिए।
कार्यक्रममा मधेस प्रदेश कोषाध्यक्ष अशोक कुमार तिवारी सहित फाउन्डेशनका पदाधिकारी तथा सदस्यहरूको सहभागिता रहेको थियो।
साथै, प्रादेशिक अस्पताल कलैयाका विभिन्न शाखामा कार्यरत स्वास्थ्यकर्मी तथा कर्मचारीहरूको पनि उल्लेखनीय उपस्थिति रहेको थियो।कार्यक्रमका सहभागीहरूले स्वर्गीय मदन भण्डारीले अघि सारेका जनमुखी विचार र सामाजिक सेवाको भावनालाई आत्मसात् गर्दै जन्मजयन्तीलाई औपचारिक समारोहभन्दा सेवा र मानवीय कार्यमार्फत मनाउनु अर्थपूर्ण भएको बताएका थिए।
फलफूल वितरण कार्यक्रमबाट अस्पतालमा उपचाररत बिरामीहरू लाभान्वित भएका थिए। फाउन्डेशनले आगामी दिनमा पनि सामाजिक सेवा, स्वास्थ्य, शिक्षा तथा जनहितका विभिन्न कार्यक्रमलाई निरन्तरता दिने प्रतिबद्धता व्यक्त गरेको छ।
काठमाडौं । सशस्त्र प्रहरी बल सर्लाहीले बुधबार जिल्लाको छतौनाबाट ठूलो परिमाणमा फर्सिको बीउ नियन्त्रणमा लियो। चार वटा भारतीय नम्बर प्लेटका पिकअप गाडीमा लोड गरी भारततर्फ लैजान लागिएको अवस्थामा उक्त बीउ बरामद गरिएको हो। घटनामा एक नेपाली नम्बरको ट्रकसमेत नियन्त्रणमा लिइएको छ।
प्राप्त जानकारीअनुसार भण्डारण गरिएको स्थानबाट फर्सिको बीउ नेपाली ट्रकमा लोड गरी विभिन्न स्थानमा ओसारपसार भइरहेको अवस्थामा ट्रक नियन्त्रणमा लिइएको हो।
यद्यपि बरामद गरिएको सामानको वास्तविक स्वामित्वबारे सम्बन्धित निकायले औपचारिक रूपमा केही खुलाएको छैन। तर सुरक्षा स्रोतहरूका अनुसार उक्त कारोबारमा लामो समयदेखि सीमावर्ती क्षेत्रमा सक्रिय भनिएका उमेश साह तेलीको संलग्नता रहेको आशंका गरिएको छ।
स्रोतका अनुसार भारतीय मूलका भनिएका साहले पर्साको वीरगञ्ज केन्द्र बनाएर नेपाल–भारत सीमावर्ती जिल्लाहरूमा एजेन्टमार्फत फर्सिको बीउ, काजु, चिनी, कफीका गोटा, कपडालगायत सामग्रीको अवैध कारोबार सञ्चालन गर्दै आएको आरोप छ। भारतीय सुरक्षा निकायका केही स्रोतहरूले पनि उनी विभिन्न तस्करी गतिविधिमा संलग्न रहेको दाबी गरेका छन्।
उमेश साह भारतिय कस्टम विभागको मोस्ट वाण्टेड सूचीमा रहेको बताइन्छ। जसले गर्दा उनी भारत जाँदा विभिन्न रुपमा जाने गरेको उनलाई नै नजिकबाट चिन्ने एक व्यापारीले बताए। पछिल्लो समय उनले पर्सादेखि सर्लाहीसम्म तस्कर गराउँदे आएका छन्।
सुरक्षा स्रोतकाअनुसार एकजना पूर्व प्रहरी हवल्दारको पनि उमेश साहको नेटवर्कसँग सम्बन्ध रहेको बताइन्छ। हवल्दारसँग विजय यादव, सन्तोष सिंह, राजेश ठाकुर र सुरेश जैसवाललगायत व्यक्तिहरूको समूह सक्रिय रहेको स्रोतको दाबी छ।
उनीहरुमध्ये ती हवल्दारले मधेसमा आफ्नो छुट्टै तस्करको साम्रज्य खडा गर्न लागिपरिरहेका छन्। बुधबार सर्लाहीबाट भारतीय नम्बर प्लेटका पिकअप गाडीमा लोड गरी भारततर्फ लैजान लागिएको अवस्थामा ठूलो परिमाणमा बरामद फर्सीको बीउको कारोबारमा साह-हवल्दारको कनेक्सन रहेको बताइन्छ।
पछि उनले राजीनमा दिएका हुन्। राजीनामा दिनुको पनि छुट्टै कराण छ। प्रहरी प्रधान कार्यालयले निर्वाचनअघि मधेस प्रदेशमा परिचालित विवादास्पद घुमुवाहरूलाई फिर्ता बोलाउने क्रममा उनी पनि तानिएका थिए।
स्रोतहरूका अनुसार उनीमाथि सम्पत्ति आर्जन र कार्यशैलीबारे उजुरी परेपछि अनुसन्धानको दायरामा परेका थिए। अनुसन्धान जारी रहेकै अवस्थामा उनले प्रहरी सेवाबाट राजीनामा दिएको बताइन्छ।
फर्सिको बीउ बरामद प्रकरणसँगै सीमावर्ती क्षेत्रमा सक्रिय भनिएका तस्करी सञ्जाल, त्यसमा संलग्न भनिएका व्यक्तिहरू तथा उनीहरूको सम्पत्तिको स्रोतबारे निष्पक्ष र गहन अनुसन्धान हुनुपर्ने आवाज उठ्न थालेको छ। साभार -scoopkhabar.com
काठमाडौं । सशस्त्र प्रहरी बल (एपीएफ) ले हल्चोकस्थित मोटर ट्रान्सपोर्ट (एमटी) शाखामा गत जेठमा भएको आगलागी दुर्घटनावश भएको प्रारम्भिक निष्कर्ष सार्वजनिक गरेको छ।
बिहीबार सशस्त्र प्रहरी मुख्यालय हल्चोकमा आयोजित पत्रकार भेटघाट कार्यक्रममा प्रवक्ता तथा डीआईजी नेत्रबहादुर कार्कीले आगलागीलाई दुर्घटनाका रूपमा व्याख्या गर्दै हालसम्मको छानबिनले कुनै नियोजित घटना नभई प्राविधिक कारण देखाएको बताए।
‘त्यो घटना नभएर दुर्घटना रहेछ। विपद् अन्य व्यक्तिजस्तै हामीलाई पनि पोलेको छ,’ आगलागीबारे सोधिएको प्रश्नमा डीआईजी कार्कीले भने।
उनका अनुसार घटनाको अन्तिम प्रतिवेदन आउन बाँकी रहेकाले थप तथ्य त्यसपछि सार्वजनिक हुनेछ।
हल्चोकस्थित रंगशालाको पछाडि रहेको एमटी शाखाको अन्डरग्राउन्ड पार्किङमा २० जेठ राति आगलागी भएको थियो। घटनामा एआईजीले प्रयोग गर्ने प्राडो गाडीसहित ६ वटा एटीभी (क्वाड बाइक), स्कर्टिङ मोटरसाइकल तथा दुईवटा मोटरसाइकल जलेर नष्ट भएका थिए।
प्रारम्भिक अनुसन्धानमा विद्युतीय (इभी) एटीभी क्वाड बाइकमा सर्ट भई आगलागी भएको देखिएको स्रोतले जनाएको छ। उक्त एटीभी बाइक अमेरिकी दूतावासले सशस्त्र प्रहरीलाई सहयोगस्वरूप उपलब्ध गराएको थियो।
घटनाको विस्तृत छानबिनका लागि सशस्त्र प्रहरी मुख्यालयले डीआईजी सन्दीप थापाको नेतृत्वमा समिति गठन गरेको थियो।
हाम्रो बारेमा
यो वेवसाइट Kathmandu Bulletin को आधिकारिक न्यूज पोर्टल हो । नेपाली भाषाको यो पोर्टलले समाचार, विचार, मनोरञ्जन, खेल, विश्व, सुचना प्रविधि, भिडियो तथा जीवनका विभिन्न आयामका समाचार र विश्लेषणलाई यसले समेट्छ।
सञ्चालक एवम् प्रबन्ध निर्देशक
सम्पादक : रिषि केश
पत्रकार : आयुष भुजेल
सन्चालक : बिकि यादव
विज्ञापन
Kathmandu Bulletin मा विज्ञापन गर्न फोन:- 9761929175 मा सम्पर्क गर्नुहोला ।
पत्रकार विवरण
रौतहट :
रोशन कुमार साह
+977-9703493232
बारा र पर्सा :
आर. के. भगत
+977-9712074681
सम्पर्क
📍 ठेगना: बिरगंज, पर्सा
☎ फोन: ९७६१९२९१७५
✉ ईमेल: kathmandubulletin.np@gmail.com
✸ सूचना बिभाग दर्ता नं : ५२५८–२०८२/२०८३