काठमाडौं । प्रधानमन्त्री बालेन्द्र शाहले प्राविधिक पृष्ठभूमिका सांसदहरूलाई आफ्नो ज्ञान, सीप र अनुभव मुलुकको विकासमा अधिकतम उपयोग गर्न आग्रह गरेका छन्।

बुधबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा संघीय संसद् प्रतिनिधिसभामा प्रतिनिधित्व गर्ने प्राविधिक पृष्ठभूमिका सांसदहरूसँग छलफल गर्दै प्रधानमन्त्री शाहले राजनीतिक विषयभन्दा दीर्घकालीन नीति, प्राविधिक क्षेत्र र नयाँ विचारमा केन्द्रित हुन जोड दिएका हुन्।

छलफलका क्रममा प्रधानमन्त्री शाहले प्राविधिक विषयमा दक्ष सांसदहरू नीति निर्माण गर्ने महत्वपूर्ण स्थानमा रहेको उल्लेख गर्दै उनीहरूको विशेषज्ञता देश विकासमा उपयोग हुनुपर्ने बताए।

उनले भने, ‘तपाईंहरू आफैं प्राविधिक विषयमा जानकार हुनुहुन्छ, मुलुकको नीति निर्माण गर्ने ठाउँमा हुनुहुन्छ, देश विकासका लागि आफ्नो ज्ञान, सीप र अनुभवको अधिकतम उपयोग गर्नुहोस्।’

प्रधानमन्त्री शाहले सांसदहरूलाई पार्टी राजनीतिसँगै आफ्नो प्राविधिक दक्षता र व्यावसायिक पहिचानलाई समेत प्राथमिकतामा राख्न सुझाव दिए।

निर्वाचन तथा राजनीतिक गतिविधिका समयमा पार्टी राजनीतिमा सक्रिय हुनु स्वाभाविक भए पनि अन्य समयमा देश विकाससँग सम्बन्धित प्राविधिक विषय, दीर्घकालीन नीति र नयाँ सोचमा केन्द्रित हुन उनले आग्रह गरे।

छलफलमा सहभागी सांसदहरूसँग मुलुकको विकास, नीति निर्माण तथा प्राविधिक क्षेत्रको प्रभावकारी उपयोगका विषयमा समेत विचार आदानप्रदान भएको थियो।

पर्सा , १४ असोज

पर्साको पकाहाँमैनपुर गाउँपालिकामा नवआगन्तुक प्रमुख प्रशासकीय अधिकृत सुमित कुमार सिंहले बुधबार पदभार ग्रहण गरेका छन्। पदभार ग्रहणसँगै गाउँपालिकाले एक कार्यक्रम आयोजना गरी अधिकृत सिंहको स्वागत गरेको छ।

गाउँपालिका परिसरमा आयोजित स्वागत कार्यक्रममा गाउँपालिका अध्यक्ष सुरेश मेहताले दोसल्ला ओढाएर प्रमुख प्रशासकीय अधिकृत सिंहलाई औपचारिक रूपमा स्वागत गरेका थिए। कार्यक्रममा गाउँपालिका उपाध्यक्ष सरफून नेशा, वडा नं. १ का अध्यक्ष बिनोद मेहता, वडा नं. २ का अध्यक्ष मुकुट चौहान, वडा नं. ३ का अध्यक्ष संजय चौहान, वडा नं. ४ का अध्यक्ष ढेड़ी यादव र वडा नं. ५ का अध्यक्ष बलिराम चौरसियालगायत जनप्रतिनिधि, कर्मचारी तथा स्थानीय समाजसेवीहरूको सहभागिता रहेको थियो।

कार्यक्रममा प्रशासन प्रमुख रमेश मेहताले स्वागत मन्तव्य राख्दै नवआगन्तुक प्रमुख प्रशासकीय अधिकृत सिंहको कार्यकाल सफल, प्रभावकारी र उपलब्धिमूलक रहोस् भन्ने शुभकामना व्यक्त गरे। कार्यक्रमको सञ्चालन राजस्व शाखा प्रमुख दामोदर द्विवेदीले गरेका थिए।

स्वागतपछि मन्तव्य व्यक्त गर्दै प्रमुख प्रशासकीय अधिकृत सुमित कुमार सिंहले गाउँपालिकाको समग्र विकास, सुशासन प्रवर्द्धन तथा नागरिकलाई प्रभावकारी सेवा प्रवाह गर्ने विषयलाई आफ्नो प्राथमिकतामा राखेर काम गर्ने प्रतिबद्धता व्यक्त गरे।

उनले जनप्रतिनिधि, कर्मचारी र स्थानीय समुदायबीचको समन्वय तथा सहकार्यलाई बलियो बनाउँदै गाउँपालिकाको प्रशासनिक तथा विकास गतिविधिलाई प्रभावकारी रूपमा अघि बढाउने बताए। नागरिकले सहज, छिटोछरितो र गुणस्तरीय सेवा पाउने वातावरण निर्माण गर्नु आफ्नो प्रमुख जिम्मेवारी रहेको उनको भनाइ थियो।

प्रमुख प्रशासकीय अधिकृत सिंहले पारदर्शिता, जवाफदेहिता र परिणाममुखी कार्यशैलीलाई आधार बनाएर गाउँपालिकाको संस्थागत सुधार तथा विकास निर्माणका कामलाई गति दिने बताए। गाउँपालिकाको विकास र समृद्धिका लागि जनप्रतिनिधि, कर्मचारी तथा नागरिक समाजसहित सबै पक्षबीच सहकार्य आवश्यक रहेको उनले उल्लेख गरे।

उनले चालु आर्थिक वर्षको गाउँसभा हालसम्म सम्पन्न हुन नसकेको विषयलाई समेत प्राथमिकताका साथ अघि बढाउनुपर्ने बताए। यसअघि प्रसौनी गाउँपालिका तथा जिल्ला समन्वय समिति पर्सामा काम गरेको अनुभवलाई उपयोग गर्दै पकाहाँमैनपुर गाउँपालिकाको गाउँसभा समयमै सम्पन्न गर्न आफूले आवश्यक समन्वय र पहल गर्ने सिंहले बताए।

गाउँसभा सम्पन्न भएपछि चालु आर्थिक वर्षका नीति, कार्यक्रम तथा बजेटलाई प्रभावकारी रूपमा कार्यान्वयन गर्दै गाउँपालिकाको समग्र विकासलाई अघि बढाउन सहज हुने उनको भनाइ थियो। विगतमा प्रसौनी गाउँपालिका र जिल्ला समन्वय समिति पर्सामा प्राप्त प्रशासनिक अनुभवलाई पकाहाँमैनपुरको काममा उपयोग गर्ने उनले बताए।

सिंहले गाउँपालिकामा सेवा प्रवाहलाई चुस्तदुरुस्त बनाउनुका साथै विकास निर्माणका योजनामा पारदर्शिता र गुणस्तर कायम गर्न आवश्यक रहेको बताए। जनप्रतिनिधि र कर्मचारीबीच प्रभावकारी समन्वय भएमा गाउँपालिकाका समस्या समाधान गर्दै विकासका कामलाई अपेक्षित गतिमा अघि बढाउन सकिने उनको धारणा थियो।

कार्यक्रममा सहभागी जनप्रतिनिधि तथा कर्मचारीहरूले नवआगन्तुक प्रमुख प्रशासकीय अधिकृत सिंहलाई सफल कार्यकालको शुभकामना दिँदै गाउँपालिकाको प्रशासनिक व्यवस्थापन, गाउँसभा सञ्चालन, सेवा प्रवाह तथा विकास निर्माणका काममा आवश्यक सहयोग र सहकार्य गर्ने प्रतिबद्धता व्यक्त गरेका थिए।

गाउँपालिकामा नयाँ प्रमुख प्रशासकीय अधिकृतको आगमनसँगै लामो समयदेखि बाँकी रहेको गाउँसभा सम्पन्न गर्ने, चालु आर्थिक वर्षका कार्यक्रमलाई कार्यान्वयनमा लैजाने तथा नागरिक सेवा प्रवाहलाई थप प्रभावकारी बनाउने अपेक्षा गरिएको छ।

काठमाडौं । सर्वोच्च अदालतले मेडिकल व्यवसायी दुर्गा प्रसाईंलाई पक्राउ गर्नुको कारणसहित लिखित जवाफ पेस गर्न आदेश दिएको छ।

न्यायाधीश हरिप्रसाद फुयालको इजलासले प्रसाईंका तर्फबाट दायर बन्दी प्रत्यक्षीकरण निवेदनमाथि सुनुवाइ गर्दै यस्तो आदेश दिएको हो।

अदालतले प्रसाईंलाई पक्राउ गर्नु नपर्ने आधार र कारण भए त्यसको प्रमाणसहित म्याद सूचना प्राप्त भएको मितिले बाटोको म्यादबाहेक सात दिनभित्र महान्यायाधिवक्ताको कार्यालयमार्फत लिखित जवाफ पेस गर्न आदेश दिएको छ।

प्रसाईंको पक्राउलाई लिएर उनका तर्फबाट सर्वोच्च अदालतमा बन्दी प्रत्यक्षीकरणको निवेदन दायर गरिएको थियो। उक्त निवेदनमा नेपाल प्रहरी प्रधान कार्यालय र साइबर ब्युरो, काठमाडौंलाई विपक्षी बनाइएको छ।

अदालतको आदेशसँगै अब प्रसाईंलाई पक्राउ गर्नुको कानुनी आधारबारे सम्बन्धित निकायले लिखित जवाफ पेस गर्नुपर्ने भएको छ।

वीरगन्ज, असोज १४ —

वीरगन्ज महानगरपालिकाको चालु आर्थिक वर्ष २०८३/८४ को बजेट कार्यान्वयनका क्रममा उत्पन्न विवाद टुङ्ग्याउन आह्वान गरिएको विशेष नगरसभा नेपाली कांग्रेसले बहिष्कार गरेको छ।

वीरगन्जको आदर्शनगरस्थित होटल पुजनमा सञ्चालन भइरहेको २१औं नगरसभा (विशेष नगरसभा) मा नेपाली कांग्रेसबाट निर्वाचित उपप्रमुख लगायतका वडा सदस्यहरूले पार्टीको निर्देशन अनुसार सहभागिता जनाएका छैनन्।

नेपाली कांग्रेस, जिल्ला कार्यसमिति, पर्साले असोज १३ गते मंगलबार एक विज्ञप्ति जारी गर्दै महानगरपालिकाले आह्वान गरेको उक्त विशेष नगर सभामा पार्टीबाट निर्वाचित जनप्रतिनिधिहरूलाई सहभागी नहुन कूटनीतिक रूपमा ह्वीप जारी गरेको थियो।

कांग्रेस पर्साका सचिव दिनेश कुमार चौधरीद्वारा जारी विज्ञप्तिमा पार्टीतर्फबाट निर्वाचित उपमेयर, वडाध्यक्ष, कार्यपालिका सदस्य तथा वडा सदस्यहरूलाई कुनै पनि हालतमा उक्त सभामा सहभागी नहुन निर्देशन दिइएको थियो।

सोही पार्टीगत निर्णय र निर्देशन अनुसार आज आयोजित विशेष नगर अधिवेशनमा उपप्रमुख इम्तियाज आलमसहित कांग्रेसबाट निर्वाचित जनप्रतिनिधि तथा वडा सदस्यहरूको उपस्थिति समाचार तयार पार्दासम्म देखिएको छैन। बजेट कार्यान्वयनको विषयलाई लिएर देखिएको विवादका बीच प्रमुख राजनीतिक दल नेपाली कांग्रेसले नै सभा बहिष्कार गरेपछि वीरगन्ज महानगरको राजनीति थप पेचिलो बनेको छ।