मेडिकल व्यवसायी तथा सामाजिक अभियन्ता दुर्गा प्रसाईं पुनः पक्राउ परेका छन्। नेपाल प्रहरीले उनलाई सोमबार भक्तपुरस्थित आफ्नै निवासबाट पक्राउ गरेको हो।

नेपाल प्रहरीको साइबर ब्युरोको टोलीले प्रसाईंलाई नियन्त्रणमा लिएको जनाएको छ। विद्युतीय कारोबार ऐनअन्तर्गत साइबर अपराधसम्बन्धी परेको उजुरीका आधारमा अदालतबाट अनुमति लिएर उनलाई पक्राउ गरिएको ब्युरोले जनाएको छ।

प्रहरीका अनुसार प्रसाईंविरुद्ध परेको उजुरीमाथि अनुसन्धान अघि बढाउने क्रममा अदालतबाट पक्राउका लागि अनुमति लिइएको हो। त्यसपछि साइबर ब्युरोको टोली उनको भक्तपुरस्थित निवासमा पुगेको थियो।

विभिन्न समयमा दिएका अभिव्यक्ति तथा सार्वजनिक गतिविधिका कारण प्रसाईं विवादमा पर्दै आएका छन्। यसअघि पनि उनीविरुद्ध विभिन्न मुद्दा तथा उजुरीमा अनुसन्धान हुँदै आएको थियो भने फरक–फरक घटनामा उनी पक्राउ परेर छुट्दै आएका छन्।

पछिल्लो पक्राउपछि प्रसाईंमाथि साइबर अपराधसम्बन्धी उजुरीका विषयमा अनुसन्धान अघि बढाइने प्रहरीले जनाएको छ। घटनाबारे थप विवरण अनुसन्धानपछि सार्वजनिक हुने बताइएको छ।

काठमाडौं । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले पूर्वप्रधानन्यायाधीश चोलेन्द्रशमशेर जबराको पक्राउप्रति आपत्ति जनाएका छन्।

सोमबार संघीय संसद् भवन, सिंहदरबारमा सञ्चारकर्मीसँग कुरा गर्दै प्रचण्डले बिना कारण विशिष्ट व्यक्तिहरूलाई पक्राउ गर्ने क्रम जारी राखे सरकारले त्यसको ठूलो मूल्य चुकाउनुपर्ने चेतावनी दिएका हुन्।

जबरालाई पक्राउ गरिएको घटनाबारे टिप्पणी गर्दै प्रचण्डले ‘छोरी पिटेर बुहारी तर्साउन खोजेको’ जस्तो नियत सरकारको हो भने त्यो सरकारकै लागि घातक हुने बताए। उनले यस्ता घटना दोहोरिन नदिन सरकारलाई आग्रहसमेत गरे।

सरकारले जबराको पक्राउका लागि सुरक्षा थ्रेटलाई कारण देखाएकोप्रति पनि प्रचण्डले प्रश्न उठाए। सुरक्षा जोखिम वास्तविक थियो भने पक्राउ गर्नुको सट्टा उनको घरमै सुरक्षाकर्मी थप्न सकिने उनको तर्क थियो। उनले सुरक्षा थ्रेटको कारण देखाइनु सामान्य मानिसले समेत बुझ्ने खालको बहानाजस्तो देखिएको टिप्पणी गरे।

प्रचण्डले विशिष्ट व्यक्तिहरूलाई पक्राउ गर्ने विषयमा सरकारले संयमता अपनाउनुपर्ने बताउँदै यस्ता गतिविधिले थप समस्या निम्त्याउन सक्ने संकेत गरे।

यसैबीच, संयुक्त राष्ट्रसंघको महासभामा प्रधानमन्त्री बालेन शाहले दिएको सम्बोधनबारे पनि प्रचण्डले प्रतिक्रिया दिएका छन्। उनले प्रधानमन्त्रीले अहिलेको अवस्थामा बोल्नुपर्ने विषयमै बोलेको भन्दै त्यसलाई स्वाभाविक भएको बताए।

प्रधानमन्त्रीको सम्बोधनलाई लिएर अनावश्यक रूपमा बढाइचढाइ गर्न आवश्यक नरहेको उल्लेख गर्दै प्रचण्डले बालेनको ठाउँमा अरू कोही प्रधानमन्त्री भएको भए पनि त्यही विषयमा बोल्ने धारणा व्यक्त गरे।

नेपाली कम्युनिस्ट पार्टीका सांसद युवराज दुलालले पूर्वप्रधानन्यायाधीश चोलेन्द्रशमशेर राणाको पक्राउ प्रकरणलाई लिएर सरकारसँग प्रश्न गरेका छन्।

प्रतिनिधिसभाको बैठकमा बोल्दै सांसद दुलालले राणाको पक्राउको विषयमा सरकारको निर्णय र समयलाई लिएर प्रश्न उठाएका हुन्। उनले व्यंग्यात्मक शैलीमा भने, ‘के खाएर मध्यरातमा जोश आउँछ र मध्याह्नमा होस आउँछ?’

दुलालले सरकारको कदमबारे स्पष्ट जवाफ दिनुपर्ने माग गर्दै प्रतिनिधिसभामा यस विषयमा प्रश्न उठाएका हुन्। उनको अभिव्यक्तिपछि राणाको पक्राउ प्रकरण र सरकारको निर्णयलाई लिएर राजनीतिक बहस थप चर्किएको छ।

राजन कुमार बानिया

पर्सा ११ असोज

पर्साको धोबीनी गाउँपालिका वडा-४ लंगडीमा करोडौं रुपैयाँको लगानीमा निर्माण गरिएको नमुना अस्पताल स्थानीयका लागि स्वास्थ्य सेवाको आशा बने पनि अस्पतालसम्म पुग्ने भरपर्दो सडक नहुँदा यसको वास्तविक उपयोगितामाथि नै प्रश्न उठ्न थालेको छ।

वर्षायाम सुरु भएपछि लंगडीको सडक हिलाम्मे र जीर्ण बन्दा अस्पतालसम्म बिरामी लैजानसमेत स्थानीयलाई कठिनाइ हुने गरेको छ। विशेषगरी गर्भवती महिला, वृद्धवृद्धा तथा आकस्मिक उपचार आवश्यक पर्ने बिरामीले समयमा स्वास्थ्य संस्था पुग्न नसक्ने अवस्था रहेको स्थानीयको गुनासो छ।

अस्पताल गाउँमै भए पनि सडकको दुरवस्थाका कारण कतिपय बिरामीलाई पोखरिया अस्पताल वा वीरगञ्जतर्फ लैजानुपर्ने बाध्यता छ। वर्षाको समयमा एम्बुलेन्ससमेत सहज रूपमा आवतजावत गर्न नसक्ने अवस्था आएपछि करोडौंको लगानीमा बनेको अस्पतालको उद्देश्य नै अधुरो भएको स्थानीय बताउँछन्।

स्थानीयको प्रश्न छ—अस्पताल बनाउन करोडौं रुपैयाँ खर्च गर्न सक्ने स्थानीय सरकारलाई अस्पतालसम्म पुग्ने सडक बनाउन किन कठिन भइरहेको छ?

स्थानीय तहले विभिन्न तालिम, गोष्ठी, कार्यक्रम तथा सामग्री खरिदमा ठूलो रकम खर्च गर्दै आए पनि जनताको दैनिक जीवनसँग प्रत्यक्ष जोडिएका आधारभूत पूर्वाधारमा अपेक्षित ध्यान नदिएको भन्दै आलोचना भइरहेको छ। स्वास्थ्य संस्था निर्माण गरेर मात्र स्वास्थ्य सेवा प्रभावकारी नहुने भन्दै स्थानीयले अस्पतालसम्म पुग्ने सडकलाई पहिलो प्राथमिकतामा राख्न माग गरेका छन्।

स्थानीयका अनुसार जनप्रतिनिधिहरूले बजेटको प्राथमिकता निर्धारण गर्दा जनताको वास्तविक आवश्यकता पहिचान गर्न आवश्यक छ। तालिम र औपचारिक कार्यक्रमभन्दा बिरामीलाई अस्पतालसम्म पुर्‍याउने बाटो, खानेपानी, शिक्षा र आधारभूत पूर्वाधारमा लगानी गर्नु स्थानीय सरकारको प्राथमिक जिम्मेवारी हुनुपर्ने उनीहरूको भनाइ छ।

अस्पतालको भवन देखाएर विकासको दाबी गरिए पनि त्यहाँ पुग्ने बाटो नै जोखिमपूर्ण हुनु विकास व्यवस्थापनको गम्भीर कमजोरी भएको स्थानीयको आरोप छ। करोडौंको अस्पताल बनाएर त्यसको पहुँच मार्ग बेवास्ता गरिँदा राज्यको लगानीको प्रतिफलसमेत जनताले पूर्ण रूपमा पाउन नसकेको अवस्था देखिएको छ।

स्थानीयले अब भाषण र आश्वासनभन्दा अस्पतालसम्म पुग्ने सडकको तत्काल स्तरोन्नति, वर्षायाममा नियमित मर्मत तथा एम्बुलेन्स सहज रूपमा आवतजावत गर्न सक्ने सडक निर्माण गर्न धोबीनी गाउँपालिका र सम्बन्धित जनप्रतिनिधिसँग माग गरेका छन्।

जनताको स्वास्थ्यसँग प्रत्यक्ष जोडिएको विषय भएकाले गाउँपालिकाले आगामी बजेट तथा योजनामा अस्पतालको पहुँच मार्गलाई प्राथमिकतामा राख्छ कि विगतझैं अन्य कार्यक्रम र खरिदमै बजेट केन्द्रित गर्छ भन्ने प्रश्न अहिले स्थानीयस्तरमा उठ्न थालेको छ।