वीरगञ्ज । पर्सा क्षेत्र नं. १ का प्रतिनिधिसभा सदस्य सांसद हरी पन्त र क्षेत्र नं. २ का संघीय सांसद सुशील कुमार कानुले जिल्ला प्रशासन कार्यालय पर्साको संयुक्त रूपमा अनुगमन गरेका छन्।

अनुगमनका क्रममा उनीहरूले कार्यालयमा पुगेका सेवाग्राहीसँग प्रत्यक्ष रुपमा गुनासा तथा सुझाव सुनेका थिए।

सेवाग्राहीहरूले सेवा लिनका क्रममा भोग्नुपरेका समस्या, ढिलासुस्ती तथा अन्य असुविधाबारे जानकारी गराएका थिए।

सांसदद्वयले सेवाग्राहीबाट आएका गुनासालाई गम्भीरतापूर्वक लिन कार्यालयका कर्मचारी तथा सम्बन्धित अधिकारीहरूलाई निर्देशन दिएका छन्।

उनीहरूले सेवा प्रवाहलाई छिटो, सहज र पारदर्शी बनाउन विशेष ध्यान दिन आग्रह गरे।

सांसद पन्त र कानुले सरकारी कार्यालयहरू जनताको सेवा गर्ने ठाउँ भएकाले सेवाग्राहीले कुनै पनि प्रकारको झन्झट वा अनावश्यक ढिलाइ भोग्न नपरोस् भन्नेमा जोड दिएका थिए।

अनुगमनका क्रममा कार्यालय प्रमुखसँग छलफल गर्दै सेवा प्रवाहलाई थप प्रभावकारी, व्यवस्थित र नागरिकमैत्री बनाउन आवश्यक कदम चाल्न पनि निर्देशन दिइएको बताइएको छ।

वीरगंज/ १७ चैत

सबैया साझेदारी वन उपभोक्ता समूहको गस्ती टोली सब सबैया सब डिभिजन वन कार्यालयको संयुक्त गस्ती टोलीले अवैध काठ तस्करी नियन्त्रण गर्ने क्रममा जंगल भित्र बाट काठसहित दुई मोटरसाइकल बरामद गरेको छ।

हिजो साँझ नियमित गस्तीका क्रममा जंगल क्षेत्रमा शंकास्पद गतिविधि देखिएपछि टोलीले जाँच गर्दा १४.३२ क्यु फिट परिमाणको ३ थान सालको काठ फेला पारेको हो।

उक्त काठ ओसारपसारमा प्रयोग गरिएका दुई मोटरसाइकलसमेत नियन्त्रणमा लिइएको जनाइएको छ।बरामद गरिएका सवारी साधनमा ना.१८प १३३७ नम्बर को होन्डा साइन र प्रदेश २-०३-००४प ६८६३ नम्बरको हिरो ग्ल्यामर रहेका छन्। गस्ती टोलीलाई देखेपछि संलग्न व्यक्तिहरू काठ र मोटरसाइकल छाडेर भाग्न सफल भएका छन्।

बरामद गरिएको काठ तथा मोटरसाइकललाई थप अनुसन्धान तथा कानुनी कारबाहीका लागि सम्बन्धित सबैया सब डिभिजन वन कार्यालयमा बुझाइएको छ।

कानुनी प्रावधान अनुसार कारबाही वन ऐन २०७६ अनुसार वन क्षेत्रबाट अवैध रूपमा काठ कटान, संकलन, ओसारपसार तथा बिक्री वितरण गर्नु दण्डनीय अपराध हो। यस्तो कसुरमा संलग्न व्यक्तिलाई जरिवाना, कैद वा दुवै सजाय हुने व्यवस्था रहेको छ।

वन कार्यालयले घटनामा संलग्न फरार व्यक्तिहरूको खोजी कार्य भईरहेको सबैया साझेदारी वन उपभोक्ता समुहका उपाध्यक्ष असलम आलमले बताएका छन्।

वन संरक्षणमा कडाइ सबैया साझेदारी वन उपभोक्ता समूह र सबैया सब डिभिजन वन कार्यालयले वन संरक्षण तथा अवैध गतिविधि नियन्त्रणका लागि नियमित गस्तीलाई थप प्रभावकारी बनाउँदै जाने जनाएको छ। सो गस्ती टोलीमा सबैया सब डिभिजन वन कार्यालय रेन्जर भोपाल रोकाया, रेन्जर कबिता दास, वन रक्षक विरेन्द्र यादव,ताराचन प्रसाद,हरिन्द्र ठाकुर, दिपेश हमाल,राजबाबु साह को संयुक्त गस्ती टोलीले मोटरसाइकल र काठ नियन्त्रणमा लिएको छ।साथै, स्थानीय बासिन्दालाई पनि वन संरक्षणमा सहकार्य गर्न उपाध्यक्ष आलमले आग्रह समेत गरेका छन्।

काठमाडौं। राष्ट्रिय स्वतन्त्र पार्टी (रास्वपा) का सभापति रवि लामिछाने र आम जनता पार्टीका अध्यक्ष प्रभु साहबीच भेटवार्ता भएको छ।

लामिछानेको बूढानीलकण्ठस्थित निवासमा मंगलबार लामिछाने र साहबीच भेटवार्ता भएको हो।

भेटका क्रममा सभापति लामिछानेले मधेसलाई सरकारले प्राथमिकतामा राखेर काम गर्ने बताएका उनको सचिवालयले जनाएको छ।

ुदेश र अझ विशेषगरी मधेसले परिवर्तन चाहेको जनमतबाट स्पष्ट देखिएकाले यसलाई आत्मसात् गरी पारस्परिक सहयोगमार्फत अघि बढ्ने विषयमा छलफल केन्द्रित भएको थियो,ु सचिवालयले भनेको छ।

भेटका क्रममा अध्यक्ष साहद्वारा पार्टी र सभापति लामिछानेलाई औपचारिक रूपमा बधाई दिएका थिए।

यसअघि लामिछाने र राष्ट्रिय सभाका सदस्य महन्थ ठाकुरबीच आज बिहान भेटवार्ता भएको छ।

वीरगंज/वीरगंज महानगरपालिका–६ का वडा अध्यक्ष तथा कार्यक्रम संयोजक जयप्रकाश शाहले हनुमान जन्मोत्सवलाई केवल धार्मिक अनुष्ठानको रूपमा सीमित नभई सांस्कृतिक पहिचान र सामूहिक आस्थाको सशक्त अभिव्यक्तिको रूपमा चित्रित गरेका छन्।

उनका अनुसार यस वर्षको आयोजनालाई अझ भव्य, व्यवस्थित र प्रभावकारी बनाउन विशेष तयारी गरिएको छ, जसले वीरगंजको धार्मिक वातावरणलाई थप ऊर्जावान बनाउने विश्वास व्यक्त गरेका छन्।

वीरगंजको मेनरोडस्थित ऐतिहासिक तथा प्राचीन श्री महावीर मन्दिरमा आगामी चैत्र १९ गते बिहीबार हनुमान जन्मोत्सव विशेष कार्यक्रमका साथ मनाइने भएको छ। सो अवसरमा साँझ ६ बजे सामूहिक महाआरती आयोजना गरिनेछ भने त्यसपछि ७:३० बजे भक्तजनहरूबीच प्रसाद वितरण गरिने कार्यक्रम तय गरिएको छ।

हरेक वर्ष उल्लेख्य भीड हुने यस मन्दिरमा यसपटक अझ ठूलो संख्यामा श्रद्धालु सहभागी हुने अनुमान गरिएको छ। त्यसलाई ध्यानमा राख्दै आयोजक पक्षले व्यवस्थापनलाई प्राथमिकतामा राख्दै तयारीलाई तीव्र बनाएको छ। श्री महावीर मन्दिर समिति, साप्ताहिक सुन्दरकाण्ड प्रचार समिति, साप्ताहिक हनुमान चालिसा पाठ समिति, श्याम नवयुवक मण्डल, मारवाडी महिला मञ्च र रानी सती ज्योति मण्डललगायत विभिन्न संघसंस्थाहरू कार्यक्रम सफल पार्न सक्रिय रूपमा जुटेका छन्।

कार्यक्रमको भीड व्यवस्थापन र सुरक्षालाई मध्यनजर गर्दै स्थानीय प्रशासनसँग समन्वय गरी आवश्यक प्रबन्ध मिलाइएको जनाइएको छ। ट्राफिक व्यवस्थापनदेखि शान्ति सुरक्षासम्मका विषयमा विशेष तयारी गरिएको आयोजकले उल्लेख गरेका छन्।

आयोजकका अनुसार यस्ता सामूहिक धार्मिक आयोजनाले वीरगंजको सांस्कृतिक जीवनलाई थप सुदृढ बनाउनुका साथै धार्मिक पर्यटन प्रवर्द्धनमा समेत महत्वपूर्ण योगदान पुग्ने अपेक्षा गरिएको छ।