रौतहट । रौतहटको गौर नगरपालिका–९ सिरसियामा मोटरसाइकलको ठक्करबाट एक वृद्धको मृत्यु भएको छ।

मंगलबार साँझ करिब ७:४५ बजे गौरबाट हजमिनियातर्फ जाँदै गरेको BR 22 H 6159 नम्बरको मोटरसाइकलले घर अगाडि सडकमा उभिरहेका गौर–९ सिरसिया निवासी करिब ७२ वर्षीय नारायण बैठालाई ठक्कर दिएको प्रहरीले जनाएको छ।

मोटरसाइकलको ठक्करबाट टाउको र दाहिने खुट्टामा चोट लागेका बैठालाई तत्काल प्रादेशिक अस्पताल गौरमा सामान्य उपचारपछि थप उपचारका लागि वीरगन्ज पठाइएको थियो। उपचारका क्रममा राति करिब ९:४५ बजे वीरगन्जस्थित सर्वोत्तम अस्पतालमा उनको मृत्यु भएको प्रहरीले जनाएको छ।

घटनापछि मोटरसाइकल चालक पर्सा वीरगन्ज घर भई हाल राजदेवी नगरपालिका–२ हजमिनियास्थित मामा सञ्जित भगतको घरमा बस्दै आएका करिब २२ वर्षीय अमित भगत फरार भएका छन्। उनको खोजी भइरहेको प्रहरीले जनाएको छ।

घटनास्थलमा जिल्ला प्रहरी कार्यालय गौरबाट प्रहरी सहायक निरीक्षक महेन्द्र चौधरीको कमाण्डमा तथा प्रहरी चौकी ब्रह्मपुरीबाट प्रहरी सहायक निरीक्षक विनोद राउत कुर्मीको कमाण्डमा प्रहरी टोली खटिएको थियो। प्रहरीले मोटरसाइकल नियन्त्रणमा लिएर घटनाबारे थप अनुसन्धान गरिरहेको छ।

मृतक बैठाको शव पोस्टमार्टमका लागि मंगलबार राति १२:२० बजे सर्वोत्तम अस्पताल वीरगन्जबाट प्रादेशिक अस्पताल गौर ल्याई शवगृहमा राखिएको प्रहरीले जनाएको छ। घटनाबारे थप विवरण आउन बाँकी छ।

पर्सा १२ असोज

धोबिनी गाउँपालिकाको अध्यक्ष पदका उम्मेदवार राजु पटेलले जनताले उम्मेदवारको काम, विचार र जनताप्रतिको प्रतिबद्धताको आत्ममूल्यांकन गरेर निर्णय गर्नुपर्ने बताएका छन्।

पटेलले असल जनप्रतिनिधि जनताको दुःख–सुखमा साथ दिने असल सिपाही बन्नुपर्ने धारणा व्यक्त गरे। उनले आफू जनताको समस्या नजिकबाट बुझेर गाउँपालिकाको विकास र सेवामा समर्पित हुन चाहेको बताए।

उनले भने, “धोबिनी गाउँपालिकाका जनताले एकपटक मौका दिनुपर्छ। उम्मेदवारको विगत, सोच र जनताप्रतिको व्यवहारलाई आत्माले मूल्यांकन गरेर निर्णय गर्नुपर्छ।”

पटेलले आफूलाई अवसर प्राप्त भए जनताको सेवकका रूपमा काम गर्दै शिक्षा, स्वास्थ्य, पूर्वाधार, रोजगारी तथा सुशासनका क्षेत्रमा प्राथमिकताका साथ काम गर्ने प्रतिबद्धता व्यक्त गरे।

राजन कुमार बानिया

पर्सा, १२ असोज

पर्साको जगरनाथपुर गाउँपालिकामा सरुवा भई आउनुभएका नयाँ प्रमुख प्रशासकीय अधिकृत सुनील केशरीलाई आज एक कार्यक्रमबीच स्वागत गरिएको छ। सोही अवसरमा गाउँपालिकाका प्रमुख प्रशासकीय अधिकृत सन्देश यादवलाई बिदाइ गरिएको हो।

गाउँपालिका अध्यक्ष श्रीकान्त यादव र उपाध्यक्ष बबिता देवी लगायत जनप्रतिनिधि तथा कर्मचारीहरूको उपस्थितिमा आयोजित कार्यक्रममा नयाँ प्रमुख प्रशासकीय अधिकृत केशरीलाई स्वागत गर्दै सफल कार्यकालको शुभकामना व्यक्त गरिएको थियो।

कार्यक्रममा बिदाइ हुनुभएका सन्देश यादवको आगामी कार्ययात्राको सफलताको कामना गर्दै उहाँले गाउँपालिकाको प्रशासनिक तथा सेवा प्रवाहमा पुर्‍याउनुभएको योगदानको प्रशंसा गरिएको थियो।

नवनियुक्त प्रमुख प्रशासकीय अधिकृत सुनील केशरीलाई गाउँपालिकाको सेवा प्रवाहलाई थप प्रभावकारी, पारदर्शी र जनमुखी बनाउन सफल हुनुहोस् भन्दै अध्यक्ष यादव, उपाध्यक्ष बबिता देवीलगायतले शुभकामना व्यक्त गरेका थिए।

कार्यक्रममा गाउँपालिकाका कर्मचारी, जनप्रतिनिधि तथा अन्य सरोकारवालाहरूको सहभागिता रहेको थियो।

काठमाडौं । देशलाई कुन दिशामा अघि बढाउने भन्ने स्पष्ट खाका तयार गर्ने उद्देश्यसहित बालेन नेतृत्वको सरकारले अल्पकालीनदेखि दीर्घकालीन योजनासम्मको कार्यसूची अघि सारेको थियो। सरकारले ७ हप्ता, १ महिना, ४५ दिन, ३ महिना, ६ महिना, १ वर्ष, २ वर्ष हुँदै १० वर्षसम्मका लक्ष्य निर्धारण गरी काम अघि बढाउने योजना बनाएको थियो।

सरकार गठनको सुरुवाती चरणमा देखिएको उत्साह र सुधारका प्रयासले नागरिकमा अपेक्षा बढाएको थियो। प्रशासनिक सुधार, सेवा प्रवाह, विकास निर्माण तथा सुशासनलाई प्राथमिकतामा राख्दै सरकारले विभिन्न योजना सार्वजनिक गरेको थियो।

तर, सरकार गठन भएको करिब ६ महिना पुग्दा प्रारम्भिक चरणमा देखिएको उत्साहअनुसार अपेक्षित परिणाम हासिल हुन नसकेको विषयमा बहस सुरु भएको छ। सरकारले अघि सारेका कतिपय योजना कार्यान्वयनको चरणमा सुस्त देखिएको र विभिन्न क्षेत्रमा समस्या थप जटिल बन्दै गएको विश्लेषणहरू सार्वजनिक हुन थालेका छन्।

विशेषगरी नीति घोषणा र त्यसको प्रभावकारी कार्यान्वयनबीचको दूरी, प्रशासनिक संयन्त्रको कार्यक्षमता, विकास आयोजनाको गति तथा सेवा प्रवाहमा देखिएका समस्याले सरकारमाथि चुनौती थपेको देखिन्छ।

सरकारले भने दीर्घकालीन लक्ष्य हासिल गर्न प्रारम्भिक चरणमा आवश्यक आधार तयार गर्ने र क्रमशः योजनालाई कार्यान्वयनमा लैजाने बताउँदै आएको छ। सरकारको प्रारम्भिक कार्यसूचीअनुसार ६ महिना, १ वर्ष र त्यसपछिका अवधिमा थप ठोस परिणाम देखाउने लक्ष्य राखिएको थियो।

अब सरकारका लागि मुख्य चुनौती घोषित योजना र लक्ष्यलाई व्यवहारमा उतार्दै नागरिकले प्रत्यक्ष अनुभूति गर्ने गरी परिणाम दिनु हुनेछ। प्रारम्भिक उत्साहलाई निरन्तरता दिँदै बाँकी अवधिमा सरकारले कार्यान्वयनको गति कसरी बढाउँछ भन्ने विषयलाई आगामी दिनमा महत्वपूर्ण रूपमा हेरिनेछ।

सरकारले तय गरेको १० वर्षे दीर्घकालीन खाकाअनुसार अघि बढ्न सके त्यसको प्रभाव तत्कालीन सरकारको कार्यकालभन्दा बाहिरसम्म देखिन सक्नेछ। तर, त्यसका लागि स्पष्ट प्राथमिकता, प्रभावकारी कार्यान्वयन र निरन्तर अनुगमन आवश्यक देखिन्छ।