काठमाडौं– दक्षिण एसिया क्षेत्रका उद्योग, व्यापार तथा सेवासम्बन्धी अवसरहरूलाई एकै थलोमा ल्याउने उद्देश्यसहित काठमाडौंमा साउथ एसिया ट्रेड फेयर सुरु भएको छ । 

काठमाडौंको प्रदर्शनीमार्गस्थित भृकुटीमण्डपमा सुरु भएको साउथ एसिया ट्रेड फेयर वैशाख २८ गते सम्म सञ्चालन हुने आयोजक इन्ट्रोडक्शन ट्रेड शोज नेपाल प्रा.लिले जनाएको छ ।

मेलामा भारत, बङ्गलादेश, नेपाल, भुटान, पाकिस्तान, अफगानिस्तान, श्रीलंका र माल्दिभ्स लगायतका देशहरूका करिब १५० भन्दा बढी प्रदर्शकहरू सहभागी छन् । 

प्रदर्शनी मार्फत निकासीयोग्य वस्तुको प्रवर्द्धन गर्न सबै व्यापारिक समुदायलाई प्रोत्साहन गर्ने तथा त्यसका लागि आवश्यक पहल कदमी समेत गर्ने उद्देश्य राखेको समेत आयोजकले जनाएको छ ।

मेलामा कपडा तथा रेडिमेड सामग्री, सौन्दर्य सामग्री, हस्तकला, सवारी साधन तथा पार्टपुर्जा, फर्निचर, कृषि उत्पादन, सूचना प्रविधि, घरेलु उपकरण लगायतका विभिन्न क्षेत्रका उत्पादन तथा सेवाहरूका स्टल राखिएका छन् । 

२४ बैशाख, काठमाडौं । लामो समयदेखि सवारीचालक अनुमतिपत्र (लाइसेन्स) को पर्खाइमा रहेका सेवाग्राहीका लागि खुसीको खबर छ ।

सुरक्षण मुद्रण केन्द्रले थप १७ लाख थान स्मार्ट लाइसेन्स छपाईको कार्य औपचारिक रूपमा सुरु गरेको छ । केन्द्रले पहिलो चरणमा १२ लाख थान लाइसेन्स सफलतापूर्वक छपाई गरी यातायात व्यवस्था विभागलाई हस्तान्तरण गरिसकेको पृष्ठभूमिमा, दोस्रो चरणको यो ठूलो परिमाणको छपाई प्रक्रिया अघि बढाएको हो । यसले विगत लामो समयदेखि देखिएको लाइसेन्सको अभाव र मुद्रणमा भइरहेको ढिलाइलाई निकै हदसम्म सम्बोधन गर्ने अपेक्षा गरिएको छ ।

यस पटकको छपाई प्रक्रियालाई थप व्यवस्थित र सुरक्षित बनाउन केही नयाँ सुविधाहरू पनि थपिएका छन्। गत वैशाख ४ गते केन्द्र र यातायात व्यवस्था विभागबीच भएको सम्झौता अनुसार अब छपाई हुने १७ लाख लाइसेन्समा सुरक्षाका दृष्टिकोणले महत्वपूर्ण मानिने ‘क्यूआर कोड’ समेत समावेश गरिनेछ। यो प्रविधिले ट्राफिक प्रहरीलाई सडकमा लाइसेन्सको आधिकारिकता तत्काल जाँच गर्न सहज बनाउनेछ ।

सम्झौता भएलगत्तै केन्द्रले आफ्नो मुद्रण संयन्त्रलाई पूर्ण क्षमतामा परिचालन गरी कार्ड उत्पादन सुरु गरिसकेकाले अबको केही समयभित्रै विभागमार्फत वितरण प्रक्रियामा सहजता आउने देखिएको छ ।

२४ बैशाख, काठमाडौं ।  लुम्बिनी प्रदेशमा प्रशासनिक पुनर्संरचनाः दुई सचिवको जिम्मेवारी हेरफेरसहित नयाँ कार्यविधि स्वीकृत२४ बैशाख, काठमाडौं । लुम्बिनी प्रदेश सरकारले प्रशासनिक संयन्त्रलाई चुस्त बनाउन महत्वपूर्ण नियुक्ति र कार्यविधिहरू पारित गर्दै नयाँ निर्णयहरू सार्वजनिक गरेको छ ।

मुख्यमन्त्री चेतनारायण आचार्यको अध्यक्षतामा राप्ती उपत्यका (देउखुरी) स्थित मुख्यमन्त्री तथा मन्त्रिपरिषद्को कार्यालयमा बिहीबार बसेको बैठकले कर्मचारी प्रशासन र विकास पूर्वाधारसँग जोडिएका प्रस्तावहरूमाथि छलफल गर्दै केही महत्वपूर्ण जिम्मेवारी हेरफेर गरेको हो । बैठकले कर्मचारीको अध्ययन बिदा र प्रशासनिक व्यवस्थापनलाई व्यवस्थित गर्न नयाँ कानुनी आधार तयार पारेको स्वास्थ्य मन्त्री खेमबहादुर सारुले जानकारी दिनुभयो ।

बैठकको मुख्य निर्णयअनुसार प्रदेशका दुई महत्वपूर्ण मन्त्रालयमा सचिवहरूको नयाँ पदस्थापन गरिएको छ । राम पराजुलीलाई भौतिक पूर्वाधार विकास मन्त्रालयको सचिव र जानुका पण्डितलाई कृषि, भूमि व्यवस्था तथा सहकारी मन्त्रालयको सचिवको जिम्मेवारी सुम्पिने निर्णय भएको छ ।

यसका साथै यातायात क्षेत्रको व्यवस्थापनलाई प्रभावकारी बनाउन अनिल मरासिनीलाई यातायात पूर्वाधार निर्देशनालयको निर्देशकको रूपमा जिम्मेवारी तोकिएको छ । यो प्रशासनिक हेरफेरले प्रदेशको पूर्वाधार र कृषि क्षेत्रका योजनाहरू कार्यान्वयनमा थप गति दिने सरकारको विश्वास छ ।

मन्त्रिपरिषद्ले कर्मचारीहरूको वृत्ति विकासलाई ध्यानमा राख्दै ुअध्ययन पूर्व स्वीकृति तथा अध्ययन बिदा स्वीकृति सम्बन्धी कार्यविधि, २०८३ु लाई समेत स्वीकृति दिएको छ। यसका साथै, स्थानीय तहको मागलाई सम्बोधन गर्दै गुल्मी जिल्लाको इस्मा गाउँपालिकाको केन्द्र वडा नम्बर ५ को चापटारीमा कायम गर्न नेपाल सरकारलाई सिफारिस गर्ने निर्णय गरिएको छ ।

भौतिक पूर्वाधारतर्फ, प्रदेश प्रशासनिक परिसरभित्र भर्खरै निर्माण सम्पन्न भएका भवनहरूबाट छिटो सेवा प्रवाह सुरु गर्नका लागि आवश्यक फर्निचर तथा फिक्स्चर्स व्यवस्थापन गर्न बजेट फुकुवा गर्ने निर्णय समेत भएको छ, जसले प्रदेशको मुकामबाट हुने प्रशासनिक कार्यलाई थप सहज र व्यवस्थित बनाउनेछ ।

म्याग्दी– म्याग्दीको धवलागिरी गाउँपालिका–४ बगरको जंगलबाट इजाजत नभएका छ थान भरुवा बन्दुक बरामद भएको छ । 

इलाका प्रहरी कार्यालय दरवाङ र ताकम प्रहरी चौकीको संयुक्त टोलीले बुधबार जङ्गलमा लुकाएर राखेको अवस्थामा छ थान एक नाले भरुवा बन्दुक बरामद गरेको हो । 

प्रहरी निरीक्षक सागर तिमिल्सिनाले वन्यजन्तुको अवैध चोरी शिकारी र अपराध नियन्त्रणका लागि सञ्चालित ‘ब्राबोसेरा’ अभियानअन्तर्गत बन्दुक बरामद गरेर इलाका प्रहरी कार्यालय दरवाङमा ल्याइएको जानकारी दिए । 

विसं २०८२ मङ्सिर १५ गतेदेखि सुरु भएको ‘ब्राबोसेरा’ अभियानमार्फत हालसम्म १४२ थान इजाजत नभएका बन्दुक बरामद भएको उनले जानकारी दिए।

ढोरपाटन शिकार आरक्ष, अन्नपूर्ण संरक्षण क्षेत्र आयोजना र सामुदायिक वनमा वन्यजन्तुको चोरी शिकारीका साथै आपसी विवाद र झैझगडामा प्रयोग हुने जोखिम भएकाले अवैध बन्दुक बरामद गर्ने अभियान चलाएको प्रहरी नायब उपरीक्षक सूर्यबहादुर थापाले बताए। 

अवैध बन्दुक बरामद गर्न सञ्चालन भएको अभियानलाई म्याग्दी प्रहरीले ‘ब्राबोसेरा’ नाम दिएको छ । स्थानीयवासीहरूको सूचना तथा सहयोगमा जङ्गल, रुखका टोड्का, खोल्सा, मासिन नबस्ने घर गोठ तथा जमिनमा गाडेको अवस्थामा बन्दुक बरामद गरिएको हो । 

प्रशासनबाट अनुमति लिएर व्यक्तिगत सुरक्षाको प्रयोजनका लागि हतियार राख्न पाउने व्यवस्था छ । प्रशासनबाट इजाजत नलिई हातहतियार राख्नेलाई पाँच वर्षसम्म कैद सजाय र ५० हजारसम्म जरिवाना हुने कानुनी व्यवस्था छ। 

अवैध बन्दुक बरामद गर्ने अभियान जारी राख्ने र त्यस्ता बन्दुक भएको सूचना उपलब्ध गराउन म्याग्दी प्रहरीले अनुरोध गरेको छ ।